Génesis 49 - Bible in Tzotzil de Chamula

Slajeb slo'il ya'yej ti Jacobe

¹ Ti Jacobe laj staan talel ta iq'uel ti xnich'nabe, ti xi laj yalbe xtoque: “Nopajanic talel li'e, yu'un ta xcalboxuc ava'iic ti xi s'elan oy c'usi ta xc'ot ta atojolic ta to xtale:

² “Nopajanic ta ya'yiel c'usi ta xich' alel, xnich'nabtac Jacob. Ts'et chiquintao ava'iic lec c'usi ta xal ti atotic Israele.

³ “Ti vo'ote, Rubén, sba jnich'onot, sliqueb jts'unubalot, sba jq'uexolot, na'bil ti vo'ot cajal ac'oplale, ti vo'ot ta xatsob scotol c'usi oy cu'une.

⁴ Avi tana le' une, laj c'op ma' ti na'bil vo'ot cajal ac'oplale, yu'un co'ol a'elan jun uc'um ti mu stac' pajesel ti xi s'elan laj apase: yu'un laj aq'uelbe smelol ti jteme, lavay xchi'uc ti jts'acal ajnile.

⁵ “Yan ti Simeone xchi'uc ti Levie, ti xchi'il sbaic ta voq'uele; ja' sbelinoj sc'obic ta ilbajinvanej xchi'uc ti yabtejebique.

⁶ Mi ja'uc jc'an xbat jcap jba ta tsoblej bu ta stsob sbaic, yu'un c'alal capem ti sjolique, laj smilic ti jnaclejetique. Yu'un mu'yuc xch'ulelic ti c'usi laj spasique, yu'un naca sc'asbeic no'ox yacan ti tot vacaxetic ta j'ech'ele.

⁷ Cuxul xa jti'oval, melel, yu'un ja' cuxul jti'oval c'otic ti jech mu ts'icbaj c'usi ta spasic ta sti'emal yo'ntonique. Yu'un ta xal ti Diose, tan puc ta xabatic yu'un ta sjunul lum Israel.

⁸ “Ti vo'ote, Judá, toj lec ac'oplal yu'un ti achi'iltac ta voq'uele. Ti avajcontrae ta xatsal, ti achi'iltac ta voq'uele ta xayich'ic ta muc'.

⁹ Ti vo'ote, cuni nich'on Judá, co'ol a'elan jech c'u cha'al ch'in jti'oval león ti xi s'elan ta spas c'alal ta x'ech' yo'nton ta sti'el ti sve'ele: xlubet xa batel, xba spatan sba ta lumtic jech c'u cha'al muc' ta jti'oval león. ¿Buch'u la xu' yu'un ta xnopaj ta yilbajinel?

¹⁰ Mu'yuc buch'u xu' xpojbat yabtel ti Judá yich'oje, mi ja'uc xpoj yu'unic ti svaxton oy ta sc'obe, ja' to mi vul ta loq'uel yajval stuc ti vaxtone, ti ta xch'unbat smantal yu'un scotol ti jteclume.

¹¹ Taje, ja' ti buch'u ta xchuc yuni burro ta yut uvatique, ja' ti buch'u caj tsacal xa'i sbae ti mu ta vocoluc ta xchuc' ta vino sliquil ti sc'u'e, ja' ti pits'bil ya'lel uvae.

¹² Ja' ti buch'u x'ech' to ic' ti sbec' sate, ja' mu sta ti vinoe; jun saquil ti stanal yee, ja' mu sta saquil ti chu' vacaxe.

¹³ “Ti Zabulone ta xbat nacluc ta ti' nab bu ta xloc' ta x'och ti barcoe, c'alal to Sidón ta xc'ot sts'aquil ti yosile.

¹⁴ “Ti Isacare co'ol s'elan jech c'u cha'al jcuch-icatsil chon bolom ta xvay bu ti sve'ebe.

¹⁵ C'alal laj yil lec ti jteclume, ti jun yutsil laj ya'i ti ta xcux yo'ntone, mu'yuc c'usi laj yal c'alal ta x'ac'bat xcuch ti yicatse, yu'un sjunul yo'nton laj yac' sba ta mosovinel.

