Ezequiel 44 - Bible in Tzotzil de Chamula

Stunel ti ti'na ti oy ta yeloval sloq'ueb c'ac'ale

¹ Ti vinique laj xcha'ic'un batel ta pat ochebal ti'na yu'un ti ch'ulna ti sq'ueloj batel ta yeloval sloq'ueb c'ac'ale, ti bajal ta j'ech'el une.

² Ti bu taje, xi laj yalbun ti Diose: “Bajal com o ma' ti ochebal le'e. Mu'yuc xa ta xich' jamel, yu'un och batel ti Ajvalil Dios yu'un ti Israele. Bajal com o, mi junuc buch'u ta x'och.

³ Ja' no'ox xu' ta x'och batel ti banquilal ajvalile yo' ta xchoti ta stunel slajesel ti ve'lil ti c'otem sventa ti Diose. Tsots sc'oplal ochuc batel ta ochebal, loc'uc talel ta ti'na yu'un ti coriole.”

Ti buch'utic xu' ta x'ochic ta ch'ulnae

⁴ Ti vinique laj yic'un batel xtoc ta ochebal sq'ueloj batel ta yolon ti yolon xocon sloq'ueb c'ac'al yu'un ti ch'ulnae. Laj quil sjunul ch'ulna smacoj yutsilal slequilal ti Diose. Jnupilan xa banomil laj jquejan jba ta stojol.

⁵ Va'i un, ti Diose xi laj yalbune: “Yojtot, ac'o lec asat, ts'etano achiquin ta ya'yiel scotol c'u s'elan ta xcal ta sventa ti c'u s'elan ta xal ti oy c'usi jbel tsots albil sc'oplale, xchi'uc ti smantaliltac ti ch'ulnae. Labano avil lec buch'u xu' ta x'och ta xloc' ta ch'ulna.

⁶ “Xi xavalbe ya'i ti toyobba lum Israele: ‘Xi ta xal ti Diose: Lum Israel, ta'luc o xa ti mu stac' albel sc'oplal ti c'usitic ta xapasique.

⁷ Yu'un aq'uelojic no'ox ta xasoquesic ti jch'ulnae, ti ta x'ochic batel avu'unic ta yac'belun xepu', ch'ich' ti jyanlumetique, jnaclejetic ti mu'yuc yich'oj senyail jtrate ta snopbenal, ta sbec'talic. Ta xavalopatinic ti jtrate ta scoj ti mu stac' albel sc'oplal ti c'usitic ta xapasique,

⁸ yu'un lec ta xavilic ti capal ta spasel avu'unic ti jyanlumetique.’

⁹ “Jech o xal xi ta xcal ti vu'un Ajvalilune: J'ech'el mu stac' x'och ta jch'ulna jyanlum, mi mu'yuc c'otem ta snopbenal, ta sbec'talic senyail ti jtratee, mi junuc jyanlum manchuc mi capal ta naclej xchi'uc ti israeletique.

¹⁰ Ti laj xch'ac sba ta jtojol ti levitaetic c'alal laj yictabeicun comel lequil be ti israeletic ta scoj bat snijan xchiman sbaic ta yich'el ta muc' c'usi meltsanbil ta c'abale, tsots sc'oplal ta stojic ti jech laj spasique.

¹¹ Xu' ta xtunic ta jch'ulna ta sbainel ti ti'naetique, ti yan abtel ta ch'ulnae, ta sbainel xtoc smilel chon bolometic ta xich' chiq'uel ta matanal ti ta xaq'uic ti jteclume, chapalicuc ta tunel yu'un ti jteclume.

¹² Yac'oj sba ta tunel yu'un Israel ta spasbel stoyel xi'el ti c'usitic meltsanbil ta c'abale, laj sta smulic yu'unic. Jech o xal ta stojic. Ti vu'un Ajvalilune, mu stselbuj ma' ti jc'ope.

¹³ Laj c'op ma' ti ta xtunic ta paleal ta jtojol ta sbainel ti c'usitic ac'bil ta jventae, ta sbainel xtoc ti cajal sc'oplal c'otem ta jventae. Xcuchoj com ti nijil chimil ta q'uexlal ta scoj ti mu stac' alel ti c'usi laj spasique.

¹⁴ Ta x'ochic no'ox ta sbainel cu'un ta jch'ulna, ti bu mu cajaluc sc'oplale yo' ta spasic scotol ti c'usi sc'an pasele.

Sc'oplal ti palee

¹⁵ “Ti levitaetic snitilultac ti Sadoc ti c'otemic ta paleetique, le'e, xu' xnopajic ta jtojol ta tunel, yu'un staoj yav yac'oj sbaic ta tunel ta jch'ulna c'alal laj yictabeicun comel lequil be ti israeletique. Xu' ta sjelubtasbeicun talel ta jtojol ti xepu'e, xchi'uc xch'ich'el ti c'usi ta xich' svocol ta milele. Vu'un ta xcal mantal ti Ajvalilune.

