Ezequiel 26 - Bible in Tzotzil de Chamula

Ta xcaj'albat contra x'ile ti Tiroe

¹ Ta sliqueb c'ac'al yu'un ti ue, ta sbuluchibal (11) xa jabile, xi laj yalbun ti Dios laj sc'oponun talele:

² “Loc' ta alel yu'un ma' ti jteclum Tiro ti xi laj yalbe sc'oplal ti Jerusalene: ‘Bal to ma' le' une ti lilij ti ti' naetic smanolajebic, xchonolajeb ti muc'tiquil lumetique. Jmacoj xa jtuc ti c'ulejal tana li' une. Ti lilij xae, jc'ulej ta xic'ot ec un.’

³ “Jech o xal xi ta xcal ti vu'un Ajvalilune: Ta xcalbot ava'i contra xaquil, jteclum Tiro. X'ubet no'ox talel cu'un epal muc'tiquil lumetic ta scontrainelot, jech c'u cha'al natic no'ox xva'i xcoti ti ya'lel nabe.

⁴ ta slilinel ti amoctaque, ta slomesel yalel ti q'uelob osiletic avu'une. Ti pucuc bu oye, ta jmes loq'uel un, c'ajomal xa no'ox jbej t'ajal ton ta xquicta comel.

⁵ Ta xc'ot ta jun yavil staquintasel stsacobil choy, ma' ti o'lol nab avu'une. Ti vu'un Ajvalilune, mu lo'iluc no'ox ta xcal. Ta xpojbat batel yu'un muc'tiquil lum ti c'usi oy yu'un ti jteclum Tiroe.

⁶ Espada xa'i xve' yu'un ma' ti jnaclejetic oy ta sti'il spatile. Ta sna'ic unbi ti vu'un Ajvalilune.

⁷ “Ti vu'un Ajvalilune xi ta xcale: Ti ajvalil Nabucodonosor yu'un ti Babilonia ti oy ta yolon ti yolon xocon sloq'ueb c'ac'ale, jun ajvalil ti cuchem yu'une, ta xquic' talel ta svoliel ti Tiroe. Xc'ulet no'ox talel xchi'uc sca', xchi'uc scarretatac, xchi'uc cajlejetic ta ca', ti mu albajuc yepal xvolet talel xchi'uc ti yajsoldadotaque.

⁸ Ti jnaclejetic avu'un oy ta sti'il spatile, espada xve' yu'unic, ta xasjoyot ta maquel ta moc, ta sbujanan lum yo' ta svoliot, ti xc'ulet no'ox talel yajsoldadotac ta atojol ti oy lec smacobbailique.

⁹ Ta slilinic amoc ta yabtejebaltac yu'unic. Ta yabtejebaltac ta slilinic yalel ti q'uelob osiletic avu'une.

¹⁰ C'alal ta x'och batel ta sti'tac alumal ti ajvalil yu'un ti Babiloniae, co'ol s'elan j'elec' xc'uletic no'ox ochel ta yelc'anel ti c'usi oy yu'un ti jteclume. Volol ta xacom ta pucuc yu'un ti mu albajuc yepal xc'ulet ochel ti ca'etique. Xc'uyc'un no'ox ti amoctac ti mu albajuc yech'omal xc'ulet ta x'ech' ti carretaetique, ti ca'etic cajal yajval yu'une.

¹¹ Ta scotol bebetic avu'un, yan sba ta xcom yav svoy ti sca'ique. Ta smilic ta espada ti ateclumale. Ta sjipic yalel ta lum ti muc'tiquil oyetic avu'une.

¹² Ta xelc'anic batel ti abolomaltaque, ameyoj avoc ac'ob ta xacom yu'un. Ta slilinic ta j'ech'el ti amoctaque. Ta sjinesic yalel ta lum ti c'upil sba naetic avu'une. Ta sjipic ochel ta nab ti tonetique, ti ts'am-te'etique xchi'uc scotol ti xvoch'oliltaque.

¹³ Jech ta xc'ot ta tubel cu'un ti xvochet no'ox ti q'uejimoletic avu'une. Laj to sc'oplal ta ya'yiel ti xlomet no'ox ti arpaetic avu'une.

¹⁴ Ta joybinot ta jun t'ajal ton, j'ech'el ta stsuts ac'oplal. Mu'yuc xa ta xatam aba liquel ta sventa staquintasobil ti stsacobil xchoye. Jech laj cal ti vu'un Ajvalilune. Ti Ajvalilune, mu lo'iluc no'ox ta xcal.

¹⁵ “Ti vu'un Diosune xi ta xcalbe ti Tiroe: Ta xniquic ta xi'el ti muc'tiquil lumetic oyic ta ti' nab c'alal ta xa'iic xc'ulet no'ox ta xalilije, xchi'uc ti x'avlajetic no'ox yayijesatic ta milel ti jnaclejetic avu'une.

¹⁶ Scotol ti ajvaliletic oyic ta ti' nabe, ta xyalic talel bu chotolic ta spasob mantalique. Loc' xutic ti smochib c'u'ique, xchi'uc ti sc'u'ic luchbil leque. Batem xa xch'ulelic ta xchotan sbaic ta lumtic. Xnicnun xa batem xa xch'ulel ta xi'el ti laj sq'uel c'u s'elan c'ot ta atojole.

¹⁷ Va'i un, xi ta xlic sq'uejintaic q'uejimol ta sventa ti alajel atubele: ‘Vi la s'elan lac'ot ta tsutsel un, yajval lum ti cajal ac'oplal nacaloxuc ta ti' nabe. Ti vinajem ac'oplalic atuc no'ox cuchem avu'unic oyoxuc ta ti' nabe, ti vo'ot xchi'uc ti avinquileltaque, laj avac'an xi'el ta sjunul banomil.

¹⁸ Ti lac'ot xa ta tsutsel tana une, xniquic ta xi'el ma' ti jnaclejetic oyic ta ti' nabe. Ti tub ta ac'oplal tana une, ti jnaclejetic ta banomil joyobtabil ta nabe, mu x'ech' ta xa'iic ti xi'ele.’

¹⁹ “Ti vu'un Diosune xi ta xcale: Lilijem ta xacom cu'un jech c'u cha'al yan lum ti mu junuc yajval nacal tana le'e. Ta xcac' que jti' smut'iucot yalel ti natil nabe.

²⁰ Mut'ijan yalel ava'i bu oy ti animaetic ech'ic ta naclej ta vo'nee. Ta snatil to banomil ta jtenot yalel un, jteclum ti j'ech'el lilijeme. Ta xachi'in ta naclej ti buch'utic chamemic xae. Laj c'op un ma' ti ta xavich' cha'va'anel ta banomil bu nacal ti jnaclejetique.

²¹ Xi'bal sba ma' ti c'u s'elan ta joybinote. Laj c'op ma' ti li' xvic'vun asate. J'ech'el labat, manchuc mi xvalc'uj sutbijic ta sa'elot. Ti vu'un Ajvalilune, mu stselbuj ti jc'ope.”