Isaías 17 - Bible in Tzotzil de Chamula

Ta xcaj'albat sc'oplal ta xich' contrainel ti lum Damascoe

¹ Xi s'elan ta xcaj'albat sc'oplal ta xlic yich' contrainel ti lum Damascoe: Ti Damascoe ta xlaj sc'oplal ma' ti muc' ta lum to oxe. Stuc xa no'ox slilijemal busul ta xcom.

² Tenbil jipbil ta xcom ta j'ech'el. Ta xc'ot ta yaxaltic ta yavil sve'eb chon bolometic ti jun yo'nton xlamet ta sa' sve'elique.

³ Ti lum Efraín ti stuc xa no'ox cajal xa'i sba xchi'uc ti Israele, ta xlaj sc'oplal ma' ti oy to smocal ti jteclumetic yu'une. Jech ta xc'ot ta stojol ec ti lum Damascoe. Ti c'u yepal ta xcomic ta naclej ti ta Siriae, ta xc'ot ta pasel ti mu'yuc xa ajvalil yu'unique. Ti Dios ti scotol xu' yu'une ja' me ta xal ti va'i s'elan taj une.

Ti Israele ta xich' tsitsel

⁴ Ti jech c'ac'al taje, ti Samaria ti stuc xa no'ox cajal xa'i sba xchi'uc steclumal ti Jacobe, ta xtub ta xch'ay yip. Ti oy no'ox c'usi x'ayan yu'une, ta xch'ay sc'oplal.

⁵ Jech ta xc'ot ta stojol jech c'u cha'al ti c'alal ta x'ech' ti jtsob trigo ti ta stsob ta sc'ob ti jujubej sjole, mi ja' ti c'alal ta stsob ti trigo ta stenlejal Refaime,

⁶ ti c'ajomal xa no'ox ta xcom xc'uxc'ulil ti ch'aybil ta o'ntonale, mi ja' ti c'alal ta xich' lilinbel sat ti olivoe, ti c'ajomal no'ox jbej cha'bej ta xcom sat ta sni'tac ti sc'ob-c'obtaque. Mi yepal xa com xcaltique, c'ajomal no'ox chanbej mi vo'bej ta scotol ti jpets te'e. Ti Ajvalil Dios yu'un ti Israele ja' me ta xal ti va'i s'elan taje.

⁷ Ti jech c'ac'al taje, stoy xa muyel sat ti vinic ta stojol ti J'ac'-ch'ulelal yu'une, ja' ti ch'ul Dios yu'un ti Israele.

⁸ Mi ja'uc ti xac' xa batel sat ta stojol ti altaretique, mi yan ti c'usitic laj smeltsan ta yoc ta sc'obic ti jnaclejetique. Mi ja'uc xa ta xbat yo'ntonic ta yich'el ta muc' ti bal-bal ch'ul te'e, mi ja'uc ti altaretic ti bu laj xchiq'uic pom ta sventa ti diosetique.

⁹ Ti jech c'ac'al taje, jipbil tenbil ta xcomic ti ateclumalic ti bajal ta moque jech c'u cha'al jipbil tenbil com steclumal ti heveoetique xchi'uc ti amorreoetique ta scoj xi'elal ti israeletique. Ta xjoybij ta sbajtical banomil ta j'ech'el,

¹⁰ yu'un laj ach'ay ta avo'nton ti laj spojot ti Diose. Mi ja'uc vul ta ajol ti mu'yuc c'usi xana' ti nac'alot lec yu'une. Ti vo'ote laj avabtelan ta yabtelanel ti yavil nichim ti c'upil sbae. Laj ats'un ti nichimetic sventa yich'obil ta muc' ti diosetic yu'un ti jyanlumetique.

¹¹ Ti sc'ac'alil lic ats'une, lec laj achabi, ti avo'ntonuc xa ava'i ta yoc'omal no'ox voc'uc ti sbeq'ue. Ja'uc le' une, ti c'alal ta xvul ta loq'uel ti xchamel ti mu poxtabaje, ta xch'ay ta j'ech'el ti sts'unubale.

¹² A'yio ava'i ti xvo'o'et no'ox talel ti epal lumetique, ti co'ol to s'elan nab xvo'o'et talele. Ja' xa xvo'o'et talel ti muc'tiquil lume jech c'u cha'al xvo'o'et no'ox ta j'ech'el ti c'alal ta xac' tsots ti vo'e.

¹³ Ja'uc le' une, ti c'alal ta stsacatic ta c'op yu'un ti Diose, xc'uletic no'ox batel ta jatobal ta nom, jech c'u cha'al junuc jobel ti bec'bil ta xbat ta nom yu'un ti iq'ue, ti co'ol s'elan jech c'u cha'al ti tomal ch'ix ti chechbil ta xbat yu'un ti sutub iq'ue.

¹⁴ Jun to j'ac'-xi'el yilel ta spas sbaic ta smalil c'ac'al, ja'uc ti c'alal sac jaman talel ti osile, mu'yuc xvinaj bu batic. Ja' jech ta xc'ot ta stojolic ti buch'utic ta spoj ti c'usitic oy x'ayane. Jech ta xc'ot ta stojolic ti buch'utic ta soquesvanique.