Ezequiel 30 - Bible in Tzotzil de Chamula

Ta stsitse ti Egiptoe

¹ Xi laj yalbun ti Dios laj sc'oponun talele:

² “Yojtot, va'ano aba ta c'opojel ta jventa ti xi xavale: ‘Xi s'elan ta xal ti Diose: Oc'an, avananic yu'un ti nopol xa talel ti c'ac'al orae.

³ Nopaj xa talel c'ac'al yu'un ti Diose. Jun c'ac'al ic'uneb ti banomile, jun c'ac'al xi'bal sba ta xc'ot ta pasel ta stojol ti muc' ta lumetique.

⁴ Ta xvul ta loq'uel letovajel ta Egipto. Yepal no'ox ta xmile ti bu taje. Ta x'elc'anbatic batel ti sc'ulejalique, ta slilinel comel ta sliqueb yoc ti Egiptoe. Xnicnun xa liquel ti Etiopía une.

⁵ ‘Leto xa'i xcham xlajic ma' ti soldadoetic yu'un ti Etiopiae, yu'un ti Libiae, yu'un ti Lidiae, yu'un sbejel ti lum Arabiae, yu'un ti Cube, yu'un ti yan lumetique, yu'un ti muc'tiquil lum ti scomon-voloj ti sc'opique.

⁶ ‘Xi s'elan ta xal ti Diose: Ti buch'u ta stic' sba ta spojel ti Egiptoe, leto xa'i xcham xlaj, ta xlic ta Migdol, ta xc'ot c'alal ta jteclum Asuán. Ti xcajet xchi'uc stoyobbail ti Egiptoe, ta xac' sba ta q'uexlal xchi'uc un. Laj xa cac' que jti' ma' ti vu'un Ajvalilune.

⁷ Stuc xa no'ox ma' ti Egipto sts'ijlajan ta xcome. Lilijem ta xcom ta j'ech'el ti jteclumetic yu'une.

⁸ C'alal ta xcac' tiluc c'oc' ta muc' ta lume, ti ts'ij xi sc'oplal ti jpojvanejetic yu'une, ta sna'ic unbi vu'un ti Ajvalilune.

⁹ ‘C'alal ta xc'ot sc'ac'alil stsitsel ti Egiptoe, ta jtac batel j'al-mantal j'ich'-c'opetic ta xjelavic ta nab yo' ta xcaj-t'abbeic ya'i ti jnaclejetic ta Etiopiae ti jeche' no'ox ta x'ech' yu'unic ti c'ac'ale. Xbat xa xch'ulelic ta xi'el yu'un un. Ta xa xc'ot ta pasel ma' ti sc'ac'alil taj une.

¹⁰ ‘Xi ta xcal ma' ti vu'un Diosune: Ta jtunes ti Nabucodonosor ajvalil yu'un ti Babiloniae yo' ta xch'aybe sc'oplal sc'ulejal ti Egiptoe.

¹¹ Xvolet batel xchi'uc yajsoldadotac pucujil viniquetic ta j'ech'el, ta slilinel ti muc' ta lume. Ta smilic ta espada ti yajval Egiptoe. Busul no'ox ta xictaic comel ti animaetic ta muc' ta lume.

¹² Ta xlic taquijuc cu'un ti uc'um Niloe. Ta xcac'be ta yoc ta sc'ob jchopol jol viniquetic. Ta sventaic jyanlumetic ta jlilin ti muc' ta lum xchi'uc scotol ti c'usitic oy yu'une. Laj xa cal ti vu'un Ajvalilune.

¹³ ‘Xi ta xcal ti vu'un Diosune: J'ech'el ta jlilin ti loc'obbailetique. Ta jtsutsesbe sc'oplal ti nopbil diosetic yu'un Menfise. Ta xlaj sc'oplal ajvalil yu'un ti Egipto yo' ta xventainatique. Naca xi'el ta x'ayan liquel cu'un ta muc' ta lum.

¹⁴ Ti oy ta yolon ti yac'ol xocon sloq'ueb c'ac'al yu'un ti Egiptoe, lilijem ta xcom cu'un. Ta jtiles c'oc' ta Zoán. Ta xquich'be ye sti' ta xchapanel ti Tebase.

¹⁵ Ti pojobbail jteclum Sin yu'un ti Egiptoe, ta jbusanbe ya'i ti sc'ac'al co'nton ta stojole. Ta jtsutses ta lilinel sc'ulejal ti jteclum Tebase.

¹⁶ Ta jtiles c'oc' ta Egipto. Ti jteclum Sin une xbalalij xa xchi'uc yipal. Jomajtic no'ox smuc'tiquil sjomolal moc ti jteclum Tebase. Lec ta c'ac'altic xc'ulet no'ox yajval ta xich' tsaquel ta leto ti jteclum Menfise.

¹⁷ Leto xa'i xcham xlajic ti jva'lej querem viniquetic yu'un jteclum One, xchi'uc ti jteclum Bubastise. Bec'bil ta xbatic ta chuquel ti jlom jnaclejetic yu'une.

¹⁸ C'alal ta jtubbe sc'oplal ti stuc xa no'ox cajal xa'i sba xchi'uc stoyobbail ti Egiptoe, ta xmac sat ti c'ac'al ta jteclum Tafnese. Ta xvoliat ta toc ti jteclumetic ta Egiptoe. Ti jnaclejetic ta steclumale bec'bil ta xbatic ta chuquel.

¹⁹ Ta xquich'be ye sti' ta xchapanel ti jteclum Egiptoe. Ta sna'ic unbi vu'un ti Ajvalilune.’ ”

²⁰ Ta yucubal (7) c'ac'al yu'un ti sliqueb ue, ta sbuluchibal (11) xa jabile, xi laj yalbun ti Dios laj sc'oponun talele:

²¹ “Ti faraón ajvalil yu'un ti muc' ta lum Egiptoe, ti tsots xu' yu'un ti yoc sc'obe, laj xa jc'asbe. Mi junuc oy buch'u xu' yu'un ta sts'ot ta poc', ta xpoxtael yo' ta xcha'tam yip ta stsaquel ti yespadae.

²² Jech o xal xi ta xcal ti vu'un Diosune: Contra xquil ti faraón ajvalil yu'un ti Egiptoe. Ta jc'asbe xchibal ti sc'obtaque, ti lec to oxe xchi'uc ti c'asem xa ono'oxe, yo' ta xcol ta sc'ob ti yespadae.

²³ Ta jtani batel ya'iic ti egipcioetic buyuc no'ox ta banomile.

²⁴ Ti ajvalil yu'un Babiloniae, ta xcac'be yip yoc sc'ob ta stsaquel ti quespadae. Ti faraone, ta jc'asbe sc'ob ti x'ijijet xa yu'un c'alal ta xa'i ti yayijesat xa yu'un ti yajcontrae.

²⁵ Ti ajvalil yu'un Babiloniae, ta xcac'be yip yoc sc'ob yo' ta xlaj yip yoc sc'ob ti faraone. C'alal ta xcac'be ta yoc ta sc'ob quespada ti ajvalil yu'un Babilonia ta stsaquel ta scontra ti Egiptoe, ta sna'ic unbi vu'un ti Ajvalilune.

²⁶ Ta jtani batel ya'i ti egipcioetic buyuc no'ox ta banomile. Ta sna'ic unbi vu'un ti Ajvalilune.”