Isaías 16 - Bible in Tzotzil de Chamula

Ti jnaclejetic ta Moabe ta xbat snac' sbaic ta lum Judá

¹ Ti banquilaletic yu'un ti muc' ta lume, ta Sela to ti oy ta sbajtical banomile, ta staquic batel chijetic ti ta xc'ot ta lum Sione.

² Ti jnaclejetic yu'un Moab ti oyic ti bu sbiinoj sbelel Arnone, co'ol s'elan j'xi'el mut ta xjatavic loq'uel ti bu yac'oj stasique.

³ Xi ta xalbeic ti lum Sione: “C'otuc ta chapel ta nopel avu'un ec un yo' jech ta xapojuncutic, ti c'otan ta jpac-c'op cu'uncutique. Macuncutic ta aqueoval ta avaxinal xc'uxul ti c'ac'al ta j'ech'ele, ti co'oluc to ac'ubaltic c'otuque. Ac'o ave ati' ta xch'amunbot anaic ti buch'utic nutsbilique, ti mu xavac' ta c'abal ti jatviletique.

⁴ Ac'o snac' sbaic ta atojolic ti jatviletic yu'un ti Moabe, ch'an no'ox chian. C'otan ta nac'obbail yu'unic ti buch'utic nutsbilic yu'un ti jtsutsesvaneje.” C'alal ta xc'ot ta pasel ta xlamaj sc'oplal ti ilbajinele, ti tsots vocole, c'alal ta xloc' batel li' ta lum ti jmilvaneje,

⁵ va'i un, ti jun snitilul ti Davide, ta xlic ochuc ta ajvalilal, ti mu'yuc spajeb stsutseb ta x'och ta ajvalilal ti ayanem ta yutsil slequil o'ntonale. Jun jchapanvanej ti tuc' sjol yo'ntone, ta xlic ta xchapel ti c'usitic oy ta sventa ti jujune, ti ta xc'ot no'ox yorail ti lequil chapanele.

⁶ Xcojtiquintic lec stoyobbailic ti moabitaetique, ti cajal xa'i sbaique, ti spochanilique, ti spimilique, ti mu'yuc stuq'uil jset'uc ti c'usitic ta xloc' ta yeique.

⁷ Jech o xal un, scotol jnaclejetic yu'un ti lum Moabe, ta x'oq'uic yu'un ti smuc' ta lumalique. Mu xa c'usi jech o ta xa'i ti svocolique, ta x'oq'uic ta stojol ti viniquetic ta Kir-harésete.

⁸ Ti ts'unubal uva ta Hesbone xchi'uc ta Sibmae, laj xa nucultajuc ta scoj ti laj xtuch'ilanic comel ti ajvaliletic yu'un ti muc'tiquil lumetique. ti c'otem sc'ob ta Jazer xchi'uc ta sbajtical banomile, ti laj stam ech'el ta jot muc' ta nabe.

⁹ Jech o xal ta xi'oc' yu'un sts'unubal uva ti Sibmae jech c'u cha'al sts'unubal uva ti Jazere. Ta jmal ya'lel jsat yu'un ti Hesbone, ti Elalee, ti bu votajtic ti sate, ti bu ta xich' tsobele, x'avlajet no'ox liquel ti j'ac'-letoetic ti bu taje.

¹⁰ Ma' ti, “ja' ja', ji' ji'”, xiique, ts'ij xi liquel ti xvochvun ta osil banomile. Mu'yuc xa ma' ti oy buch'u x'avan ta muyubajele, ti oy buch'u xlaet ta q'uejimol ta yut sts'unub uvae. Mi ja'uc xa ti jpits' uva yo' ta xich' meltsanel ti vinoe. Laj to sc'oplal ma' ti “ji' ja'” ti xiic une.

¹¹ Jeche' xa xpujpun ma' ti co'nton une, co'ol xa jech c'u cha'al junuc arpa ta scoj ti Moabe xchi'uc ti Kir-harésete.

¹² Ti slumal Moabe, ac'o mi xlametic no'ox batel ta vitstic ta lubtsajel ta vocoletele, ac'o mi ta xbatic ta ch'ulna ta c'opojel ti'inele, mu'yuc c'usi ta staic.

¹³ Ma' taj une, vo'ne xa laj yal talel ti sc'op Dios ta scontrainel ti Moabe.

¹⁴ Avi tana le' une, xi ta xal ti Diose: “Li' ta oxib jabile, mu stselbuj jech c'u cha'al jun j'abtel ti xchapanoj lec c'u sjalil ta xc'ot ta pajel ti yabtele, jech ti Moabe mu'yuc c'usi stunel ta x'ilat liquel xchi'uc ti yutsilal slequilale. Ti yepal ta j'ech'el ti slumale, juteb xa no'ox ti bu tsacal ta xcomique. Ta xlaj ma' ti yipal yu'unic ta j'ech'ele.”