Génesis 18 - Bible in Tzotzil de Chamula

Ti Abrahame ta x'albat yu'un ti Diose ti ta x'ac'bat jun xnich'one

¹ Nopol nan o'lol c'ac'al, ti Diose laj yac' sba iluc ta stojol Abraham c'alal chotol ta xcux yo'nton ta sti' yaxibalna ti oy ta tulantic yu'un ti Mamree.

² Ti Abrahame laj stoy batel sat, ja' to laj yil tey xa va'ajtic talel oxib viniquetic. Ti jech laj yile, va'i batel ta anil ta snupel ta be, ti snupilan xa banomil laj spatan sba ta lume.

³ Va'i un, xi laj yale: —Yojtot, avocoluc, mu to xabat ta anil.

⁴ Yu'un mi xu' to ta xajalijic cu'une, ta xcani c'an talel jutebuc vo' yo' xu' ta xapoc ti avacanique, xu' xacux jliqueluc ta squeoval te' mi laje.

⁵ Ti jech la'ech'ic ta sna ti avajtunele, xba quich'boxuc talel jutebuc ave'elic yo' jech mu xalubtsajic ta be ti bu ta xabatique. —Jechuc, lec oy —xi laj staq'uique.

⁶ Ti Abrahame och batel ta yaxibalna, xi laj yalbe ti Sarae: —Soban ta anil. Biso jtobuc ta sbis juch'bil trigo ti lec nine. Meltsano jun chibuc pan.

⁷ Ts'acal to un, ti Abrahame bat ta anil bu oy ti scorral xvacaxe. Laj st'uj jcot ch'iom tot vacax ti lec jubeme. Laj yac'be jun chib smosovtac yo' jech ta smeltsanic ta anil ti ve'lile.

⁸ Ma'uc no'ox vacax laj yac' ti Abrahame. Laj yac' chu' vacax xtoc ti lec tote. C'alal jech yacal ta xve'ic ta yolon te' ti jvu'laletique, jech ti Abrahame smalaoj ti c'usi ta to sc'anique.

⁹ C'alal laj yo'ntonic ta ve'el ti jvu'laletique, xi laj sjac'beic ti Abrahame: —¿Bu oy ti avajnil Sarae? —Tiq'uil ta yut sna —xi laj stac' ti Abrahame.

¹⁰ Oy jun yu'unic xi laj yale: —Ta xtal jvu'lanot li' c'alal junabie. Ti jech ora taje, ta sta jun squerem ol ti avajnil Sarae. Jech ti Sarae ts'etel xchiquin ta xa'i ta ochebal yut sna ti va'i s'elan ta xlo'ilajic ti Abraham xchi'uc ti jvu'laletique.

¹¹ Ti Abrahame xchi'uc ti Sarae, me'el molic xa. Yu'un ti Sarae, ech' xa yorail ta yilel ti ue.

¹² Ti Sarae mu'yuc sts'ic yu'un ti stse'eje. Yu'un xi laj snope: “¿Mi yu'un ta to la xqueremaj co'ntoncutic ti c'alal me'el moluncutic xa xchi'uc ti jmalale?”

¹³ Ja' no'ox un, xi albat yu'un Dios ti Abrahame: —¿C'u cha'al ta stse'in ti Sarae? ¿Mi yu'un mu xch'un ti xu' to ta x'alaj ti jech yayil xae?

¹⁴ ¿Mi yu'un la oy c'usi tsots ta xa'i ti mu xc'ot ta pasel yu'un ti Diose? Ta x'ech' jvu'lanot li' ta yan jabile. Va'i un, ti Sarae ta sta jun squerem ol.

¹⁵ Xi' ti Sara c'alal jech laj ya'ie. Sc'an xa ox ta smuc sba ya'i. Jech o xal xi laj yale: —Ali mu'yuc xitse'in une. —Jna' lec ti latse'ine —xi tac'bat yu'un ti Diose.

Ti Abrahame oy c'usi ta sc'anbe Dios ta sventa ti Sodomae

¹⁶ Ts'acal to un, ti jvu'laletique lic va'iicuc, laj stam batel sbeic c'alal to jteclum Sodoma. Va'i un, ti Abrahame xchi'inoj batel, ba sloq'ues comel ta be.

¹⁷ Ti Diose xi laj snope: “Sc'an jamal ta xcalbe ya'i ti Abraham c'usi ta jpase.

¹⁸ Yu'un ti stuque ta xc'ot ta totil yu'un ti jun muc' ta lume, xchi'uc xi'bil. Yu'un laj calbe ya'i ja' ta sventa stuc ta sc'upinic c'uxubinel cu'un scotol ti muc'tic lumetic oy ta sbejel banomile.

