Ezequiel 43 - Bible in Tzotzil de Chamula

Yutsilal slequilal ti Diose sut talel ta ch'ulna

¹ Ti vinique laj yic'un batel ta ti'na ti sq'ueloj batel ta yeloval sloq'ueb c'ac'ale.

² Laj quil ta sloq'ueb c'ac'ale, lic talel yutsilal slequilal Dios yu'un ti Israele, ti co'ol s'elan yech'omal jun muc' ta uc'ume, sac jaman com yu'un ti banomile.

³ Ti c'u s'elan laj quil jam jba sate, co'ol jech c'u cha'al laj quil ta ti' uc'um Quebare, c'alal oy sc'oplal ta slilin Jerusalén ti Diose. Jnupilan xa banomil laj jquejan jba ta stojol.

⁴ Yutsilal slequilal ti Diose c'ot ta yut ch'ulna, och batel ta ti'na ti sq'ueloj ti yeloval sloq'ueb c'ac'ale.

⁵ Va'i un, smuc'ul stsatsal ti Diose laj xchechun batel ta amac' ti oy ta yutile. Laj quil sac jaman no'ox yu'un sbejel yut ch'ulna yutsilal slequilal ti Diose.

⁶ Va' xi ta jtsel ti vinique, laj ca'i ta yut to ch'ulna ta sc'oponun talel ti Dios

⁷ ti xi ta xalbune: “Avi li'e, ja' jchotleb sventa jpasob mantal ti bu ta jtec'an ti coque. J'ech'el ta xinaqui ta stojol ti israeletique. Ti stuquique, ti ajvaliletic yu'unique, laj sc'oplal ti xi s'elan ta soquesbeicun jc'oplal ti mu'yuc stuq'uil ti snopbenal yu'unique: J'ech'el ts'ij xi sc'oplal ta sva'anel sloc'obbail ajvalil yu'unic c'alal mi chame,

⁸ ta sva'anel muc'tiquil naetic meltsanbil ta te' ti sq'ueloj xa batel ti sti'tac ta yelov sti' ti jch'ulnae, ti jun spac'bal xchi'uque. Ti stuquique laj soquesbeic sc'oplal ta scoj chopol snopbenal yu'unic ti mu lecuc laj quile, li'ilin yu'un, cham lajicuc cu'un.

⁹ Sjipic stenicuc loq'uel ti xchopolal ta jtojole, ta sva'anel sloc'obbail ti ajvaliletic yu'unique. J'ech'el ta xinaqui ta stojolic un.

¹⁰ Lo'iltabo ya'i ti israeletique, Yojtot, c'u s'elan oy sc'oplal ti ch'ulnae, sloc'ol ti c'u s'elan ta xich' meltsanele, xchi'uc ti sbisoltaque, yo' ta xq'uexavic yu'un ti smulique.

¹¹ Mi ta xlic q'uexavuc xchi'uquic scotol c'usitic chopol laj xa spasique, chapbo ya'iic lec c'u s'elan sloc'ol ti ch'ulnae, ti c'usitic oye, xchi'uc ti loq'uebal ochebaletic yu'une, ti c'u s'elan sloc'tabil scotol ta svunale, ti c'otuc ta pasel yu'unic ti c'usi jbel tsots albil sc'oplale. Loc'tabo yil scotol sloc'obbail yo' ta xa'ibeic smelol c'u s'elan ta xlic yich' pasel ti abtele, ti c'otuc ta tsutsel yu'unique. Ts'ibao scotol ti c'usi ta xal ti jbel tsots albil sc'oplale yo' ta xc'ot ta pasel yu'unic.

¹² Xi s'elan ma' ti jbel tsots albil sc'oplal ta sventa ti ch'ulnae: Ti banomil c'u yepal smacoj ta joyob ti ch'ulna ta jol vitse, ventainbil c'otem ta j'ech'el.”