¹⁶ “Ti Dane ta spas ta mantal ti xchi'iltaque, ta xc'ot jech c'u cha'al jvoc' snitilul ti Israele.

¹⁷ Ti Dane co'ol s'elan jech c'u cha'al jti'oval chon ti yac'oj sba ta ti' bee, yo' jech ta sti'be yoc ti ca'e, yo' jech ta xbaj ta lum yu'un ti yajvale.

¹⁸ “Cajval, yacalun ta smalael ti jpojel avu'une.

¹⁹ “Ti Gade ta xich' nutsel yu'un jvoc' soldadoetic. Ja' no'ox un, ta ts'acal to, ta snuts batel ec.

²⁰ “Ti Asere ep ta sta sve'el, yu'un jun yutsil sve'elic ti ajvaliletic ta xac'bee.

²¹ “Ti Neftalie co'ol s'elan jech c'u cha'al junuc te'tical chij ti colem ta xanave, ti jun yutsiquil ti yalabe.

²² “Ti Josee co'ol s'elan jech c'u cha'al jtec' te' teq'uel ta ti' vo' ep ta xac' ti sate, ti sc'obtaque ta slim sba jelavel ta yan banomil.

²³ Mu lecuc x'ilat yu'un ti j'ac'-yolobetique, ta xac'beic yolob, mu ono'ox ch'an xutic, ta ono'ox xutilanic, xti'et sjolic ta stojol.

²⁴ Ja' no'ox un, ti Josee, tsots yoc sc'ob, jun yo'nton stsacoj ti syolobe. Coliyal ti muc'ul Dios yu'un ti Jacobe. Coliyal ti banquilal jchabivaneje, ti jpojvanej yu'un ti Israele.

²⁵ Coliyal ti Dios yu'un atote, ti ja' ta scoltaote. Coliyal ti Dios scotol xu' yu'une, ta sva'an sba ta atojol. Ta xac'bot xch'ul lequilal ta xlic talel ta vinajel, ti xch'ul lequilal ta xlic talel ta nabe, ti xch'ul lequilal ta yepajesel ti avalab anich'nabe, xchi'uc ti chon bolometic avu'une.

²⁶ Ep laj sts'uiltasot ti atote, ja' mu sta laj sts'uiltasun ti jtot jme'cutique. Mu'yuc spajeb ti ts'uiltasel laj avich'e, yu'un lat'ujat loq'uel ta stojol ti achi'iltac ta voq'uele.

²⁷ “Ti Benjamine, co'ol s'elan jech c'u cha'al junuc jti'oval oq'uil, ta sliques ta sob, yich'oj o sjunul c'ac'al ta sti' ti c'usi laj sta ta nutsele.”

²⁸ Taje, ja' sc'oplal ti lajcha'chop snitilul Israele. Ja' jech albatic ti nich'nabiletic yu'un ti stotic ti c'alal ts'uiltasatic ta jujun tale.

Cham ti Jacobe

²⁹ Oy jun c'ac'al un, ti Jacobe xi tsots sc'oplal laj yalbe ya'i ti xnich'nabe: “Ta xa xicham xca'i. Muquicun me jmoj xchi'uc ti jtot jme'tac ta muquinal ta jombil ton oy ta yosil ti Efrone, ti hitita vinique.

³⁰ Ti muquinal taje, ta Canaán banomil to oy, ti jombil ton xcaltic oy ta Macpelae, ta yeloval xtoc ti Mamree. Ti muquinal taje, ja' ti laj smanbe jmoj xchi'uc yosilal Efrón ti Abrahame yo' ta smuc sbaic xchi'uc ti snitilultaque.

³¹ Yu'un ti bu taje, laj yich' muquel ti Abrahame, ti Sara ti ja' yajnile, ti Isaaque, xchi'uc ti Rebeca ti ja' yajnile, ti bu mucul xtoc ti Leae.

³² Ti osile, xchi'uc ti muquinale, ja' laj xchonic ti hititaetique.”

³³ C'alal laj yo'nton va'i s'elan laj yalbe xnich'nabtac ti Jacobe, laj smetsan sba un, cham.