Isaías 14 - Bible in Tzotzil de Chamula

Ta sutic talel ti buch'utic bec'bil loq'uique

¹ Jech, ti Diose c'ux ta xa'i ti Jacobe. Ta ach' ta xlic st'uj Israel yo' ta xc'ot ta yu'untac ti ta xc'ot ta pasel ta xic' sutel talel ti ta xnaquiic yu'un ta sbanomilic yan veltae. Ta xnopajic talel ti jyanlumetic ta stojolic ti ta svol sbaic xchi'uc slumal ti Jacobe.

² Yepal no'ox jyanlumetic ta snabliic batel ti israeletic ti ta xbatic ta yosilalique, ti ta xlic mosovinaticuc yu'un ti israeletic c'alal oyic ta yosilal ti Diose. Chucbil ta xbatic yu'un israeletic ti buch'utic chucvanic to oxe. Tsalbil ta xc'otic yu'unic Israel ti buch'utic ilbat ti svocolic yu'une.

Slabanel ti ajvalil yu'un ti Babiloniae

³ Lum Israel, c'alal ti Dios ta xac' acux avo'nton ti laj avich' ti avocole, ti laj ata ti vul o'ntone, ti tsots laj ava'iic ti mosovinele,

⁴ xi ta xlic acaj'al ta jun yutsil lequil a'yej ta slabanel ti ajvalil yu'un ti Babiloniae: “Q'uelo avilic un, vi to la bu c'alal c'ot ta loq'uel ti j'ac'-vocol une. Q'uelo avilic un, vi to la bu c'alal c'ot ta loq'uel xchi'uc ti stoyobbail une.

⁵ Ti Diose laj xa stuch'be yip ti chopol vinique. Laj xa slilinbe xvaxton ti j'ac'vanej ta vocol jcuch-abtele,

⁶ ti laj yilbe svocol ti muc'tiquil lumetic ta scapemal sjole, ti mu'yuc spajeb laj sc'avavan ta majele, ti naca spuj no'ox ta teq'uel ti jteclumetic ta sc'ac'al yo'ntone, ti j'ech'el mu'yuc jutebuc oy xc'uxul yo'nton laj snutsane.

⁷ Scotol banomil lamajem c'op, mu'yuc c'usi sna'ic, ti xmuybajic no'ox x'avlajetique.

⁸ Ma'uc no'ox taje, yu'un xmuyubajic no'ox ti toje, xchi'uc ti ch'ut te'etic ti oy ta vits Líbano ti jech layal ta lume. Xi ta xlic yalique: ‘C'alal lic yalan ta lume, mu'yuc xa buch'u ta xtal sq'uiuncutic ta lomesel.’

⁹ “Ta olon ti bu oy volol ti animaetique, xvochvun no'ox ta j'ech'el yo' jech ta xtal snupot ta be. Snac'obalic ti animaetique ta xlic vuluc ti xch'ulelique. Scotol ti banquilaletic ti laj ech'icuc ta banomile, ta xloq'uic talel ta snupelot ta be. Scotol ti ajvaliletic ti laj ech'icuc ta ajvalilal yu'un ti lumetique, ta xlic sva'anan sbaic ti chotolic ta smuc' ta chotlebique.

¹⁰ Scotolic xi ta xalbot ti sc'opique: ‘Ti vo'ot ec une, tub ti amuc'ul atsatsale. Lac'ot ec un jech c'u cha'al ti vu'uncutique.

¹¹ Li' to vul ta tsutsel ti avuni toyobbail une, xchi'uc ti xlomet no'ox avu'un ti jchop o ta vobe. C'ot ta atem un ti xuvitetique. Ac'u'inoj c'ot ec un ti voletel xuvitetique.

¹² “C'u no'ox la xi ti xajipip to loq'uel talel ta vinajel une, ti vo'ot co'ol a'elan jbej c'analot ti xojobin no'ox xojobal ta xloc' talel ta jujun sobe. Ta banomil to latenat yalel talel, ti vo'ot naca xatsal no'ox ti muc'tiquil lumetique.

¹³ Yu'un xi laj anop ta avo'ntone: ‘C'alal to vinajel ta xic'ot. Ta jchotan jpasob mantal ta sba c'analetic yu'un ti Diose. Le' to xbat chotlucun ta nom ta yolon ti yolon xocon sloq'ueb c'ac'ale, ti bu ta stsob sbaic ti banquilaletic ti co'ol s'elan diosetique.

¹⁴ Xjelav to ta ba toc ta xic'ot, ti co'ol j'elan ta xic'ot jech c'u cha'al ti Dios ti scotol xu' yu'une.’

¹⁵ Ja'uc le' une, ta melel lajipat talel ti bu ta spas mantal ti lajebale, ti bu mu'yuc spajeb ti xabe.

¹⁶ “Batem xa xch'ulelic ta xasq'uelot ti buch'utic ta xayilote, ti ta stuc'ulanot lec ti xi ta xlic yalic ti ac'oplale: ‘¿Mi mu ja'uc ti vinic le'e ti xvochvun no'ox yu'un ti banomile, ti laj yac'be svocol ti muc'tiquil lume?

¹⁷ ¿Mi mu ja'uc ti vinic le'e ti co'ol s'elan sbajtical banomil laj yicta comel ti banomile, ti tusul no'ox laj yicta ta milel ti jteclumetique, ti mu ja'uc jutebuc laj stic' sba ta spojel scoltael ti jchuqueletique?’

