Ezequiel 6 - Bible in Tzotzil de Chamula

Ti Ezequiele ta svinajesbe sc'oplal ti loc'obbaile

¹ Xi laj yalbun ti Dios ti laj sc'oponun talele:

² “Q'uelo avil batel ta stuq'uil vitstic yu'un ti Israele, c'opojan liquel ta jventa,

³ ti xi xcholet xavalbe ya'ie: ‘Vitsetic yu'un Israel, pach'al stselejtic, uc'umetic, stenlejaltic, a'yio ava'iic ti xi ta xa'albatic yu'un ti Diose: Ta jtac talel leto ta atojolic, ta slilinel ta j'ech'el ti jujun c'opojebal ti'inebal avu'unic ti oy ta toyolaltic ti yan yajvale.

⁴ Ta jlilin ta j'ech'el ti altaretic bu ta xavaq'uic ti milbil matanale, ti bu ta xachiq'uic ti pome. Ta jpas ta j'ech'el chamemic ta xyalic ta lum ti viniquetic ta sts'el yichon ti loc'obbail diosetic yu'unique.

⁵ Ta jbusanbe ya'i sbec'tal stacopalic ti israeletic ti bu va'al ti loc'obbail diosetic yu'unique. Javal ts'e'el no'ox cu'un ti sbaquilic ta joyob ti altaretic yu'unique.

⁶ Ta scotol ti buyuc no'ox nacaloxuque, ta jtubbe sc'oplal ti jteclume. Ta jlilin ta j'ech'el ti altaretic ti yan yajval c'otem ta c'opojebal ti'inebal avu'unique. Stuc xch'uch'ulil busul ta xcom ti altaretic avu'unique. Naca xet'elul ta xcom ti loc'obbailetic diosetic avu'unique. Jinem ta xcom ma' ti chic'obil pom altare. Ta xtub sc'oplal scotol ti c'usi ameltsanojique.

⁷ C'alal ta xavilic sbuset no'ox ta lajel ti jnaclejetic ta atojolique, ta xvul ta ajolic ti vu'un Ajvalilune.

⁸ “ ‘Ta jva'an jba xtoc ti oy jlom avu'unic mu xlajique. Cuxul ta xcomic ti tan puc ta xabatic ta jujun muc'tiquil lume.

⁹ Ti jech oyic xa ta yan muc'tiquil lum ti buch'u cuxul ta xcome, ta svulesicun ta yo'nton. Ta svules ta yo'ntonic ti c'u s'elan laj cac'be yich' ti svocolic ti mu junuc yo'nton laj sq'uej sbaic ta jtojol ta scoj ti laj snijan xchiman sba ta yich'el ta muc' ti loc'obbailetique. Ta xlic sna'le sba stuquic ti c'usi chopol laj xa spasique, xchi'uc scotol ti mu albajuc stac' alel c'usi laj spasique.

¹⁰ Ti laj jva'an jba ta yalel ti vu'un Ajvalilun ta yalbel ya'iic ti ta jtacbe ti c'usi chopol ta stojolique, sna'icuc un ti mu naca jeche'uc no'ox xivulvun ta sibtaselique.’ ”

¹¹ Xi laj yalbun ti Diose: “Me'inal oq'uitao aba, majo aba, t'uso ta majel avacan. Avetanan xa xchi'uc yipal xc'uxul ta scoj ti mu albajuc xchopolal c'usi ta spasic ti jteclum Israele. Leto, vi'nal, xchi'uc tsots chamel xa'i xcham xlajic.

¹² Tsatsal chamel xa'i xcham xlajic ti buch'u nom oyique. Leto xa'i xcham xlajic ti buch'u nopol oyique. Vi'nal xa'i xcham xlajic ti buch'utic cuxul to ta xcomique. Jech ta jcontrainic ya'iic ta sloq'uesel ti sc'ac'al co'nton ta stojolique.

¹³ C'alal ta xilic ti jnaclejetic busul no'ox ti animaetic bu oy ti loc'obbailetique, xchi'uc ta sjoylejal ti altaretique, ta scotol ti c'opojebaletic oy ta toyol stselejale, ta toyol vitse, ta yolon muc'tiquil te'e, ta yolon limajtic tulane, ti bu ta xchiq'uic utsiquil ti muil poxetic ta sventa ti loc'tabil diosetic yu'unique, ta sna'ic unbi ti vu'un Ajvalilune.

¹⁴ Ta jyales coc jc'ob ta stsitselic ti ta sts'ijlajan banomil ti oy ta yolon ti yac'ol xocon sloq'ueb c'ac'ale, ti ta xc'ot ta Ribla ti oy ta yolon ti yolon xocon sloq'ueb c'ac'ale. Ta joybinbe ya'iic ta jun xi'bal sba sbajtical banomil ti muc' ta lum yu'unique, xchi'uc scotol ti bu xa nacalique. Va'i unbi, ta xlic sna'ic ti vu'un Ajvalilune.”