Ezequiel 8 - Bible in Tzotzil de Chamula

Ac'bat yil ti c'usitic mu'yuc smelol ta xich' pasolanel ta jteclum Jerusalene

¹ Ta yo'obal (5) c'ac'al yu'un ti svaquibal (6) ue, ti ja' xa ta svaquibal (6) jabile, tey chotolun ta jna jmoj xchi'uc ti moletic yu'un ti jteclum Judae. Ta jech to yepal, laj yac' talel sc'ob ti Dios ta jtojole.

² Va'i un, laj quil jun ti co'ol s'elan vinic yilele. Yu'un ti ta xlic yalel ta xchucbenale, laj quil ti co'ol s'elan c'oc' yilele. Ti ta xlic muyel ta yac'ol xchucbenale, sts'ayts'un xojobal jech c'u cha'al c'usbil c'anal taq'uin.

³ Jech ti buch'u co'ol s'elan vinic yilele, laj xach' talel ti sc'obe. Stsac xiyutbun ti stsotsil jole. Va'i un, ti smuc'ul stsatsal ti Diose, xi chechech to batel yu'un. Ti c'usitic laj quil ti c'alal jam ti jba jsate, ja' liquem ta stojol Dios scotol. C'alal to Jerusalén yic'ojun batel yilel, ti c'ot sva'anun ta ochebal ti'na ti oy ta yutil ti jteclum ti xi sq'ueloj batel ta stuq'uil yolon ti yolon xocon sloq'ueb c'ac'ale, ti bu va'al ti loc'obbail ti ilinem ti Dios yu'une.

⁴ Ti bu taje, laj quil yutsilal slequilal ti Dios yu'un ti Israele, jech c'u cha'al laj quil ti ta stenlej ti c'alal jam ti jba jsate.

⁵ Ts'acal to un, xi laj yalbune: “Toyo batel asat ti xi ta stuq'uil yolon ti yolon xocon sloq'ueb c'ac'ale.” Laj jq'uel batel ta stuq'uil yolon ti yolon xocon sloq'ueb c'ac'ale. Ti ta sts'el ti ti'na ti bu oy ti altare, laj quil ti tey va'al ti loc'obbail ti ja' ta sliquesbe sc'ac'al yo'nton ti Diose.

⁶ Laj taj une, xi laj yalbune: “¿Mi laj avil yilel ti mu stac' q'uelel ti c'usitic chopol ta spasic ti israeletique, ti ja' ta scojic ta jten comel ti jch'ulnae? Oy to me yan ta xavil ti x'ech' to toj chopole.”

⁷ Ts'acal to un, laj yic'un batel ta ochebal sti' ti amaq'ue. Laj quil ti jomol xa ti moque.

⁸ Va'i un, xi laj yalbune: “Muq'uibtasbo xa sjomolil ti moque.” Laj jmuq'uibtasbe sjomolil ti moque, ja' to laj quil ja' jun ochebal ti tey laj jtae.

⁹ Yan no'ox velta xtoc xi laj yalbune: “Ochan batel, tey ta xavil ti ta xac' ib o'ntonal ti c'usitic ta spasic teye.”

¹⁰ Li'och batel. Ti c'u snatil pujul x'och batel ti yut moc xtoque, tey laj quil ti scotol xa no'ox bonbil ta loc'tael sloc'obbail ti quiletel chonetique, xchi'uc sloc'obbail ti yan chon bolometic ti mu'yuc yutsil ta q'uelele, xchi'uc tey bonbil ta loc'tael loc'obbail diosetic yu'un ti jteclum Israele.

¹¹ Tey oyic laj quil xtoc lajuneb xchanvinic (70) ta vo' ti moletic yu'unic ti israeletique. Ti c'u yepalic taje, tey capal ec ti Jaazanías ti ja' xnich'on ti Safane, ti ta snijan xchiman sbaic ta yich'el ta muc' ti loc'obbailetic taje. Scotolic taje stsacojanic jujun yav yac'alic ti co'ol s'elan lumal toc ti xtomet no'ox ta xmuy ti xch'ailal ti pome.

¹² Xi lic yalbun xtoque: “¿Mi xavil yilel ti c'usitic ta spasic ta mucul ti moletic yu'un ti israeletique, ti jujunic nijilic ta stojol ti diosetic ti laj sloc'taic ta bonele? Yu'un ta snopic nan ti mu xquile, ti laj xa jip comel ti muc' ta lum ti yalojique.”

¹³ Xi lic yalbun no'ox xtoque: “Ta to xavil yan ti c'usitic toj chopol ta q'uelel ti ta spasique.”

¹⁴ Jech o xal laj yic'un batel ta ochebal ti'na yu'un xch'ulna ti Diose, ti xi sq'ueloj batel ta stuq'uil yolon ti yolon xocon sloq'ueb c'ac'ale. Ti bu taje, chotajtic jun chibuc antsetic ti x'oc'oletic xa yu'un ti dios Tamuze.

¹⁵ Xi no'ox lic yalbun xtoque: “¿Mi laj avil scotol le'e? Ma'uc no'ox me un, yu'un oy to me yan ti c'usitic toj chopolic ta to xavil batele.”

¹⁶ Laj taj xtoc une, laj yic'un batel ta ochebal yamaq'uil xch'ulna ti Diose, ta ochebal ti bu oy ti nupel ta bee, ta sts'el altar ti bu ta sjelta ti sc'u'ique. Laj quil ti tey oyic vo'ob xcha'vinic (25) ta vo' viniquetic ti svalopatinojic comel ti bu nupel ta bee, ti xi sq'uelojic batel ta sloq'ueb c'ac'al ti snupic xa ti banomil ta xich'ic ta muc' ti c'ac'ale.

¹⁷ Va'i un, xi lic yalbun ti Diose: “¿Mi mu lajuc avil xcal un? Ti jteclum Judae mu x'ech' yo'ntonic ta spasel ti c'usi toj chopol ta q'uelel li'e. Ja' no'ox jech xtoc, nojem xa ta j'ech'el ti jteclum ti ilbajinvanej ta spasique. Yu'un tey no'ox xlic xcaj ta sliquesbeicun ti sc'ac'al co'ntone, ti c'ot xa ta pasel yu'unic ti xvul c'alal to jni' ti xinal stuilique.

¹⁸ Ta ono'ox xlic jtsitsic ya'iic yu'un ti sc'ac'al co'ntone. Mu xa ja'uc jutebuc xyal ti syail xc'uxul co'nton yu'unique. Ac'o mi x'oc' x'avanic ta xistaicun ta c'oponele, j'ech'el ta jmac ti jchiquine.”