Isaías 15 - Bible in Tzotzil de Chamula

Ta xcaj'albat ti ta xich' contrainel ti Moabe

¹ Xi s'elan ta xcaj'albat sc'oplal ti Moab ti ta xich' contrainele: Ta yac'ubalil ti c'alal tub sc'oplal ti Are, tub sc'oplal ec ti muc' ta lum Moabe. Ta yac'ubalil ti c'alal tub sc'oplal ti Kire, tub sc'oplal ec ti Moabe.

² Ti jnaclejetic ta Dibone ta xmuyic ech'el ta yoq'uitael sbaic ta ch'ulna ti va'anbil ta vitse. Ti lum Maobe mu xa x'ech' ta xa'i svocol xchi'uc ti tub sc'oplal ti jteclum Neboe xchi'uc ti jteclum Medebae. Scotolic sloc'oj ti stsatsal sjolique, ti xch'ulojic ta loq'uel ti yisimique.

³ Naca lajemal c'u'il xa slapojic ti jnaclejetic ta xanavic ta calleetique. Smil xa sbaic ta oq'uel ti buch'utic oyic ta xcha'cojal snaique. Scotol ti bu svol-vol sbaic ti jnaclejetique, mu x'ech' ta xa'iic ti vul o'ntone, ti xmalmun no'ox ti ya'lel satic ta j'ech'ele.

⁴ Ti jnaclejetic ta lum Hesbone, xchi'uc ti oyic ta lum Elalee, x'avanic xa ta sc'anic pojel, ti xvinaj to ta jteclum Jahas ti x'avlajetique. Jech o xal un, stsic'tsun xa yo'ntonic ti banquilal j'ac'-letoetic yu'un ti lum Moabe, ti batem xa xch'ulelic ta xi'el ta j'ech'ele.

⁵ Jc'anuc xa ca'i ti oyuc spojel ti Moabe, ti xtanetic xa ech'el ta jatobal ti steclumal c'alal to lum Zoare, ta Eglat-selisiyae. X'oc' x'avanic xa ta xmuyic ech'el ta sbelel Luhit. Smil xa sbaic ta avetel ta oq'uel ta sbelel Horonaim ta scoj ti laj yilic ti chopol c'ot ta pasele.

⁶ Taquij ti joq'uetic ta Nimrime. Ta j'ech'el nucultaj ti momoletique. Mu xa c'usi xch'i ta banomil. Mi ja'uc xa oy c'usi xavil ti yox yanale.

⁷ Jech o xal ti jnaclejetique ta stsobbeic ech'el ti sc'ulejalique, ti xjelav to ech'el ta uc'um ti sbiinoj Álamos ta xbat yaq'uique.

⁸ Ti x'avlajetic ti ta sc'anic ti pojel colele, oy ta joyob sts'actac ti Moabe. Ti xvinaj to x'avlajetique, ta xc'ot ta Eglaim xchi'uc ta Beer-elim.

⁹ Ac'o mi nojic xa ta ch'ich' ti joq'uetic ta Dimone, yu'un ta to jtac ech'el tsots vocoletic ta j'ech'el. Ta xtubbat sc'oplalic yu'un jcot león ti buch'u cuch to yu'un spojel sba ta Moabe, xchi'uc ti buch'u cuxul to comic ta banomile.