Hechos 4 - Bible in Tzotzil de Chamula

Ti Pedroe xchi'uc ti Juane oyic ta stojol ti jchapanvanejetique

¹ Ti Pedroe xchi'uc ti Juane yacal to ta xc'opoj ta stojol ti jnaclejetique, c'alal ja' o talic ti paleetique, ti banquilal yu'unic ti jchabiej ch'ulnae, xchi'uc ti saduceoetique.

² Capem tal ti sjolique, yu'un ti Pedroe xchi'uc ti Juane ta xalbe ya'i ti jnaclejetique, ta xcha'cuxi ti animaetic jech c'u cha'al cha'cuxi ti Jesuse.

³ Laj stsaquic batel. Ta scoj bat xa ti c'ac'ale, laj stiq'uic comel ta chuquel.

⁴ Ti buch'utic laj ya'iic ti c'u s'elan laj yal ti Pedroe, yepal c'ot ta yo'ntonic ta xch'unel. Yepal ti jch'unolajeletic naca viniquetic no'oxe, c'ot nopol vo'miluc (5,000).

⁵ Ta yoc'lomal laj stsob sbaic ta Jerusalén ti banquilaletic yu'un ti israeletique, ti moletic ich'bil ye sti'ique, xchi'uc ti jchanubtasvanejetic yu'un ti oy c'usi tsots albil sc'oplale.

⁶ Ti bu taje, tey oy ec ti Anas banquilal pale to oxe, ti Caifase, ti Juane, ti Alejandroe, scotol ti buch'utic ja' yuts' yalaltac ti banquilal paleetique.

⁷ Laj yalic mantal ti ic'baticuc talel ta stojolic ti Pedroe, ti Juane, ti laj sva'anic ta o'lol ti xi laj sjac'beique: —¿Buch'u ta sventa, buch'u laj yac'boxuc avabtelic ti jech ta xapasic le'e?

⁸ Ta sventa ti ventainbil yo'nton yu'un Ch'ul Espíritu ti Pedroe, xi laj yale: —Banquilal j'abteletic, moletic yu'un ti jlumaltique,

⁹ ti vi s'elan ta xajaq'uic ta sventa ti oy c'usi lec laj sta ti coxov ti cole,

¹⁰ jamal ta xcalboxuc ava'iic yo' j'ech'el xana'ic, yo' jech ta sna'ic scotol ti jchi'iltique. Ti vinic li' va'al ta sba ta sat scotole, col ta sventa ti Jesucristo liquem talel ta Nazaret ti Buch'u laj ajoc'anic ta curuse, ti cha'cuxesat yu'un ti Diose.

¹¹ Ti Jesuse, ja' ti jbej ton laj ajipic loq'uel ti vo'oxuc j'abteloxuque. Ja'uc tana le' une, ja' tun ta sliquebal ti nae.

¹² Mu'yuc xa yan bu ta tael ma' ti coltaele, yu'un mu'yuc laj sva'an yan Jcoltavanej ti Dios li' ta banomile. Ja' no'ox ta sventa Jesús ta jtatic ti coltaele.

¹³ Ti jchapanvanejetique laj yilic ti mu'yuc xi'el ta xa'iic c'alal ta xc'opojic ti Pedroe, ti Juane, xchi'uc ti laj yilic ti ja' viniquetic ti mu'yuc yich'ojic chanubtasele, ti mu'yuc c'usi sna'ic jutebuque. Ch'ayal c'ot yo'ntonic. Vul ta sjolic un, ja'ic ti buch'u jmoj to ox xanavic xchi'uc ti Jesuse.

¹⁴ Ma'uc no'ox un, ti vinic buch'u cole, jmoj va'al xchi'uc ti Pedroe xchi'uc ti Juane. Jech o xal ti jchapanvanejetique mu'yuc c'usi xu' ta stabeic ti smulique.

¹⁵ Laj staquic loq'uel ti bu vololic ta tsobleje. Xvulajetic xa liquel stuquic.

¹⁶ Xi laj yalbe sbaique: —¿C'usi ta xcutic ti viniquetic le'e? Ti jnaclejetic li' ta Jerusalene sna'ic lec scotolic ti laj xa yaq'uic iluc ti oy c'usi ch'ayal ta xc'ot o'ntonal yu'une. Mi ja'uc stac' jnac'tic.

¹⁷ Ja' lec, la' jsibtastic yo' jech mu x'epajic ti buch'utic ta xich'ic albel sc'oplal ti Jesuse.

¹⁸ Laj staic ta iq'uel xtoc ti tsots albatic ti mu xa xalbeic sc'oplal ti Jesuse.

¹⁹ Xi laj staq'uic ti Pedroe, ti Juane: —Jchi'iltac, nopo ava'iic lec, ¿mi ja' lec ta xil ta sba ta sat ti Diose ti ta jch'uncutic ti amantalique ti ja' mu jch'unbecutic smantal ti Diose?

