Ezequiel 9 - Bible in Tzotzil de Chamula

Jam satil ta yilel ta xich' tsitsel ti Jerusalene

¹ Laj taj une, laj ca'i ti oy buch'u tsots ta xc'opoj ti xi x'avet c'ot ta jchiquine: “Ta xa xvulic ta loq'uel ti buch'utic ta stsitsic ti jteclume. Ti jujunique, oy ta yoc ta sc'obic ti yabtejebic ta tsutsesvanej ta j'ech'ele.”

² Laj quil un ti ochic batel vacvo' (6) viniquetic ta ti'na ti oy ta toyol ti xi sq'ueloj batel ta stuq'uil yolon ti yolon xocon sloq'ueb c'ac'ale, ti stsacoj smarzo te'ic ti jujune. Ti ta o'lol yu'unique, ta xanav batel jun vinic ti sac bitan no'ox ta saquil xela poc' ti sc'u'e, ti joc'ajtic talel ta xchucbenal ep ta tos ti c'usitic ta xtun ta ts'ibajome. Ochic batel. Tey c'ot sva'an sbaic ta sts'el ti c'anal taq'uin altare.

³ Jech ti yutsilal slequilal ti Dios yu'un ti Israele, bat yac' sba iluc ti bu oy ti c'usitic loc'tabil ti oy xiq'uique, xchi'uc xtoc bat ta ochebal yu'un ti ch'ulnae. Jech ti Diose laj sta ta iq'uel ti vinic ti buch'u sac bitan no'ox batel xchi'uc ti sc'u'e, ti sjoc'anoj batel ta xchucbenal ti c'usi ta xtun yu'un ta ts'ibajome.

⁴ Xi albat xtoc une: “Xani o sjunul ti jteclum Jerusalene. Ac'bo senyail ta sti'ba ti buch'u ta xa'i ti at-o'ntone, xchi'uc ti toj vocol ta xa'i ti c'usitic mu stac' q'uelel ta xc'ot ta pasel ti ta stojolique.”

⁵ Laj ca'i xtoc ti xi albatic ti yan viniquetique: “Tijlanic batel ta spat ta xaniel ti jteclume. Liquesic ti milvaneje. Mi ja'uc xac'uxubaj yu'un.

⁶ Ta sti' jch'ulna, ta xaliques ta smilel ya'iic ti moletique, ti querem viniquetique, ti tojol tsebetique, ti ololetique, xchi'uc ti antsetique, ja' to ti c'uxi sts'ijlajan ta xcome. Ja'uc ti buch'utic yich'ojic senyailic ti oyic ta sliquebal sti' jch'ulnae, ch'an utic.” Jech ti viniquetic une laj sliquesic ta smilel ti moletique, ti queremetic ti oyic ta ch'ulnae.

⁷ Ts'acal to un, xi albatic yu'un ti Diose: “Bat soquesic ti ch'ulnae. Busanbeic animaetic ya'i ti yamaq'uiltaque.” Jech ti stuquique loq'uic batel. Laj sliquesic ta smilel ti jnaclejetic yu'un ti jteclume.

⁸ C'alal jech xyaquetic ta spasele, jtuc xa no'ox licom. Va'i un, laj jquejan jba jnupilan xa ti banomil ti xi lic avancun ti c'alal mu xa x'ech' xjelav ta xca'ie: “Dios, ¿mi yu'un ta xabusanbe ta sba Jerusalén ti sc'ac'al avo'ntone, ti ta xatubbe sc'oplal ta j'ech'el ti c'u xa yepal cuxulic scomelal ti Israele?”

⁹ Xi laj stac'bun talel ti Diose: “Yu'un ti jteclum Israele xchi'uc ti jteclum Judae, jelav xa ta j'ech'el ti smul scolo'ique. Yu'un ti jteclume, naca xa jmilvanejetic ti tey nojique. Yu'un ti muc' ta lume, ja' xa noj ti mu'yuc smelol ti c'usi ta spasique. Ta nan snop ti nom loq'uemun batel ta stojol ti muc' ta lume, ti mu xquil yalojic ti c'usitic ta spasique.

¹⁰ Laj to sc'oplal ma' ti ta xc'uxubaj co'nton ta stojolique. C'ajomal xa no'ox ta xquich'be ti ye sti'ic ta scoj ti c'usitic loc' ta pasel yu'unique.”

¹¹ Jech ti vinic ti slapoj ti saquil xela c'u'ile, ti joc'ajtic ta xchucbenal ti yabtejebtac yu'un ti ts'ibe, xi vul yal ti c'alal sut talele: “Tsuts xa cu'un ta spasel scotol jech c'u cha'al laj avalbune.”