Génesis 10 - Bible in Tzotzil de Chamula

Snitilultac ti Noee

¹ Li'e, ja'ic snitilultac ti Seme, ti Came, ti Jafete, xnich'nabtac ti Noee. Yu'un lic ayanuc yalab xnich'nab stuquic ec c'alal ech' xa ox ti nojel ta vo'e.

² Xnich'nabtac ti Jafete, ja' ti Gomere, ti Magoge, ti Madaie, ti Javane, ti Tubale, ti Meseque, xchi'uc ti Tirase.

³ Xnich'nabtac ti Gomere, ja' ti Asquenaze, ti Rifate, ti Togarmae.

⁴ Ti xnich'nabtac ti Javane, ja' ti Elisae, ti Tarsise, ti Quitime, ti Rodanime.

⁵ Taje, ja' snitilultac ti Jafet naquiic ta ti' nabe. Ti jujuchope oy sbats'i c'op stuquic, xchi'uc xtoc svoc'ol-voc'ol ti slumalique.

⁶ Xnich'nabtac ti Came, ja' ti Cuse, ti Mizraime, ti Fute, xchi'uc ti Canaane.

⁷ Xnich'nabtac ti Cuse, ja' ti Sebae, ti Havilae, ti Sabtae, ti Raamae, ti Sabtecae. Xnich'nabtac ti Raamae, ja' ti Sebae, ti Dedane.

⁸ Ti Cuse nich'naj, ja' ti Nimrode, ja' sba vinic ti cajal pasvan ta mantal li' ta banomile.

⁹ Ac'bat yu'un Dios ti Nimrode ti c'ot ta banquilal jnutsuvile, bu lic talel ti c'op ti xi x'ale: “Ti yo'nton le'e, co'ol sba jech c'u cha'al ti Nimrod laj sc'an Dios ti c'ot ta banquilal jnutsuvile.”

¹⁰ Ti jteclumetic bu laj spas mantal ti Nimrode, ja' ti Babele, ti Ereque, ti Acade, ti Calnee, oy ta yosilal ti Sinare.

¹¹ Ta osil taje, ayan talel ti Asure, ti buch'u laj sliques ti jteclum Ninivee, ti Rehobot-Ire, ti Quélahe,

¹² xchi'uc ti muc' ta jteclum Resene, ti oy ta o'lol yu'unic ti Ninive xchi'uc ti Quélahe.

¹³ Ayanic talel ta stojol ti Mizraime, ja' ti ludeoetique, ti anameoetique, ti lehabitaetique, ti naftuhitaetique,

¹⁴ ti patruseoetique, ti casluhítaetique, ti caftoritaetique. Taje, bu ayanic talel ti filisteoetique.

¹⁵ Sba xnich'on ti Canaane, ja' ti Sidone, xchi'uc xtoc ti Hete.

¹⁶ Ta stojol ti Canaane, ayanic talel ti jebuseoetique, ti amorreoetique, ti gergeseoetique,

¹⁷ ti heveoetique, ti araceoetique, ti sineoetique,

¹⁸ ti arvadeoetique, ti zemareoetique, ti hamateoetique. Ts'acal to un, ti jujuchop yu'un ti cananeoetique tanijic batel.

¹⁹ Yosilic ti cananeoetique jam batel c'alal to yosilal Gerar. Yosilic ti cananeoetique lic ta jteclum Sidón, c'ot c'alal to jteclum Gaza, ta stuq'uil ti jteclum Sodomae, ti Gomorrae, ti Admae, xchi'uc ti Zeboime, c'ot c'alal to ta jteclum Lesa.

²⁰ Taje, ja' snitilultac ti Came, jujuvoc' slumalic, jujuvoc' sts'unubalic, xchi'uc jujuchop sbats'i c'opic.

²¹ Sbanquil ti Jafete, ja' ti Seme, nich'naj ec. Scotol xnich'nabtac ti Hebere, ja' snitilultac ti Seme.

²² Xnich'nabtac ti Seme, ja' ti Elame, ti Asure, ti Arfaxade, ti Lude, xchi'uc ti Arame.

²³ Xnich'nabtac ti Arame, ja' ti Uze, ti Hule, ti Guetere, ti Mase.

²⁴ Ti Arfaxade nich'naj, ja' ti Salae. Ti Salae nich'naj, ja' ti Hebere.

²⁵ Ts'acal to un, xi s'elan laj yil chib xnich'on ti Hebere. Ti june, Peleg sbi. Yu'un ti jech yorail taje, laj xch'ac sbaic ti jnaclejetic ta banomile. Xchi'il ta voq'uel ti Pelege, Joctán sbi.

²⁶ Ti Joctane nich'naj, ja'ic ti Almodade, ti Sélefe, ti Hasar-mávete, ti Jérahe,

²⁷ ti Hadorame, ti Uzale, ti Diclae,

²⁸ ti Obale, ti Abimaele, ti Sebae,

²⁹ ti Ofire, ti Havilae, ti Jobabe. Scotolic taje, ja' xnich'nabtac ti Joctane.

³⁰ Xnich'nabtac ti Joctane laj smaquic batel ta naclej yosilal ti Mesae, ti ic'ot c'alal to Sefar banomil yosilal muc'tic vitsetic oy ta sloq'ueb c'ac'ale.

³¹ Scotolic taje, ja' snitilultac ti Seme. Slec-lecoj slumalic, slec-lecoj sts'unubalic ta yosil stuquic, slec-lecoj sbats'i c'op stuquic.

³² Scotolic taje, ja' snitilultac yalab xnich'nab ti Noee, ti c'u s'elan lic boluc batel ti snitilulique, ti slec-lecoj ti yosil sbanomilique. Tanijic batel ta sbejel banomil ti c'alal ech' xa ox ti nojel ta vo'e, c'otic ta muc'tiquil lumetic ta sjoylej banomil.