Isaías 13 - Bible in Tzotzil de Chamula

Ta xcaj'albat ya'i ti Babilonia ti ta xich' contrainele

¹ Ti Isaías xnich'on ti Amose, caj'ac'bat sna' ti xi s'elan lamal ta xc'ot ta stojol ti ta xich' contrainel ti lum Babiloniae:

² “Va'anic senyail ta jun t'ajal vits ti xlic xa ti letoe. Alic mantal ti tsacvanicuc xa ta leto ti soldadoetique. Toyo ac'obic yo' jech ta xnopajic ochel ta sti' smoc ti banquilaletique.

³ Laj xa jtaan ta iq'uel jvinictac ti mu sna' xi'ique. Laj xa calbe mantal ti caj'ac'-letotac ti buch'u t'ujbilic cu'un ti xmuyubajic xa ta stsalvanique yo' ta xc'ot ta pasel yu'unic ti tsitsel ta xcaq'ue.”

⁴ Xvinaj xa xvochet ta vits ti co'ol s'elan ep ta j'ech'el ti jnaclejtique. Xvinaj xa xvochvun ti muc'tiquil lumetique, ti jteclumetic ti svoloj sbaique. Ti Dios ti scotol xu' yu'une, yacal xa ta sloq'uesbe sbi ti yajsoldadotac ti chapalic xa ta ac'-letoe.

⁵ Liquemic talel ta namal banomil ti le' to ta jot sloq'ueb c'ac'ale. Taje, c'otem ta yabtejebtac Dios ti ta stunes ta sc'ac'al yo'nton ta stsutsesel scotol ti banomile.

⁶ Me'unal oc'anic ta avanel, yu'un nopaj xa talel sc'ac'alil ta xtal ti Diose, ti xjipluj to vulel vocol yu'un ti Buch'u scotol xu' yu'une.

⁷ Va'i un, scotol banomil ta x'alub ti yoc sc'obique. Scotolic ch'abal xa yipal yu'unic, batem xa xch'ulelic ta xi'el.

⁸ Xbaletic xa xchi'uc yipal jech c'u cha'al xc'uxul alajel ta xa'i ti antse. Yu'un ta jujun tal mu xa stac' a'yieluc ta xa'iic ti sq'uel q'uelbe sba ti satique, ti vajal ta c'oc' satic yu'un ti q'uexlale.

⁹ Yu'un ta xa sta sc'ac'alil ta xvul ti Diose, jun c'ac'al ti toj xi'bal sbae, ti tilem ta j'ech'el ti sti'emal scapemale, ti ta sjoybin ta sbajtical ti banomile, ti ta stsutsesbe sc'oplal ti jsa'muliletic ti oyic ta stojole.

¹⁰ Jech ti c'anale xchi'uc ti yan ti c'usitic ta xac' xojobal ta vinajele, ta xlic tubuc ti xojobale. C'alal naca to ta xloc' talel ti c'ac'ale, ta xlic ic'ubuc ti sate. Mi ja'uc xa ta xac' xojobal ti ue.

¹¹ Ti Diose xi ta xale: “Ta xlic jtsits ta j'ech'el ti jnaclejetic ta scoj ti smulique, ti buch'utic toj chopolic ta scoj ti smilvanejalique. Ta jtsutses ya'iic ta j'ech'el ti cajal xa'i sbaic yu'un ti stoyobbailique. Ta xcac' ta lo'il maxil ti buch'utic mu xa'i sbaique, ti pimunebic xchi'uc ti xpochanilique.

¹² Ta xc'ot ta pasel cu'un ti jutucajuc ti viniquetique, ti ja' oy to bu stac' tael ti lequil oro ta Ofire.

¹³ Va'i unbi, ti vinajele ta xlic nicuc. Ta xjel yavil ti banomil bu oye, ta scoj ti soquem xa ti jole, ti tilem xa ti sc'ac'al co'nton yu'un ti jech c'ac'al taje.

¹⁴ “Ti jnaclejetique, ta xc'ot ta stojolic ti nutsbilic jech c'u cha'al ti jchop o ta te'tical chije, mi co'ol s'elan chij ti tan puc ta xbat ti mu'yuc buch'u stsobune. Yu'un ta jujun tal ta sutic batel ta steclumalic. Ta xjatavic ech'el ta yosil sbanomilic.

¹⁵ Scotol ti buch'u ya'binoj sba ta xac' sba ta tsaquele, punyal xa xve' yu'un. Scotol ti buch'u ya'binoj sba ta xac' sba ta tsaquele, milel xa xa'i xcham xlaj.

¹⁶ Yiloj ta sba ta satic ti jis x'utbat ta lum ti yalab xnich'nabic ti biq'uitic toe. Ta xtambatic loq'uel ti c'usi oy ta snaique. Ta x'ilbajinbat ti yajnilique.

¹⁷ “Ti scontraique ta xlic yilic ti ta jliquesbe sjol ti lum medoetique, ti mu ja'uc batem yo'nton yu'un ti platae, ti mi ja'uc jutebuc ta xpich' yo'ntonic yu'un ti oroe.

¹⁸ Xjipte-jipte no'ox yalel yu'unic ta lum ti jva'lej viniquetic ta sventa ti yolob yu'unique, ti mu ja'uc jutebuc oy syail xc'uxul yo'ntonic yu'un ti ach' jvoq'uel ololetique, ti mi ja'uc xc'uxubaj yo'ntonic yu'un ti ololetique.

¹⁹ Ti Babilonia j'ac'-lequilal utsilal yu'un ti muc'tiquil lumetique, ti c'otem ta xch'alelic ti mu'yuc c'usi jech o ta xa'iic ti cajal toyolic xchi'uc ti caldeoetique, ta xc'ot ta stojol jech c'u cha'al ic'ot ta stojol ti Sodoma xchi'uc ti Gomorra ti c'alal laj jtubbe ti sc'oplalique.

²⁰ J'ech'el ta xc'ot ta pasel ti sts'ijlajan ta xcome. Mi ja'uc xa oy buch'u ta xnaqui. Ta xc'ot ta pasel ti mu'yuc ta xc'ot slaman sbaic ti árabeetic ti bu taje. Mi ja'uc xa ta slaman xchijic ti jq'uel-chijetic yo' ta xvay yu'unique.

²¹ Ti bu taje, ta xc'ot ta snail ch'en ti vetetique, ti naetic to ox yu'unique naca mutal bolom sbuset no'ox liquel. Ta xlic naijicuc ti j'anilajel-mute. Ta xc'ot ta stajineb ti te'tical tentsune.

²² Ta xc'ot ta svuetel jchop o ta oq'uil ti muc' ta naetic yu'unique. Ti c'upil sba yut naetic yu'unic to oxe, naca oq'uil xlamet. Jutuc xa sc'an xc'ot yorail ta tsutsel ti lum Babiloniae. Mu xa jaluc c'ac'al sc'an.”