Génesis 15 - Bible in Tzotzil de Chamula

Ti Diose ta xac' strate xchi'uc ti Abrame

¹ C'alal laj ti va'i s'elan taj une, ti Abrame ta jech to yepal jam sba sat, ja' o xi albat yu'un ti Diose: —Mu xaxi', Abram, yu'un vu'un avajpojobbailun. Yu'un ti matanal ti oy sc'oplal ta xc'ot ta atojole, mu xa ono'ox albajuc yepal ta xbat.

² Ti Abrame xi laj staq'ue: —Cajval, Ch'ul Dios, ¿c'usi xtun o ti ta xavac'bun ep ti jmotone c'alal xana' lec ch'abal ti jnich'nabe?

³ Ti mu'yuc avac'ojbun junuc ti jnich'one, ti buch'u ta xich' comel ti c'usi x'ayan cu'une, ja' ti Eliezer ti liquem talel ta Damascoe, ti ja' jun cajtunel ti nabal ta jtojole.

⁴ Ti Diose xi laj staq'ue: —Ti buch'u ta xich' comel ti c'usi x'ayan avu'une, anich'on atuc, ma'uc yan.

⁵ Ja' yu'un un, ti Diose laj yic' loq'uel ti Abram ti xi laj yalbee: —Q'uelo avil batel ti vinajele. Ato avil ti c'analetic mi xchap avu'une. Ja' yu'un un cha'e, ja' jech yepal ta xbat ti anitilultaque.

⁶ Va'i un, ti Abrame, teq'uel lec c'ot ta yo'nton ti jech albat yu'un ti Diose. Jech o xal un, ti Diose loc' ta yo'nton ec ti laj sbis ta jun tuq'uil vinique.

⁷ Xi albat xtoque: —Vu'un Diosun, laj jloq'uesot talel ta Ur oy ta yosilalic ti caldeoetique yo' jech ta xcac'bot avosilin ti banomil li'e.

⁸ —Ja' no'ox un, Cajval, Ch'ul Dios ¿c'usi xcut ta jna' mi jbel sc'oplal ta xcosilin ti banomil li'e? —xi laj stac' ti Abrame.

⁹ Va'i un, xi albat yu'un ti Diose: —Ich'bun talel jcotuc ch'in me' vacax ti yich'oj oxib jabile, xchi'uc jcot tot tentsun ti yich'oj oxib jabile, xchi'uc jcot tot chij ti yich'oj oxib jabile, xchi'uc jcot tórtola, xchi'uc jcot paloma.

¹⁰ Jech ti Abrame laj yich' talel scotol ti chon bolometic ta stojol ti Diose. Laj sjec' ta o'loquil, yelovtaojan sba laj xcholan. Yan ti mutetique mu'yuc laj sjec' une.

¹¹ Ti jchop o ta muc' ta xulemetique, xvilte-vilte ta xyal talel ti bu busul sbec'tal ti milbil chon bolometique. Ti Abrame ta sibtas batel xtoc.

¹² C'alal ta xa x'och talel ti ac'ubale, bat xch'ulel ta vayel ti Abrame. Ic'ub talel ta j'ech'el ti osile, mu ech'baj xi'elal laj ya'i.

¹³ Va'i un, xi albat yu'un ti Diose: —Sc'an xana', ti anitilultaque ta xbat nacliicuc ta yan muc' ta lum. Ta xich'ic mosovinel xtoc. Ta xich'ic svocolic ta ilbajinel chanib ciento (400) jabil.

¹⁴ Jech ti vu'un eque ta xcac'be stojic ti muc' ta lum ta xmosovinvanique. Ts'acal to un, ti anitilultaque ta xcolic loq'uel talel. Ta xc'otic ta c'ulej ta j'ech'el.

¹⁵ Yan ti vo'ote, ja' xa no'ox amalaoj ti lequil chamel ta xava'i mi lamolibe. Ja' yu'un un, ta xbat ata ti amolmuc'totac laj ech'uque.

¹⁶ Va'i un, c'alal mi ech' xa ox ti xchancoj jujuvoc' totil me'iletique, jech ti anitilultaque ta sutic talel li' ta banomile. Avie, yu'un mu to ta xc'ot bu xa c'alal mu ts'icbaj xchopolalic ti amorreoetique.

¹⁷ C'alal ic'ub xa ox ti osile, ic' ta j'ech'el ti banomile, laj yac' sba iluc jun jorno xtomet no'ox ti xch'ailale, xchi'uc jch'ob tiletel toj xloquet no'ox ta x'ech' ta sba bu oy ti jechbiquil chon bolometique.

¹⁸ Ti jech c'ac'al taje, ja' o ti Diose laj yac' strate xchi'uc ti Abram ti xi laj yalbee: —Ti banomil li'e, ja' ta xcac'be ti anitilultaque. Ta xlic ta yuc'umal Egipto, ta x'ech' ta muc' ta uc'um yoc ti uc'um Eufratese.

¹⁹ Ti xcaltique, sbanomilic ti quenitaetique, ti quenizitaetique, ti cadmoneoetique,

²⁰ ti hititaetique, ti ferezeoetique, ti refaítaetique,

²¹ ti amorreoetique, ti cananeoetique, ti gergeseoetique, ti jebuseoetique.