Génesis 48 - Bible in Tzotzil de Chamula

Ti Jacobe ta xac'be yich' slequilal Dios ti Efraine xchi'uc ti Manasese

¹ Mu xa jaluc c'ac'al bat, tal albatuc ti Josee ip ta xa'i ti stote. Ja' yu'un un, ti Josee bat sq'uel, xchi'uc yic'oj batel ti cha'vo' xnich'nabe, ti Manasese xchi'uc ti Efraine.

² C'alal albat ya'i ti Jacob tal q'uelatuc yu'un José ti ja' xnich'one, laj to yac'be yipal, lic chotiuc ta stem.

³ Xi laj yalbe ti Josee: —Ti Dios scotol xu' yu'une laj sva'an sba ta jtojol. Laj yac' sba iluc ta jteclum Luz ti oy ta Canaán banomil

⁴ ti xi laj yalbune: “A'yio ava'i, ta xcac'bot ep anich'nab. Ja' jech xtoc ti anitilultaque ta x'epajic. Ta xc'otic ta jun muc' ta lum. Ta xcac'be yich'ic ti banomil li'e. Ta xc'ot ta yu'unic sbatel osil.”

⁵ Ja' yu'un un, ti anich'on Efraine xchi'uc ti Manasese, ti laj voq'uicuc li' ta Egipto c'alal mu'yuc to ox bu ta jtsob jbatic ta jteclum li'e, ja' jmamobtac. Mu yanuc bu liquic talel. Ja' jnich'nabtac jech c'u cha'al ti Rubene xchi'uc ti Simeone.

⁶ Ti anich'nab ts'acal ta xvoq'uic liquele, ja' avu'un xa ti xchi'il sbaic ta voq'uel ti Efraine xchi'uc ti Manasese. Jmoj ta xich'ic ti xrextoique.

⁷ C'alal lisut talel ta Padán-arame, cham ti ame' Raquel c'alal nopol xa sc'an xic'otcutic ta Efrata ti oy ta Canaane. Laj jmuc xtoc ta sbelel Efrata ti Belén sbi avi tanae.

⁸ Ti Israele laj yil ti tey oyic xnich'nab ti Josee. Xi lic sjaq'ue: —Li'e, ¿buch'uic le' une?

⁹ Xi laj stac' ti Josee: —Ja' jnich'nabtac laj yac'bun Dios li' ta Egiptoe. Ja' yu'un un, xi albat yu'un ti stote: —Avocoluc, nopajeso talel yo' ta jts'uiltas.

¹⁰ Ti Israele mol xa. Mu xa xc'ot lec ti sate. Mu xa x'ojtiquinvan lec. Jech ti Josee laj snopajes batel ti xnich'nab ta stojol ti stote. Laj smey, laj sbuts' ti smamobtaque.

¹¹ Ts'acal to un, xi laj yalbe ti Josee: —Mi ja'uc laj jnop ti ta to xquilbot asate. Ac'o mi jech un, yu'un un ti Diose laj to yac'bun quil ta jsat ti anich'nabe.

¹² Ti Josee laj snit loq'uel ti ololetic quicajtic ta sjol yoc ti stote. Snupilan xa banomil laj snijan sba ta stojol.

¹³ Ja' yu'un un, laj snitbe liquel sc'ob ti xchibalique. Ti Efraine ta sbats'i c'ob laj snit liquel. Yan ti Manasese ta sts'et c'ob laj snit liquel. Laj snopajes ta stojol ti stote. Ti Efraine ta stuq'uil sts'et c'ob Israel c'ot. Yan ti Manasese ja' ta stuq'uil sbats'i c'ob c'ot.

¹⁴ Ja' no'ox un, c'alal laj xach' batel sc'ob ti Israele, ta curusal laj yac' ti sc'obe. Ti sbats'i c'obe c'ot ta sjol Efraín ti its'inale. Yan ti sts'et c'obe c'ot ta sjol Manases ac'o mi ja' banquilal.

¹⁵ Va'i un, xi s'elan yich' c'anbel slequilal ti Josee: “Ti Dios ti Buch'u laj yich'ic ta muc' ti Abrahame, ti Isaac ti jtot jme' laj ech'icuque, ti Dios taje, ja' ti Buch'u laj xchabiun talel c'alal livoq'ue,

¹⁶ ti Ánjel buch'u laj spojun ta scotol ti c'usi chopole, ac'o sva'an sba ta stojol ti queremetic li'e. Ta sventa ti stuquique, c'otuc ta pasel ti na'bil ta xic'ote, ti na'bil c'otuc ti jmuc'totcutic Abrahame, xchi'uc ti jtot Isaaque. C'otuc ta pasel epajuc ti xnich'nabique, ti yepaluc voleticuc ta banomile.”

¹⁷ Ti Josee mu lecuc laj ya'i jech laj scajan sbats'i c'ob ti stot ta sjol ti Efraine. Ja' yu'un un, laj stsacbe loq'uel sc'ob stot cajal ta sjol ti Efraine, ti ac'o scajanbe ta sjol ti Manasese

¹⁸ c'alal ja' o xi xvulvunet liquele: —Mu jechuc le'e, tot. Mu jechuc le'e. Ja' banquilal li'e. Ac'o ti abats'i c'ob ta sjole.

¹⁹ Ja' no'ox un, ti stote mu'yuc laj xch'un ti jech ta x'albate. C'ajomal no'ox xi laj staq'ue: —¡Jna'oj xa, nich'on, jna'oj xa! Ti stuque ta x'epajic. Ta spasic ta jun muc' ta lum ti tsots sc'oplal ta xc'otique. Ac'o mi jech un, ja' no'ox un, ja' jelavem to sc'oplal ta xc'ot ti yits'ine. Ti snitilultaque ta spasic ta epal muc'tiquil lumetic.

²⁰ Ja' o sc'ac'alil xi laj yal c'alal ts'uiltasvan ti Jacobe: —Ta stunesic abi ti jteclum Israel ti xi ta xalic c'alal ta sts'uiltasvanique: ‘Ac'o spas jech ti Dios ta atojolic ec jech c'u cha'al pasbatic ti Efraine xchi'uc ti Manasese.’ Jech laj spas Israel ti laj scajan sc'ob ta stojol Efraín c'alal mu'yuc to ox scajanoj sc'ob ta stojol ti Manasese.

²¹ Ts'acal to un, xi albat ti Josee: —A'yio ava'i, yu'un ta xa xicham. Ja' no'ox un, ti Diose ta xchi'inoxuc. Ja' jech xtoc ta xac' sutanic batel bu oy sbanomilic ti amolmuc'totic ta vo'nee.

²² Yu'un ti vo'ote, xi s'elan x'ech' to laj cac'bot avich'e, ja' mu sta laj yich' ti achi'il ta voq'uele: Yu'un ja' ta xcac'bot avich' sbanomil Siquem ti ta letovajel cuch cu'un ta spojbel ti amorreoetique.