Ti altare

¹³ Sbisol ti altare jech c'u cha'al li'e, ja' ono'ox ti sbisol laj yich' tunesel ta ba'yele. Ta spat xocon ti altare, o'lol (50 cm.) metro snatil, o'lol (50 cm.) metro sjamlej pasbil xch'en-ch'enul ta joyob. Pasbil jch'ix xchi'uc oxc'ob (25 cm.) smac ta joyob xtoc. Xi s'elan bu chotol liquel ti altare:

¹⁴ Ti bu c'ot ta tsutsel ti jcoj oy ta peq'uele, jun metro staylej muy batel lic ta yut ti xch'en-ch'enule. Ti bu lic muyel jcoj ti oy ta o'lole, jamal com o'lol (50 cm.) metro ti bu c'ot ta tsutsel ti sba cojale, chib (2) metro muy batel ti stayleje.

¹⁵ Ti bu lic muyel jcoj ti c'ot ta sbae, jamal com o'lol (50 cm.) metro ti bu c'ot ta tsutsel ti jcoj oy ta o'lole. Chib (2) metro ti staylej muy batele. Chanib (4) xulub va'ajtic muyel.

¹⁶ Ti bu c'ot ta tsutsel ti altar ti jcoj oy ta toyole, co'ol vaquib (6) metro yich'oj ti jujujote.

¹⁷ Ja'uc ti jcoj oy ta o'lole, co'ol vucub (7) metro yich'oj ti jujujote. Ti xch'en-ch'enul ta joyobe, o'lol (50 cm.) metro sjamlej, xch'ix xchi'uc oxc'ob (25 cm.) spimil muyem ti smaque. Ti scojol-coj tec'obal sventa muyebal yu'un ti altare, sq'ueloj ta yeloval sloq'ueb c'ac'al.

¹⁸ Laj un, xi laj yalbun ti Diose: “C'alal ta xc'ot yorail ta xich' va'anel ti altare, tsots sc'oplal c'otuc ta pasel jech c'u cha'al ti xi s'elan ta xal ti smantalile: Ta sba ti altare, ta xich' chiq'uel jcot chon bolom. Ta xich' vijel xch'ich'el ta altar un.

¹⁹ Ti pale levita snitilultac ti Sadoque, ti ja' no'ox xu' xnopajic ta jtojol yo' ta xtunique, ta xavac'be jcot ch'iom tot vacax ta yaq'uel ta matanal ta yich'el svocol ta scoj ti mulile. Laj cal mantal ti vu'un Ajvalilune.

²⁰ Ta xavich'be talel jutebuc xch'ich'el un yo' ta xavij ta jujun xulub, xchi'uc ta xchanjotal xocon ti jcoj ta o'lole, xchi'uc scotol ti smac xch'en-ch'enul ta joyobe. Ja' to jech mesbil tusbil ta xc'ot ti mulil ta j'ech'ele.

²¹ Ta xachech loq'uel xtoc un ti ch'in tot vacax laj yich' svocol ta scoj ti mulile. Ba chic'o ta loq'ueltic yu'un ch'ulna ti bu chapanbil yavil ta xich' chiq'uele.

²² Ta yoc'omal une, ta xavac'be yich' svocol jcot ch'in tentsun ti mu'yuc xchopolal ta xtun ta sventa xch'ayobil ti mulile. Ti paleetique ta smes stusic ti altare jech c'u cha'al laj spasic xchi'uc ti ch'in tot vacax laj yaq'uique.

²³ C'alal mi tsuts yu'unic sc'oplal ti tusel mesele, ta xavic' talel jcot ch'in tot vacax xchi'uc jcot chij ti mu'yuc xchopolal ti xcha'cotale,

²⁴ ti ta xac'beicune. Ti paleetic une ta xac'beic yats'mil yo' ta xchiq'uic sventa quich'el ta muc'.

²⁵ Vucub (7) c'ac'al sjalil tsots sc'oplal ta xavac' jcot milbil tentsun ta scoj ti mulile. Ta xavac' jcot ch'in tot vacax xchi'uc jcot chij ti mu'yuc jutebuc xchopolale.

²⁶ Jujun c'ac'al ti vucub (7) c'ac'al sjalile, tsots sc'oplal ta smes ta stus altar ti paleetique, yu'un ventainbil c'otem.

²⁷ Vucub (7) c'ac'al ma' ti jech sjalil ta spasique. Ta xvaxaquibal (8) c'ac'al un, ta xlic yaq'uic chic'bil matanal ta yich'el svocolic sventa ti lajesobil o'ntonale. Jun xa co'nton ta xacomic ta jtojol unbi. Xc'ot xic'opoj ma' ti vu'un Ajvalilune.”