Ezequiel 42 - Bible in Tzotzil de Chamula

Ti naetic meltsanbil ta sts'el ti ch'ulnae

¹ Ts'acal to un, ti vinique laj yic'un loq'uel ta amac' ti oy ta spat sq'ueloj batel ta yolon ti yolon xocon sloq'ueb c'ac'ale. Laj yic'un ochel bu oy ep ta c'ol naetic sq'ueloj batel ta yolon ti yolon xocon sloq'ueb c'ac'ale, ta yeloval macbil amac'. Lic'ot ta na meltsanbil ta spat smocal ti ch'ulnae.

² Ti ep ta c'ol naetique, lajuneb yoxvinic (50) metro snatil yich'oj ti sq'ueloj batel ta yolon ti yolon xocon sloq'ueb c'ac'ale, vo'ob xcha'vinic (25) metro ti sjamleje.

³ Ti jot xocon ti sq'ueloj batel ta sti'il amac' oy ta yute, yich'oj lajuneb (10) metro ti sjamleje. Ti jot xocon ti sq'ueloj batel ta sti'il pac'bil ton amac' ti oy ta loq'uele, oxcoj muyem batel ti naetique, och ochem batel juteb, mu sta ti oy ta sliquebale.

⁴ Ta yeloval ti ep ta c'ol naetique, jamal comem yu'unic vo'ob (5) metro, lajuneb yoxvinic (50) metro yich'oj ti jamal x'och batel ta yute. Sq'ueloj batel sti'tac ta yolon ti yolon xocon sloq'ueb c'ac'al ma' ti jujuc'ol nae.

⁵ Ti jujuc'ol naetic oy ta yoxcajale, comijem jutuc, x'ech' sjamalil jutuc ti oy ta o'lole xchi'uc ti oy ta sliquebe. Ti jujucoje x'ech' ochem batel ti oy ta toyole, ja' mu sta ti oy ta yolone.

⁶ Ti jujuc'ol naetic taje, lec oxcoj meltsanbil muyel. Mu'yuc yich'oj yoyaltac jech c'u cha'al ti ep ta c'ol naetic ti oy ta ti' amaq'ue, yu'un ochem batel jutuc ti jujuc'ol oy ta yoxcajale. Ti jutuc no'ox ta o'lole, mu xco'olaj jech c'u cha'al oy ta sliquebe.

⁷ Sjamlej smacoj ti ep ta c'ol naetic oy ta amac' ta loq'uele, yich'oj vo'ob xcha'vinic (25) metro ti snatile. Yich'oj batel vo'ob xcha'vinic (25) metro moc ti yelov sq'ueloj batel ta amac' ti oy ta loq'uele.

⁸ Loc' lajuneb yoxvinic (50) metro snatil ta scotol ti bu jamal comem yu'unique.

⁹ Ti sba cajal ep ta c'ol naetique, oy jun ochebal ta sti'il amac' ti oy ta loq'uebale. Oy ta stuq'uil sloq'ueb c'ac'al ti xcaltique,

¹⁰ ti bu c'otem ta tsutsel ti moc oy ta spate. Ta yolon ti yac'ol xocon sloq'ueb c'ac'ale, ta yeloval ti bu macbil ti amaq'ue, bu oy meltsanbil na ta yeloval smaleb c'ac'al yu'un ti ch'ulnae, oy ep ta c'ol naetic xtoc.

¹¹ Co'ol yelanil sbisol meltsanbil, oy ochebal loq'uebal yu'un jech c'u cha'al ti ep ta c'ol naetic ti oy ta yeloval yolon ti yolon xocon sloq'ueb c'ac'ale. Oy ech'ebal yu'un c'u sjamlej smacoj ti yelove.

¹² Ti c'otebal c'alal to ti ep ta c'ol naetic oy ta yelov yolon ti yac'ol xocon sloq'ueb c'ac'ale, oy jun ti'na ti bu ta xlic batel ta biq'uit ochebal ta yeloval moc smacoj ti jteclum ta ochebal yu'un ta yeloval sloq'ueb c'ac'ale.

¹³ Ti vinique xi laj yalbune: “Ti ep ta c'ol naetic oy ta yeloval yolon ti yolon xocon sloq'ueb c'ac'ale, xchi'uc ti oy ta yeloval yolon ti yac'ol xocon sloq'ueb c'ac'ale, ta yeloval ti macbil amaq'ue, naetic ti ac'bil ta ventainele. Ti bu taje, c'otem ta na ta sventa stunesel matanaletic ti paleetic ti c'usitic c'otem ta ventae, ti buch'utic nabalic ta tunel yu'un ti Diose. Ti bu taje, c'otem ta yavil spajebal matanal ti ventainbile, jech c'u cha'al ti sat ts'unubale, ti ch'ayobil mulile, xchi'uc ti matanal xch'ayel stubel ti oy c'usi chopol c'ot ta pasele, yu'un ventainbil ti bu taje.

¹⁴ Mi och xa batel ta yut ch'ulna ti paleetique, mu stac' xloc' talel ta amac' mi mu'yuc sloc'oj ti sc'u' sventa tunele, yu'un tsots sc'oplal ti c'u'il slapoje. Yo' ta xtal bu vololic ti jteclume, tsots sc'oplal ta slap yan c'u'il.”

Smuc'ul loc' ta bisel c'u sjamlej smacoj ti ch'ulnae

¹⁵ Ti vinique, c'alal laj sbis c'u sjamlej smacoj banomil ti yut ch'ulnae, laj yic'un loq'uel ta ti'na ti oy ta yeloval sloq'ueb c'ac'ale. Lic xchapan ta sbisel c'u sjamlej yosilal ta sjoylej ti spat xocone.

¹⁶ Laj stsac ti jtel sbisobile, xi s'elan loc' ta bisel yu'un ti jot xocon sq'ueloj batel ti sloq'ueb c'ac'ale: o'lol yoxibal cien (250) metro.

¹⁷ Laj sbis xtoc ti jot sq'ueloj batel ta yolon ti yolon xocon sloq'ueb c'ac'ale, loc' o'lol yoxibal cien (250) metro.

¹⁸ Xi s'elan loc' ta bisel yu'un xtoc ti jot xocon sq'ueloj batel ta yolon ti yac'ol xocon sloq'ueb c'ac'ale: o'lol yoxibal cien (250) metro.

¹⁹ Slajeb xa un laj sbis ti jot sq'ueloj batel ta smaleb c'ac'ale, loc' o'lol yoxibal cien (250) metro.

²⁰ Xchanjotal laj sbis lec. Sjamlej yosilal ti ch'ulnae, yich'oj smocal ta joyob ti oy o'lol yoxibal cien (250) metro, yo' ch'acal ta xc'ot ti bu c'otem ta ventae, xchi'uc ti bu mu'yuque.