Génesis 11 - Bible in Tzotzil de Chamula

Ti natil q'uelob osil ti oy ta Babele

¹ Ti jech yorail ta vo'ne taje, jtos no'ox ti sbats'i c'opique.

² C'alal loq'uic batel ta stuq'uil sloq'ueb c'ac'ale, laj staic jun stenlej ti oy ta yosilal Sinare. Com nacliicuc ti bu taje.

³ Oy jun c'ac'al, xi lic yalanbe sbaique: “La' jmeltsantic latriyo, la' jchic'tic xtoc.” Ja' yu'un naca latriyo laj stunesic ti bu oy sc'oplal ta xtun ti tone. Naca asfalto laj stunesic ti laj smeltanic o ti muyele.

⁴ Ts'acal to un, xi laj yalbe sbaique: “La'ic, la' jliquestic jun jteclum xchi'uc jun natil q'uelob osil luchlebal ta xc'ot c'alal to vinajel ti snatile. Ti jech ta jpastic taje, ja' quich'eltic ta muc'. Ja' jech xtoc mu'yuc ta jtani jbatic ta banomil.”

⁵ Jech ti Diose yal talel sq'uel ti jteclume xchi'uc ti natil luchlebal yacal ta smeltsanic ti jnaclejetique.

⁶ Xi laj snope: “Jmoj svoloj sbaic ti jnaclejetique. Jun xtoc ti sbats'i sc'opique. Jech o xal un, liquem yu'unic ti abtele. Avi tana le' une, mu ono'ox xicta sbaic.

⁷ Ja' lec, yalcutic batel ta syanijesbel ti sbats'i c'opique yo' jech mu xa'ianbe sbaic.”

⁸ Ja' jech c'ot ta pasel ti taniatic batel ta sbejel banomil yu'un ti Diose. Ja' jech quechi smeltsanel yu'unic ti jteclume.

⁹ Ti bu taje, ti Diose slec-lecoj xa liquel sbats'i c'opic yu'un ti jujuvoc' jnaclejetic ta banomile. Va'i un, tan puc batic yu'un ta sbejel banomil. Jech o xal un, ti jteclume laj sbiin Babel.

Snitilultac ti Seme

¹⁰ Li'e, ja' snitilultac ti Seme. Chib xa ox jabil yech'el ti nojel ta vo'e, ti Seme yich'oj xa vo'vinic (100) jabil c'alal ja' o voc' ti xnich'one, ja' ti Arfaxade.

¹¹ Ti Seme ch'i c'opoj to batel vo'ob ciento (500) jabil, laj to yil squerem stsebtac.

¹² Ti Arfaxade yich'oj xa vo'lajuneb xcha'vinic (35) jabil ti c'alal voc' ti Sala ti ja' xnich'one.

¹³ Ts'acal to un, ti Arfaxade ch'i c'opoj batel chanib ciento (400) jabil, laj to yil squerem stsebtac.

¹⁴ Ti Salae yich'oj xa ox lajuneb xcha'vinic (30) jabil c'alal voc' ti Heber ti ja' xnich'one.

¹⁵ Ts'acal to un, ti Salae ch'i c'opoj to batel chanib ciento xchi'uc oxib (403) jabil, laj to yil squerem stsebtac.

¹⁶ Ti Hebere yich'oj xa ox chanlajuneb xcha'vinic (34) jabil c'alal voc' ti Peleg ti ja' xnich'one.

¹⁷ Ts'acal to un, ti Hebere ch'i c'opoj to batel chanib ciento xchi'uc lajuneb xcha'vinic (430) jabil, laj to yil squerem stsebtac.

¹⁸ Ti Pelege yich'oj xa ox lajuneb xcha'vinic (30) jabil c'alal voc' ti Reu ti ja' xnich'one.

¹⁹ Ts'acal to un, ti Pelege ch'i c'opoj to batel baluneb xbuluchvinic (209) jabil, laj to yil squerem stsebtac.

²⁰ Ti Reue yich'oj xa ox lajcheb xcha'vinic (32) jabil c'alal voc' ti Serug ti ja' xnich'one.

²¹ Ts'acal to un, ti Reue ch'i c'opoj to batel vucub xbuluchvinic (207) jabil, laj to yil squerem stsebtac.

²² Ti Seruge yich'oj xa ox lajuneb xcha'vinic (30) jabil c'alal voc' ti Nacor ti ja' xnich'one.

²³ Ts'acal to un, ti Seruge ch'i c'opoj to batel lajunvinic (200) jabil, laj to yil squerem stsebtac.

²⁴ Ti Nacore yich'oj xa ox baluneb xcha'vinic (29) jabil c'alal voc' ti Taré ti ja' xnich'one.

²⁵ Ts'acal to un, ti Nacore ch'i c'opoj to batel balunlajuneb svacvinic (119) jabil, laj to yil squerem stsebtac.

²⁶ Ti Taree yich'oj xa ox lajuneb xchanvinic (70) jabil c'alal laj voc'uc ti Abrame, ti Nacore, ti Harane, ti ja'ic xnich'nabtaque.

Snitilultac ti Taree

²⁷ Li'e, ja' snitilultac ti Taré ti ja' stotic ti Abrame, ti Nacore, ti Harane. Ti Harane nich'naj, ja' ti Lote. Ti Harane, ja' stot ti Lote,

²⁸ cham ta Ur ti oy ta Caldea bu ayane. Ja' cuxul com to ti stote.

²⁹ Ti Abrame laj yic' ti Saraie. Ja'uc ti Nacore laj yic' ti Milcae, xchi'il ta voq'uel ti Iscae, xnich'nabtac ti Harane.

³⁰ C'u stu un, ti Saraie mu sna' x'alaj, yu'un machero.

³¹ Ti Taree loc' batel ta Ur yosilal ti caldeoetique yo' jech ta xbat nacluc ta Canaán. Laj yic' batel xtoc ti Abram ti ja' xnich'one, xchi'uc ti smom Lot sbie, xchi'uc ti Sarai ti ja' yalibe. Ac'o mi jech un, c'alal ic'otic ta jteclum Harane, com nacliicuc.

³² Ti Taree cham ta Harán c'alal yich'oj xa ox vo'ob xbuluchvinic (205) jabile.