Isaías 11 - Bible in Tzotzil de Chamula

Snitilul ti Isaie, ja' jun ajvalil ta xvul ta loq'uel ti yich'oj talel ti lamajem o'ntonale xchi'uc ti tuq'uil chapanele

¹ Ti ta xchumanil te' taje, ti ja' sc'oplal ti Isaie, ta xvul ta loq'uel sq'uelom, jun sq'uelom ti ta yi'bel to ta xpul talele.

² Mu xch'ac sba ti xcuxlejal Dios ta stojole. Ta x'ac'bat sbijil, snopbenal, spajesel sba, yipal yu'un, ta yojtiquinel ti c'usi leque, ta xi'tael ti Diose.

³ Ti stuque ma'uc ta xchapan c'op ti bu jech xa yilele, mi ja'uc ti naca xch'unel xa yu'un ti c'u s'elan ta xa'i ti lo'il a'yej ti jbel xa ye ta xchapel ti c'ope.

⁴ Ta stuq'uilal ta yutsilal, ta stic' sba ta xchapanel ti buch'utic mu sna'ic c'u s'elan ta spac ti sc'oplalique; ta stic' sba ta spojel ta xchapanbel sc'op ti c'usitic c'otem ta yu'unic ti me'un mu'nat ti oy ta lume. Ta yip sc'op ta stsits ti buch'u cajal ye sti' xa'i sbae, ti co'ol to s'elan jmoj te' ti xc'avlij ta xc'ote; ta yic'al no'ox ye ta xcham yu'un ti buch'u toj chopol xa'i sbae.

⁵ Yu'un co'ol s'elan sc'u' ti oy ta stojol ti lequil tuq'uil chapanele, ti melele.

⁶ Va'i un, ti oq'uile xchi'uc ti nene' chije, mu'yuc xa c'usi ta xalbe sbaic, jun xa yo'ntonic ta xcuxiic. Ti jti'oval bolome xchi'uc ti nene' tentsune, co'ol xa jmoj ta xcux yo'ntonic. Ti ch'in vacaxe xchi'uc ti leone, jun xa xlotetic ta xch'iic batel, jun xa yo'ntonic ta sbeiltasatic batel yu'un ti jun biq'uit olole.

⁷ Ti me' vacaxe xchi'uc ti me' osoe, lec ta xil sbaic, yu'un jun xa yo'nton xlotetic batel ti yalabic ta xcux yo'ntonique. Ti leone ta xc'ot ta pasel ta slo' yaxal jech c'u cha'al ti vacaxe.

⁸ Ti biq'uit olole xu' ta xtajin ta sti' snail ch'en ti chon sbiinoj cobrae; xu' ta stic' ochel sc'ob ti bu yac'oj stas ti chon sbiinoj viborae.

⁹ Ta scotol ti ch'ul vits cu'une, mu'yuc junuc ti oy c'usi chopol ta spasbe sbaique. Jech c'u cha'al ti vo' ta snojes ti muc' ta nabe, ja' jech ta xjam ba satilal ta yojtiquinel ti Dios ta scotol ti lume.

¹⁰ Ta yorail taje, ti sc'oplal sq'uelom xchumanil snitilul ti Isaie, ta xlic sva'an sba ti ta xc'ot ta senyail yu'un ti lume. Ta xlic sa'anan talel ti muc'tiquil lumetique, ti bu tiq'uile, jun yutsil ta j'ech'el.

Mu'yuc xa c'usi jech x'ech' o ta xa'iic ta sutic talel ti buch'utic tenbil loq'uique

¹¹ Ta yorail taje, ta xac' iluc xtoc smuc'ul stsatsal ti Diose. Ta xlic stsob talel ti scomelal slumale, yu'un ta xic' sutel talel ti buch'utic tiq'uilic ta lum Asiriae, ti tiq'uilic ta Egiptoe, ti tiq'uilic ta lum Patrose, ti tiq'uilic ta lum Etiopiae, ti tiq'uilic ta lum Elame, ti tiq'uilic ta lum Sinare, ti tiq'uilic ta lum Hamate, xchi'uc ta lumetic ti oy ta sti'il ti muc' ta nabe.

¹² Ta xac' iluc senyail ta stojol ti muc'tiquil lumetique, yu'un ta stsob talel ti israeletic ti loq'uic batel ta slumalique; ta xchanjotal to xchiquin banomil, ta stsob talel steclumaltac ti Judá ti tan puquique.

¹³ Ta xtub sc'oplal ti it'ix ta x'a'yivan ti Efraine, ti soquemal sjol ti Judae, ta xtub sc'oplal. Mu'yuc xa it'ix ta xa'i Judá ti Efraine, mi ja'uc xa soquem sjol ti Judá ta stojol ti Efraine.

¹⁴ Xchibalic xvoletic batel ta stuq'uil smaleb c'ac'al ta scontrainel ti filisteoetique, ti lamal ta xc'otic ta spate. Xchibalic ta spojbeic talel sc'ulejal ti jnaclejetic ti nacalic ta stuq'uil sloq'ueb c'ac'ale. Ti yip smuc'ul stsatsalique ta xc'ot ta Edom, ta Moab, ti ta x'och ta be yu'unic ti amonitaetique.

¹⁵ Ta xjambat sbeic yu'un Dios ta Tsajal Nab ti ta stoy ta toyol ti sc'ob ta stuq'uil ti uc'um Eufratese, ti xi'bal sba xjumet no'ox liquel ti ic' yu'une, ti ta spas ta vuc-ch'ac yoc ti uc'um yu'une, mi ja'uc ta sloc' xonobic ta xtuch'el jelavel.

¹⁶ C'alal ta xloq'uic talel ta Asiria ti c'u to yepal oy steclumal ti Diose, jamal jun muc' ta be ta staic jech c'u cha'al c'ot ta pasel ta stojol Israel ti c'alal loq'uic talel ta Egiptoe.