Génesis 29 - Bible in Tzotzil de Chamula

Ti Jacobe c'ot ta Harán

¹ Ti Jacobe laj stam batel sbe, bat ta banomil ti oy ta sloq'ueb c'ac'ale.

² Ti ta osiltique, laj yil oy jun joc' ti lamal ta xcux yo'ntonic oxch'ac chijetic ta sts'ele. Ta xtal yuch'ic vo' ti chon bolometic bu taje. Macal ta jun muc' ta pech-pech ton ti sti'e.

³ Yu'un c'alal ta stsob sba talel scotol ti chijetic teye, jech ti jq'uel-chijetique ta sloq'uesic ti ton smacoj ti joq'ue yo' jech ta xac'beic yuch' vo' ti xchijique. Mi laj une, ta smaquic comel lec sti' ti joq'ue

⁴ Ti Jacobe xi laj sjac'be ti jq'uel-chijetique: —¿Bu liquemoxuc talel, jchi'iltac? —Liquemuncutic talel ta Harán —xiic.

⁵ Xi laj xcha'jac' ti Jacobe: —¿Mi xavojtiquinic ti Labane, xnich'on ti Nacore? —Xcojtiquincutic —xiic.

⁶ Xi lic sjac'olan ti Jacobe: —¿Mi jech to oyic xana'? Xi laj staq'uic ti jq'uel-chijetique: —Lec oy ma' ti Labane. Q'uelo avil, le' xtal xchi'uc xchij ti Raquel ti ja' yantsil nich'one.

⁷ Va'i un, ti Jacobe xi laj yale: —Toyol to c'ac'al. Sob to mi ta xich' xa lapel ti chijetique. ¿C'u cha'al mu xavac'beic xch'a vo' yuch' yo' jech xu' to chba avaq'uic ve'uc?

⁸ Ti stuquique xi laj staq'uique: —Mu to stac'. Yo' xu' ta xcac'becutic vo' yuch' ti chijetique, yu'un ba'yel ta stsob sba talel scotol ti chijetique yo' jech scotolic ta sloq'uesbeic smac joc' ti jq'uel-chijetique.

⁹ C'alal jech yacal ta xlo'ilajique, ja' o vul xchi'uc xchijtac stot ti Raquele, yu'un ja' jq'uel-chij.

¹⁰ Va'i un, ti Jacob c'alal laj yil ti chijetic yu'un ti Labán ti ja' sjuntote, jech ti stuque, ta ora no'ox bat sloq'ues ti ton smacoj ti joq'ue. Lic yac'be yuch' vo' ti chijetique.

¹¹ Laj un, buts' xut xch'a ti c'alal bat xchi'in ta lo'ile, x'oc'olet xa liquel.

¹² C'alal laj xchap lec ti ja' squerem ol Rebeca ti Jacobe, ti ja' sjun nich'on ti Labane, jech ti Raquele bat ta anil, ba yalbe ya'i ti stote.

¹³ Ti c'alal laj ya'i Labán sc'oplal ti Jacobe, squerem ol ti xchi'il ta voq'uele, loc' batel ta anil. Bat snup talel ta be. Laj smey. Sbuts' xch'a c'otel lic xchi'in ta lo'il, laj yic' batel ta sna. Laj taj une, ti Jacobe lic xchap scotol ti c'usi c'ot ta pasele.

¹⁴ Va'i un, ti Labane xi lic yale: “Ta melel ti vo'ote, jun ti jch'ich'eltique.” Jech ti Jacobe, jun u com ta stojol ti Labane.

Ti Jacobe ta stoj ta abtel ti Raquele xchi'uc ti Leae

¹⁵ C'alal ech' va'i sjalile, ja' yu'un un, ti Labane xi laj yale: —Ac'o mi solel cuts' calal jbatic unbi, mu xloc' venta ti ch'abal jutebuc ta xapas canal ti jech ta xa'abtej cu'une. Ja' lec albun ca'i c'u yepal ta xac'an ti atojol cac'tique.

¹⁶ Va'i un, ti Labane xi s'elan oy chib yantsil nich'on: Ti vixile, Lea ti sbie. Yan ti muquile, Raquel ti sbie.

¹⁷ Yu'un ti Leae, jelel jutuc yutsil ti sbec' sate. Ja'uc ti Raquele, c'upil sba sat yelov ta sjunul ti spat xocone.

