Gálatas 6 - Bible in Tzotzil de Chamula

Coltao abaic ta jujun tal

¹ Ti jech co'ol jchi'il jbatique, mi oy buch'u ta atojolic ti laj sta smule, ti vo'oxuc ti ventainbiloxuc yu'un ti Ch'ul Espíritue, coltaic me yo' jech ta xcha'tam ti coltaele. Pasic ta slequil yutsiluc avo'ntonic, bijanic, naca mi jech c'otuc ta atojolic ec.

² Cuchbo abaic ti avocolic ta jujun tale. Mi jech ta xapasique, ta xc'ot ta pasel avu'unic ti jbel smantal ti Cristoe.

³ Mi oy buch'u ta snop ti xu' yu'un ti yaloje, ja' no'ox ta slo'la sba stuc.

⁴ Ta jujun tal, ac'o sq'uel sba ti c'u s'elan ta spase. Mi ta xil ti lec ti c'usi ta spase, xmuyubaj ti yo'nton xchi'uque. Ma'ucuc sco'oltas sba jech c'u cha'al ta spas ti yane.

⁵ Yu'un ta xcom ta sbaic ta jujun tal ti c'usi ta spasique.

⁶ Ti buch'u ta xich'ic chanubtasel ta sventa ti lequil ach' c'ope, ti c'usitic oy yu'unique, ac'o xch'acbeic yo' ta scoltaic ti yajchanubtasvanejique.

⁷ Mu xalo'la abaic, yu'un ti Diose mu stac' lo'lael. Ti c'usi ta sts'un ti vinique, ja' jech ta stsob sutel.

⁸ Mi oy buch'u ta spas c'usi lec ta xa'i ti yo'ntone, ta xac' o sjol sbaquil xchi'uc. Ja'uc ti buch'u ta spas ti c'usi ta sc'an ti Ch'ul Espíritue, ta sventa ti Ch'ul Espiritue, ta sta xcuxlejal sbatel osil.

⁹ Ja' lec ti mu xijlubtsaj ta spasel ti leque. Mi mu xijchibaj ta bee, ta sta sc'ac'alil ta jtsobbetic ti sate.

¹⁰ Jpastic tsatsal ta spasel ti c'usi lec ta stojol scotol ti yane. Ja'uc ech'em tsots sc'oplal, jpastic ta stojol ti co'ol jchi'il jbatic ta xch'unele.

Ti bijubtasele xchi'uc ti slajeb chabanuque

¹¹ Q'uelo avilic vi to s'elan smuc'tiquil jletra ta jts'ibaboxuc ta jc'ob jtuc.

¹² Ti buch'utic ta sujoxuc ta yich'el ti circuncisione, ja' no'ox ta spasic yo' jech lec sc'oplalic yu'un ti jnaclejetic ta banomile, yu'un mu sc'anic ilbajinel ti jamal ta xalic ti cham ta curus ti Cristoe.

¹³ Ti buch'utic ta xalic sc'oplal ti circuncisione, mi ja'uc ta spasic scotol ti c'usi ta xal ti oy c'usi tsots sc'oplal albile. Ja'uc ti stuquique ta sc'anic ac'o avich'ic ti circuncisione yo' jech cajal ta xc'ot sc'oplalic ti ta sujoxuc ta yich'el smarcail ti ac'unilique.

¹⁴ Ja'uc ti vu'une, ja' no'ox tsots sc'oplal ta xca'i cham ta curus ti Cajvaltic Jesucristoe. Ti sventa cham ta curus ti Cristoe, laj sc'oplal ta xca'i ti banomile, yu'un ma'uc xa ventainbilun yu'un ti sba banomile.

¹⁵ Mi junotic xchi'uc ti Cristo Jesuse, co'ol no'ox sba mi quich'ojtic, mi mu'yuc quich'ojtic ti circuncisione. Ti bu tsots sc'oplale, ja'uc ti voc'cuticuc ta ach'e.

¹⁶ Scotol ti buch'utic ta xich' ta muc' ti va'i s'elan laj cale, xchi'uc ti bats'i Israel ti c'otem ta steclumal ti Diose, staicuc slamajemal yo'ntonic, xchi'uc c'uxubinel yu'un ti Diose.

¹⁷ Avi tana une, li' ta xlic batel ti mu jc'an mi oy buch'u ta sa'bun ti jmule. Yu'un ti vu'une, oy senyail syayijemal ta jbec'tal jtacopal, ja' svinajeb ti yajtunelun ti Cajvaltic Jesucristoe.

¹⁸ Ti jech co'ol jchi'il jbatique, ac'o yac'boxuc slequilal yutsilal ti Cajvaltic Jesucristo acotolique. Jechuc.