¹⁸ “Scotol ti ajvaliletic ti laj ech'icuc ta muc'tiquil lumetique, yich'elic xa ta muc' ta xa'iic ti mu'yuc c'usi sna'ic ta xcux yo'ntonic ta jujun tal ta smuquinalique.

¹⁹ Ja'uc ti vo'ot une, ta nom to ta xatenat batel ti bu oy ti muquinale, ti co'ol s'elan jun c'a'ep ti mu stac' nopel ta j'ech'ele, ti co'ol xa a'elan anima telelot ta xavich' pech'el ta teq'uel capalot xchi'uc ti animaetic ti laj yac' sjol sbaquilique, ti laj yich'ic bojbel ti snuq'uic ta letovajele, ti jip xa ute ochel ta xa'ab ti bu naca tontique.

²⁰ Mu'yuc ta xavich' muquel jech c'u cha'al laj yich'ic muquel ti yan ajvaliletique, yu'un laj atubbe sc'oplal ti alumale, laj amil ti ateclumale. Snitilultac ti jti'ovale mu xjalijic sbatel osil.

²¹ Chapano abaic ta smilbel ti xnich'nabique ta scoj milvanic ti stotique, yo' jech mu teyuc no'ox ta yo'ntonic ta yu'ninel ti banomile, ta snojesel ta banomil ti jteclumetique.”

²² Ta jbel sc'oplal xi laj yal ti Dios ti scotol xu' yu'une: “Ta jliques cabtel ta scontrainelic. Ta jtsutsesbe sc'oplal ti sbiinoj Babiloniae, xchi'uc scotol ti c'u to yepal ta xcome, ti xnich'nabique, ti smomique.

²³ Yu'un ta joybin ta jun lac-lac ach'el. Ta xc'ot ta jun snail mutal bolometic. Ta jmes ta tsutsesel ta j'ech'el yu'un ti j'ac'-vocol mes te'e.” Ja' me Dios ti scotol xu' yu'un ma' ti va'i s'elan ta xal une. Ta xtub sc'oplal ti muc' ta lum Asiriae

²⁴ Ti Dios ti scotol xu' yu'une xi laj sva'an sba ta yalele: “Mi ja'uc xa xina'et yu'un ma' ti c'usi c'ot ta nopel cu'une, ta ono'ox xc'ot ta pasel. Ti c'usi c'ot ta chapel cu'une, ta ono'ox xc'ot ta pasel.

²⁵ Ta jlumal, ta jtsutses ya'iic ti lum asirioe. Ta jvalc'un sutbinic ya'iic ti ta jvitstaque. Ti tsots ta j'ech'el ti smantale, mu xa x'ac'batic svocolic yu'un ti jlumale. Ti cajal yac'oj sba ta j'ech'ele, mu xa x'ac'bat svocolic yu'un.

²⁶ Ja' jech c'ot ta nopel cu'un ti ta xc'ot ta sjunlej ti banomile. Oy xa ta coc ta jc'ob ta yac'bel xi'el scotol ti muc'tiquil lume.”

²⁷ Ti Dios ti scotol xu' yu'une, c'ot ta nopel yu'un. Mu'yuc buch'u ta xmacun ta be. Oy xa ta yoc ta sc'ob ti sibtasele. Mu'yuc xa buch'u ta sjel ti c'u s'elan laj snope.

Ta scaj'albe sc'oplal ti ta xich' contrainel ti filisteoetique

²⁸ Ta sjabilal c'alal cham ti ajvalil Acaze, xi ono'ox s'elan laj scaj'al ti Isaíase:

²⁹ Mu to me xamuyubaj, jteclum filistea, ac'o mi c'as xa ti vach' ta atsitsobil to ox cu'une. Ti bu vul ta loq'uel ti jcot quiletel chone, ta x'ayan talel jcot quiletel jti'oval chon ti vibora sbie. Ma'uc no'ox taje, ta x'ayan talel jcot viletel jti'oval chon ti sbiinoj dragone.

³⁰ Oy xa yaxaletic ta cosil jbanomil ti ta slo' ti xchijic ti me'un mu'nate. Ti jnaclejetic ti mu'yuc c'usi x'ayan yu'unique, mu'yuc c'usi sna'ic ta xcux yo'ntonic. Ta jventa ti vu'un ec une, ta xlic chamicuc ta vi'nal ti avinquileltaque. Ta jmil scotol ti c'u yepal ta xcomique.

³¹ Cucho avocolic ca'itic un, filisteoetic, avananic ava'iic un xchi'uc ti yipal xc'uxule, nicnunanic ta xi'el ava'iic ec un. Yu'un ti xi ta yolon ti yolon xocon sloq'ueb c'ac'ale, epal soldadoetic ta xtalic ti co'ol s'elan jun to ic'luman toc ti xpucuquin no'ox talel ti banomil yu'unique, ti mu ja'uc junuc vinic ta sq'uej sba loq'uel ti bu xvoletic talele.

³² ¿C'usi xu' ta xich' tac'bel ti j'alc'op j'ich'-mantaletic yu'unic ti muc'tic lumetic taje? Ti Sione, ac'bat xa yip stsatsal yu'un ti Diose. Ti steclumal ti oyic ta vocole ta xbat snac' sbaic yo' ta spoj sbaic ti bu taje.