¹⁸ Jech ti Jacobe, ic'bil c'ot yo'nton yu'un ti Raquele. Jech o xal xi laj staq'ue: —Ta sventa ti amuquil tseb Raquele, ta xi'abtej vucub jabil ta atojol —xi.

¹⁹ Va'i un, ti Labane xi laj staq'ue: —Ja' lec vo'ot ta xcac'bot. Altic mi ta xic' yan. Coman li' ta jtojole.

²⁰ Ja' yu'un un, ti Jacobe abtej vucub jabil ta sventa ti Raquele. Ti stuque mu jaluc laj ya'i, yu'un juteb ta yo'nton.

²¹ C'alal laj sta ti vucub jabile, ti Jacobe xi laj yalbe ya'i ti Labane: —Ac'bun ti cajnile, yu'un ta xquic' xa jbacutic. Yu'un ts'aqui xa ti sc'ac'alil c'u sjalil cac'oj que ta xi'abtej ta sventae.

²² Ja' yu'un un, ti Labane laj stsob talel ti yuts' yalaltaque yo' jech ta sq'uelic ti lecomajel ta xich' pasele.

²³ Ja'uc ta ac'ubaltic une, ja' laj yac' ti Leae. Jech ti Jacobe vay xchi'uc.

²⁴ Ja' jech xtoc ti Labane laj yac'be jun smosov ti Leae, ti Zilpa sbie yo' jech ta xc'ot ta yajtunel.

²⁵ C'alal sacub ta yoc'omale, jech ti Jacobe laj yojtiquin ja' vay xchi'uc ti Leae. Jech o xal un, xi bat svul ti Labane: —¿C'u cha'al jech laj apasbun? ¿C'u cha'al laj alo'laun? ¿Mi mu ja'uc li'abtej avu'un ta sventa ti Raquele?

²⁶ Va'i un, ti Labane xi laj staq'ue: —Ti li'e, mu jechuc jtalelcutic ba'yel ta xmalij ti muquile.

²⁷ Li'e, c'otuc xch'a ta pasel avu'un xemunail ti lecomajel xchi'uc ti Leae. Va'i un, mi laj une, ta xlic cac'bot ti Raquele mi ta xavac' ave ati' ta xa'abtej yan vucub jabil ta jtojole.

²⁸ Jech ti Jacobe, toj c'otel ta yo'nton. C'alal tsuts yu'un xemunail ti lecomajel xchi'uc ti Leae, jech ti Labane laj yac'be yic' ti Raquele.

²⁹ Va'i un, ti Labane laj yac'be jun smosov ti Raquel ti Bilha sbie yo' jech ta xtun yu'un.

³⁰ Ti Jacobe laj yic' sbaic xchi'uc ti Raquele. Ic'bat yo'nton ta j'ech'el, ja' peq'uel c'ot sc'oplal yu'un ti Leae. Mu'yuc xa ta alel yu'un mi ta to x'aq'ue abtejuc vucub jabil yu'un ti Labane.

Xnich'nabtac ti Jacobe

³¹ C'alal laj yil Dios bajbil ti Lea yu'un ti Jacobe, laj spas ta stojol ti ac'o ayanuc ti yalabe. Yan ti Raquele c'ot yu'un ta jun machero ants.

³² Ja'uc ti Leae lic xchi'in yol. Ayan jun squerem, Rubén laj yac'be sbi, yu'un xi laj yale: “Ti Diose laj yil ti oyun ta vul-o'ntone. Jech o xal avi tana li' une, yal to jc'uxubinel yu'un ti jmalale.”

³³ Ts'acal to ti Leae ayan yan squerem, Simeón laj yac'be sbi, yu'un xi laj yale: “Ti Diose laj yil ti bajbilune. Jech o xal laj yac'bun jun jquerem xtoc.”

³⁴ Laj to no'ox yil jun squerem xtoc, Leví laj yac'be sbie, yu'un xi laj yale: “Avi tana li' une, mu xa xt'ol liquel ta jtojol ti jmalale, yu'un oy xa oxib squerem cu'un.”

³⁵ Ti Lea xtoque laj to yil jun squerem, Judá laj yac'be sbi, yu'un xi laj yale: “Avi tana li'e, ta jlequil-c'opta ti Diose.” Laj ti va'i yepal taj une, paj xi ta alajel yu'un.