²⁰ Ti vu'uncutique mi ja'uc xquicta jbacutic ta yalel ma' ti c'usi quilojcutique, ti c'usi ca'yiojcutique.

²¹ Coltaatic batel, manchuc mi laj yich'ic sibtasel yu'un ti jchapanvanejetique. Yu'un mu staic yo' ta stsitsic, yu'un scotol ti c'u yepal vololique ta xalbeic slequilal Dios ti c'usi c'ot ta pasele.

²² Ti c'u s'elan ch'ayal c'ot o'ntonal col ti vinique, x'ech' ta cha'vinic (40) jabil yich'oj.

Ti jch'unolajeletique ta sc'anic yip yo'ntonic ta stojol ti Diose

²³ C'alal colic batel ti Pedroe xchi'uc ti Juane, batic bu oy ti yan xchi'ilique. Laj yalbeic ya'i c'u s'elan albatic yu'un ti banquilal paleetique xchi'uc ti moletique.

²⁴ C'alal jech laj ya'iique, scotolic xi laj yalic ti c'opoj ti'inique: “Cajval, vo'ot Diosot laj apas ti vinajele, ti banomile, ti nabe, scotol ti c'usitic oye.

²⁵ Yu'un xachi laj aval ta sventa ti avajtunel David ti jambat ye sti' yu'un ti Ch'ul Espiritue: ‘Mu'yuc c'usi bal o ma' ti xvochvun ma' ti jnaclejetic ta sjoylej banomile. Mu'yuc c'usi bal o ma' ti oy c'usi ta snopique.

²⁶ Ti banquilal ajvaliletique xchi'uc ti its'inal ajvaliletic li' ta banomile, laj stsob sbaic yo' ta xiscontrainun ti vu'un Diosune xchi'uc ti Buch'u t'ujbil cu'une, ja' ti Cristoe.’

²⁷ “Yu'un ti Herodese xchi'uc ti Poncio Pilatoe j'ech'el laj stsob sbaic li' ta Jerusalene xchi'uc ti jyanlumetique, xchi'uc ti jchi'ilcutique ta scontrainel ti Ach'ul Nich'on Jesuse, ti laj ava'an ta Jcoltavaneje.

²⁸ Ti jech taje, ja' c'ot ta pasel yu'unic scotol jech c'u cha'al nopbil avu'un ta xc'ot ta pasele.

²⁹ Chajal ta aba ta asat tana un, Cajval, ti vi s'elan ta sibtasvanique. Ch'ul abolajan, ac'bo yip yo'nton ti avaj'abteltaque yo' mu ta xi'eluc ta xal ti ac'ope.

³⁰ Ta sventauc ti amuc'ul atsatsale, coleso ti jchameletique, ti ta xavac' iluc ti oy c'usitic ch'ayal ta xc'ot o'ntonal ta sventa ti Ach'ul Nich'on Jesuse.”

³¹ C'alal laj yo'ntonic ta c'opojel ti'inele, tsots nic ti bu stsoboj sbaic ti jch'unolajeletique. Scotol ventainbil c'otic yu'un ti Ch'ul Espiritue. Oy yip yo'ntonic ta yalel batel ti sc'op Diose.

Ta scomon-tunesic ti c'usi oy yu'unique

³² Scotol ti jch'unolajeletic ti mu albajuc yepalique, jmoj yo'ntonic, co'ol snopbenal yu'unic. Mu'yuc buch'u ta xal ti yu'un stuquic ti c'usi oy yu'unique. Yu'un ti c'usitic oy yu'unique, co'ol yu'un scotolic.

³³ Ti jcholc'opetique oy yip stsatsalic ta yalbel sc'oplal ti cha'cuxi ti Cajvaltic Jesuse. Yepal no'ox sva'anoj sba ti Dios ta stojolique.

³⁴ Mu'yuc buch'u junucal ta xich' svocolic, yu'un ti buch'utic oy yosilique, mi ja' ti snaique, ta xchonic. Ta xich'ic talel ti stojole.

³⁵ Ta xac'beic ta yoc ta sc'ob ti jcholc'opetique yo' jech ti stuquique ta xch'acbeic ti jch'unolajeletic ti buch'utic mu'yuc c'usi x'ayan yu'une.

³⁶ Jech laj spas ec jun levita vinic ti José sbie, ti voq'uem talel ta Chipre banomil ti joyobtabil ta nabe, ti laj sbiin yu'unic ti jcholc'opetique Bernabé, Jpat-o'ntonal, xi ti smelole.

³⁷ Ti vinic taje oy yosil ti laj xchone. Ti stojol ti yosile, laj yac' ta stojol ti jcholc'opetique.