¹⁹ Ti stuque, laj xa jt'uj yo' jech ta xchanubtas ti xnich'nabtaque, xchi'uc ti snitilultaque, ac'o xch'unic c'u s'elan ti chanubtasel ta xcale, ti lecuc tuc'uc scotol c'usi ta spasique, yo' jech ta xc'ot ta pasel cu'un ti c'usi caloje.”

²⁰ Va'i un, xi albat yu'un ti Diose: —Ti jnaclejetic ta jteclum Sodomae xchi'uc ta jteclum Gomorrae, puc xa sc'oplalic ti chopol ti c'usi ta spasique, ti mu xa ts'icbaj ti smulique.

²¹ Ja' yu'un avie, ta xibat yo' jech chbat jq'uel mi melel tsots ti smulic jech c'u cha'al li'albate, ja' to jech ta jch'un.

²² Loq'uic batel ti chib jvu'laletique. Batic ta jteclum Sodoma. Yan ti Diose com xchi'uc ti Abrahame.

²³ Jech ti stuque nopaj batel ti xi laj sjac'bee: —¿Mi yu'un jmoj capal ta xatubbe sts'unubalic ti buch'utic ch'abal smulic xchi'uc ti buch'utic jelavem smul scolo'ique?

²⁴ Ati oyuc quic lajunebuc yoxvinic (50) ta vo' ta xata ti ch'abal smulic oyic ta jteclume, mi ja' jech yepal taje, ¿mi ta xatub ti jteclume? ¿Mi mu xach'aybe to smulic ta sventa ti lajuneb yoxvinic ta vo'e?

²⁵ Mu nan jechuc ta xapas muts'ul sat ta xatubbe sc'oplal jmoj xchi'uc ti buch'u oy smule. Mu stac' ma' ti jech ta xapas taj une. Yu'un ti vo'ote, muc'ul jchapanvanejot yu'un sjunlej ti banomile, ¿mi ch'abal xa ti pojel une?

²⁶ Va'i un, xi tac'bat yu'un ti Diose: —Ti mi oy lajuneb yoxvinic (50) ta vo' ta jta ti ch'abal smul ti ta jteclum Sodomae, ta sventa ti jech yepal taje, ta staic ti ta jts'icbe scotolic c'u yepal nacalic ti bu taje.

²⁷ Ti Abrahame xi laj xcha'ale: —Mu soc avo'nton cu'un ti jech toj ven xic'opoje, yu'un ti vo'ote, Diosot. Ja'uc ti vu'une, uni vinicun no'ox.

²⁸ Ati mi sc'an to vo'ob ta lajuneb yoxvinic (45) ta vo' ta xata ch'abal ti smulique, ¿mi ta xatubbe scotol sts'unubal ti jteclum mi ja' no'ox vo'ob sc'ane? Ti Diose xi laj staq'ue: —Ti mi ja' no'ox vo'ob ta lajuneb yoxvinic (45) sc'an ti ch'abal smulique, ch'abal ta jtubbe ti sts'unubalique.

²⁹ —¿C'usi ta xapas mi ja' no'ox cha'vinic (40) ta vo' ta xata ch'abal ti smulique? —xi laj sjaq'uilan ti Abrahame. —Ta sventa ti cha'vinique, mu'yuc ta jtubbe sts'unubalic ti jteclume —xi laj stac' ti Diose.

³⁰ Ti Abrahame xi xvocolet liquele: —Avocoluc, mu xa'ilin ti jech xivulvun ta atojol ta sjac'belot ti ja' no'ox ti c'ope, ti ja' no'ox lajuneb xcha'vinic (30) ta vo' ta xata ti ch'abal smule. Ti Diose xi laj xcha'al xtoque: —Ta sventa ti lajuneb xcha'vinic ta vo' taje, ta jch'aybe smul scolo' ti jteclum taje.

³¹ Ti Abrahame xi lic yalolan xtoque: —Cajval, toj ven xic'opoj ta j'ech'el. ¿C'usi ta xaval mi ja' no'ox jtob (20) ta vo' ta xata ti ch'abal smule? Ti Diose jech laj stac': —Ta sventa ti jtob (20) ta vo' taje, mu'yuc ta jtubbe sts'unubal ti jteclume.

³² Ti Abrahame xi xvulvun liquele: —Avocoluc, Cajval, mu xa'ilin ta jtojol. Yu'un slajeb xa velta ti xi s'elan ta jc'oponote, mi ja'uc xa liquel cajal ti jc'ope: ¿C'usi ta xapas mi ja' no'ox lajunvo' (10) ta xata ti ch'abal smulique? Xi albat yu'un ti Diose: —Ta sventa ti lajunvo' taje, mu'yuc ta jtub ti jteclume.

³³ C'alal laj yo'nton ti Dios ta sc'oponel ti Abraham ti bu oye, bat. Jech ti Abrahame sut batel ta yaxibalna.