Génesis 17 - Bible in Tzotzil de Chamula

Ti circuncisione, ja' senyail ti tratee

¹ C'alal yich'oj xa balunlajuneb yo'vinic (99) jabil ti Abrame, laj yac' sba iluc ti Dios ta stojolal ti xi albate: —Vu'un Diosun ti scotol xu' cu'une. Tamo ta spasel ti c'usi lec tuc' ta xquil ta jba ta jsate.

² Ja' yu'un un, xi s'elan ta xcac' jtrate ta atojole: Ta xc'ot ta pasel cu'un ti mu xa ono'ox albajuc yepal ta xbat ti anitilultaque.

³ Jech ti Abrame snupilan xa banomil laj spatan sba ta lum c'alal yacal xi xvulvun ta c'opojel ti Diose:

⁴ —Ti li'e, xi s'elan ti jtrate ta jpas ta atojole: Yu'un totilot ta xac'ot yu'unic ti epal muc'tiquil lume.

⁵ Avi tana li'e, ma'uc xa ta xabiin ti Abrame. Ja' xa ta xlic abiin Abraham, yu'un ta xac'ot cu'un ta totil yu'unic ti epal muc'tiquil lume.

⁶ Ta xcac' boluc ta j'ech'el ti anitilultaque. Vo'ot ta aventa ta xlic ayanuc ajvaliletic xchi'uc ta xlic ayanuc muc'tiquil lumetic.

⁷ Ti jtrate ti ta jpas ta atojole xchi'uc ta stojol ti anitilultac ti ts'acal to ta xch'i xc'opojic talele, j'ech'el ta xic'ot ta Dios yu'unic, yu'un lic'ot ta Dios avu'un.

⁸ Ti vo'ote xchi'uc ti stuquique, ta xcac'boxuc scotol yosilal Canaán ti bu nacalot avie. Yu'un j'ech'el ta xcom o ta arextoic cu'un, xchi'uc ta jva'an jba ta Dios avu'unic.

⁹ Ja' jech xtoc ti Diose xi to laj yalbe ti Abrahame: —Ja' yu'un un, ti vo'ote xchi'uc scotol ti anitilultaque, mu me stselbuj avu'unic ti jtratee.

¹⁰ Avi li'e, xi s'elan ta jpas ti jtrate ta atojolic xchi'uc ta stojol scotol ti anitilultac ti tsots sc'oplal c'otuc ta pasel avu'unique: Scotol viniquetic ti oyic ta atojolique, c'otuc ta pasel avu'unic yich'icuc ti circuncisione.

¹¹ Yu'un tsots sc'oplal ta xich' joyel loq'uel ta setel ti snuculil sjol ac'unilique. Ti jech taje, ja' senyail cu'untic ti oy xa ta atojolic ti tratee.

¹² Avi tanae, li' ta xlic batele. Scotol ti queremetic avu'unique, tsots sc'oplal ta xich'ic circuncisión ti naca to vaxaquib (8) c'ac'al svoq'uelique. Ja' no'ox jech ta xich'ic ec ti queremetic ti chlaj voc'uc ta anae, ti xnich'nabic ti jyanlumetic ti buyuc no'ox manbil talel avu'unic ta mosovile.

¹³ Ti c'u s'elan ta xich' ti june, ja' jech ta xich'ic ti yane. Yu'un tsots sc'oplal ti scotolic co'ol ta xich'ic ti circuncisione. Ja' yu'un un, ti jtratee, oy lec senyail ta xcom ta abec'talic ti ja' sna'obil avu'unic ti oy trate ta atojolic c'u sjalil cuxuloxuque.

¹⁴ Yan ti buch'u mu xich' ti circuncisione, tsots sc'oplal ac'o yich' ch'aquel loq'uel ta atojolic ta scoj ti mu xac' ta venta ti jtratee.

¹⁵ Ti Diose xi laj yalbe xtoc ti Abrahame: —Ti avajnile, ma'uc xa ta sbiin ti Saraie. Avi tana li'e, ja' xa ta xlic sbiin Sara.

¹⁶ Ta jts'uiltas, ta xcac'bot jun aquerem ta sventa ti antse. Melel, ta jts'uiltas. Yu'un ti antse, ta xc'ot ta me'il yu'un ti epal muc'tiquil lume, yu'un naca ajvaliletic yu'un jteclumetic ta xbat ti snitilultaque.

¹⁷ Va'i un, ti Abrahame snupilan xa banomil laj spatan sba ta lum, lic tse'inuc c'alal xi ta snopilane: “¿Mi yu'un la xu' to ta xlic joybijuc ta totil ti vinic ti yich'oj xa vo'vinic (100) jabile? ¿Mi yu'un la xu' to ta xilbe sat junuc squerem ti Sara c'alal yich'oj xa lajuneb yo'vinic (90) jabile?”

¹⁸ Ja' yu'un un, xi laj yalbe ti Diose: —¡Toj lecuc la ti ja'uc Ismael ta xcuxi ta sc'upinel ti c'uxubinel avu'une!

¹⁹ Xi tac'bat talel yu'un ti Diose: —Ti c'usi laj xa calbote, yu'un ta xc'ot ta pasel. Yu'un ti avajnil Sarae ta xavilbe sat jun aquerem yu'un. Jech ti vo'ote, Isaac, ta xavac'be sbi. Yu'un ja' ta xcom o cu'un ta stojol ti jtratee. Taje, j'ech'el ta xcom o ta stojolic ec ti snitilultaque.

²⁰ Yan ta sventa ti Ismaele, laj xa ca'i ti c'usi laj ac'an ti ac'o stae. Ja' yu'un un, ta jts'uiltas, ta xcac' epajuc liquel ti yalab xnich'nabe. Ta xcac' epajuc liquel ti snitilultaque. Yu'un ti Ismaele ta xc'ot ta totil yu'un lajcha'chop banquilaletic ti tsots xu' yu'unique. Ta xc'ot cu'un ti spajeb xa no'ox ta jun muc' ta lum ta xbate.

²¹ Ja'uc ta stojol ti Isaac ta xavilbe sat yu'un ti Sara le' ta jun jabile, staoj yav mu xch'ay ti jtrate ta stojole.

²² C'alal laj c'opojuc ti Dios xchi'uc ti Abrahame, bat.

²³ Ja' o jech c'ac'al ti Abrahame lic yac'be yich' circuncisión ti Ismael ti ja' squereme. Ja' jech xtoc laj yac'be yich' circuncisión scotol ti smosovtac ti voq'uemic ta snae, xchi'uc ti smanojane. Scotol ti viniquetic yac'oj sbaic ta tunel ta stojol ti Abrahame, laj yich'ic circuncisión jech c'u cha'al albat yu'un ti Diose.

²⁴ Ti Abrahame yich'oj xa ox balunlajuneb yo'vinic (99) jabil c'alal laj sliques ti circuncisione.

²⁵ Yu'un ti Ismael ti ja' squereme yich'oj xa oxlajuneb (13) jabil c'alal laj yich' joybel loq'uel ta setel ti snuculil sjol sc'unile.

²⁶ Ti jech c'ac'al taje, ti Abrahame xchi'uc ti Ismael ti squereme, laj yich' circuncisión jech c'u cha'al c'otem ta nopele.

²⁷ Laj yich'ic ec scotol ti viniquetic ti oy ta snae, xchi'uc scotol ti yajtuneltac voq'uemic ta sna ti manbilic talel ta yanlume.