¹⁶ Xu' ta x'ochic talel ta jch'ulna, xnopajic ech'el ta caltar yaq'uel sbaic ta tunel, ta sbainic c'usitic sc'an pasel ta xquile.

¹⁷ Tsots sc'oplal slapicuc ech'el saquil xela c'u'il c'alal ta x'ochic batel ta ti'na ti oy ta yut amaq'ue. Ma'ucuc c'u'il meltsanbil ta tsots ta slapic c'alal yacal ta xtunic ta amac' ti oy ta yute, mi ta ch'ulna.

¹⁸ Tsots sc'oplal ch'alaluc ochel ta saquil xela poc' sts'ot sjolic xchi'uc saquil com-com vexil. Mu'yuc c'usi sts'otic ochel ta xchucbenal ti ta xac' chiq'uinajele.

¹⁹ C'alal mu to xloq'uic talel ta amac' bu volol ti jteclume, tsots sc'oplal sloq'uicuc comel ti c'u'il laj stunesic ta ch'ulnae. Yictaicuc comel ta jujuc'ol naetic yu'un ti ch'ulnae yo' jech mu xch'am jteclum yutsilal slequilal ti c'u'ile.

²⁰ “J'ech'eluc mu st'anbun ta loq'uel ti sjolique, mu sq'ueloj xtoc ta xnatub ti stsotsil sjolique. Naca no'ox ac'o sba ta loq'uel.

²¹ Tsots sc'oplal mu yuch'ojicuc vino ti pale c'alal ta x'och batel ta yutil ti amaq'ue.

²² Tsots sc'oplal mu xiq'uic mi junuc me'unal ants, mi jun sutemal ants. Yic'uc junuc israel tojol tseb, mi jun yajnil anima pale.

²³ “Ti paleetique, ja' yabtelic ta yac'bel yil jteclumal ti bu albil sc'oplal stac' pasele, ti bu mu pasbaje, xchi'uc ta st'ujel ti c'usi mu soquesvane xchi'uc ti c'usi ta soquesvane.

²⁴ C'otemic ta jchapanvanej mi oy letoe. Ta xchapanvanic jech c'u cha'al ta xal ti oy c'usi jbel tsots albil sc'oplale. C'otuc ta pasel yu'unic scotol ti c'usi jbel tsots albil sc'oplal cu'une, xchi'uc chanubtasvanicuc ta sventa scotol ti q'uinetic cu'une, yich'icuc ta muc' sc'ac'alil ti cuxob o'ntonal cu'une.

²⁵ “J'ech'eluc mu stic' sbaic ta spiquel mi junuc anima yo' mu soques sbaic. Mi ja' stot sme'e, mi jun squerem stseb, mi jun vinic, mi jun ants xchi'ilic ta voq'uel mi mu'yuc to nupul ts'acale, yan sc'oplal unbi.

²⁶ Mi jech laj spase, tsots sc'oplal ta smes stus sba, smalauc ech'uc vucubuc (7) c'ac'al.

²⁷ C'alal ta xlic ochuc batel ta yamaq'uil yutil ch'ulna yo' ta xtune, ta xac' milbil matanal ta scoj mulil. Vu'un ta xcal mantal ti Ajvalilune.

²⁸ “Vu'un ta jventa ta staic sve'el yuch'omic ti paleetic ti c'otem ta xrextoique. J'ech'el mu x'ac'bat yan rextoil ta sbanomil ti Israele. Vu'un jbainoj ti srextoique.

²⁹ Xu' slajesic ti sat ts'unubaletic ta xac'beicun ti israeletique, xchi'uc sbec'tal ti chon bolometic ta xich' aq'uel ta scoj ti mulile, xchi'uc ti ta xich' aq'uel ta scoj ti colo'ile. Ja' yu'unic ec, jech c'u cha'al scotol c'usitic c'otem ta jventa ta yac'belun ti israeletique.

³⁰ Ti paleetique oy ta sventaic ta yich'el ti lequil sba sat ts'unubale, xchi'uc scotol ti yan matanaletique. C'alal ta xachapanic ta svots'el ti pane, ta xich' avu'unic ti bu lec t'ujbile. Ti c'uxubinel yu'un ti jlequil cutsilale, snojel no'ox oy ta ana ac'ulebic.

³¹ Ti paleetique j'ech'el mu stac' slajesic ti c'usi oy sc'uc'umale, mi chon bolometic ti cham no'ox stuque, mi lilinbil ta ti'el yu'un ti jti'oval te'tical chon bolome.