Habacuc 2 - Bible in Tzotzil de Chamula

Ti c'u s'elan laj yac' iluc ti Dios ta stojol ti Habacuque

¹ Ta jts'ijan jba ta xchiquintael co'ol s'elan jech c'u cha'al ta spas ti jchabiej jq'uel-osil ti bu va'anbil comel ta yavile, yo' jech ta jna' ta xquil c'usi ta xistac'bun talel ti Dios ti jech ta jc'anbe ti partee.

² Jech ti Diose xi laj stac'bun talele: “Ts'ibao ta junuc pech-pech patbil lum ti c'usi ta xlic cac'bot avile, yo' jech xcholet no'ox ta q'uelel.

³ Ti c'usi la'ac'bat avile, ta to xjalij jutuc yo' ta xc'ot ta pasel, ja' no'ox un, mu ono'ox sts'elbuj. Ac'o mi jal ya'luc, ja' no'ox un, malao no'ox ava'i, ja' to xavil ti xyaquet no'ox ta xc'ot ta pasele.

⁴ Jech xats'iba li'e: Ti buch'utic toj chopolique, xu' no'ox yu'un stuquic ta xa'i sbaic, ja'uc ti buch'u oy stuq'uil sjol yo'ntonique, ta xch'i xc'opojic ti jech jun sjol yo'ntonic xchi'uc ti Diose.”

Xi s'elan ta xc'ot ta stojolic ti j'ilbajinvanejetique

⁵ Ti toyobba viniquetique, juteb ta yo'ntonic ti staicuc ti cajal c'otuc ti sc'oplalique, mi ja'uc xlubtsajic ta sa'el ac'o mi ta x'aq'ue ta vocol yu'un. Xc'anc'un ti mu xlamaj ta xa'iique, co'ol s'elan jech c'u cha'al ti muquinal ti naca xic' no'ox ti jlajel jtubele. Jech o xal un, naca xu'ninic no'ox ech'el ti jujun muc'tiquil lumetique.

⁶ Ja' yu'un un, scotol ti muc'tiquil lumetic ti u'ninatique, xi s'elan ta xlabanvanic ta sq'uejintael ti j'uninvanej-lume: “Mu xa ono'ox cha'bel ti vo'ot une, ti jech c'otemot ta jc'ulej yu'un ti c'usi ma'uc abainoj ta sventainele. ¿C'usi to ora ta xavicta aba ta sbusanbel aba ti ac'ulejal ti c'alal naca no'ox la'ac'bat ach'amune?”

⁷ Ja' to xava'i ti sbusus ono'ox vulel ta atojol ti buch'utic laj avac'be svocole, yu'un ta xlic vuluc xch'ulelic ti buch'utic laj avilbajin to oxe, t'anal ta xayictaot comel.

⁸ Ti muc'tiquil lume ta svol sbaic ta scontrainelot, ta xaspojbot batel ti c'usitic oy avu'un jech c'u cha'al laj apojbe talel ti c'usitic oy to ox yu'unique. Ta xac'bot atoj scotol ti amilvanejale, ti c'usitic chopol laj apas ta steclumalique, ti laj acontrain ti lum xchi'uc ti jnaclejetic yu'une.

⁹ Mu xa ono'ox cha'belucot un, ti laj abusan ta ana ti c'usitic elc'anbil avu'une, yo' jech ta xapoj aba avaloj yu'un ti c'usitic xi'bal sba ta xvul ta loq'uele.

¹⁰ Ti jech taj une, toj q'uexlal sba ta xc'ot ti anae; laj atub ac'oplal atuc ti jech laj atubbe sc'oplal ti epal lumetique.

¹¹ Ja' jech xtoc ti tonetic yu'un ti moquetique xchi'uc ti ts'am-te'etique, ta x'avanic ta scontrainelot.

¹² Mu xa ono'ox cha'belucot un, ti yacalot ta sva'anel ti jteclume, ti ja' ta xava'an o xchi'uc ti c'usitic chopol laj apase, xchi'uc ti ilbajinvaneje.

¹³ Ti Dios ti scotol xu' yu'une, mu'yuc c'usi xtun o ta xc'ot yu'un ti avabtel ti laj apich' ti avoc ac'ob yu'une; scotol ti avabtele ta xlilij ta c'oc'.

¹⁴ Ta x'ojtiquij, ta xpuc ta sjunlej banomil yutsilal slequilal ti Diose jech c'u cha'al junuc vo' ti ta xnoj yu'un ti muc' ta nabe.

¹⁵ Mu xa ono'ox cha'belucot un, ti ta xayacubtas ti alac'natac ti capal ta jtos o momol ti vino ta xavac'bee, yo' jech ta xapech' ta teq'uel ta yelovtael ti jech t'anal avu'une.

¹⁶ Ti avich'el ta muc' ti avaloje, ta xa'ac'at ta q'uexlal yu'un. Ti Diose ta xac'bot jbisuc uch'ubajel ti ja' ta svinajes ti chopol avo'ntone, ti pech'bil ta teq'uel ta xc'ot ti alequilal avutsilale.

¹⁷ Ti jech laj avilbajin ti vits Libanoe, ta xjoybij ta avajcontra. Ta xac'bot ava'i xi'el ti laj amilbe ti chon bolometic yu'une. Ti jech taje, ja' ta xc'ot ta atojol ti ilbajinvanej ti laj apas ti ta jteclume, ti laj acontrain ti lume xchi'uc ti jnaclejetic yu'une.

¹⁸ ¿Mi yu'un oy to c'usi xtun o ti c'usitic c'upil sba loc'tabil ti c'alal meltsanbil yu'un ti vinique? ¿Mi yu'un oy c'usi xtun o ti c'usitic loc'tabil c'alal ja' no'ox ta x'ac'van ta jutc'ope? Mu stac' xc'opoj ti c'usitic loc'tabile; ¿c'usi xavut un cha'e, ti xu' xapat avo'nton ta stojolic c'alal naca no'ox meltsanbil yu'un ti viniquetique?

¹⁹ Mu xa ono'ox cha'belucot un, ti ta xavalbe ya'i ti c'usi meltsanbil ta te' ti ac'o julavuque, ti jbej ton xtoc ti mu sna' xc'opoje, ti ac'o sva'an stec'an sbae. ¿Mi yu'un xu' yu'unic ta xchanubtasvanic ec? Mi ja'uc, yu'un mi ja'uc cuxulic ac'o mi bonbilic lec ta oro, ta plata xtoc.

²⁰ Ja'uc ti Diose oy ta xch'ulna: scotoluc banomil ts'ijlicuc ta stojol.