Ezequiel 24 - Bible in Tzotzil de Chamula

Ti bin vinaje

¹ Ta slajunebal (10) c'ac'al yu'un ti slajunebal (10) u ta sbalunebal (9) jabile, xi laj yalbun ti Dios laj sc'oponun talele:

² “Ti yual sc'ac'alil tana li'e, bejano ta ts'ibael ta vun, yu'un ti ajvalil yu'un ti Babiloniae ta stsac ta leto ti jteclum Jerusalén tanae.

³ Va'ano aba ta c'opojel ta jventa ti xi xavulvun liquel ta nichimal c'ope, ti ja' yuni c'oplalic q'uelel ta stojolic ti toyobba jteclume: ‘Cajano ta c'oc' junuc bin, ac'bo ya'lel.

⁴ Tic'o ochel ep ta bej beq'uet, ti naca sbec'tal yo'e, xchi'uc ti sc'unil bec'tal oy ta spate, xchi'uc baquetic ti bu xc'ot toe.

⁵ Tsaco talel jcotuc bu c'upil sba ti chij une. Latsbo si'il ti bin yo' ta xvocan leque, ja' to ti c'uxi ta xcoluc ta ta'ajel ti sbaquile.

⁶ ‘Yu'un xi ta xal ti Diose: Mu xa ono'ox cha'bel un, jmilvanej jteclum. Co'ol s'elan bin cuxinem ta j'ech'el, spac'oj sba ta j'ech'el ti xcuxe. Maso loq'uel ta jujun ti beq'uete, pochol comuc ti bine.

⁷ Malem ta j'ech'el ti ch'ich' ta jteclume, ja' no'ox un, mu malemuc ta lum yo' ta xmuquij ta pucuc. Le'e, ta sba t'ajal ton, malem.

⁸ Ch'an xcut comel ti ch'ich' malem ta ba t'ajal tone, mu ta muculuc, yo' jech ta xlic tiluc ti sc'ac'al co'ntone, yich'uc chapanel.

⁹ ‘Yu'un xi ta xal ti Diose: Mu xa ono'ox cha'bel un, jmilvanej jteclum. Vu'un ta jtiles ti muc' ta c'oq'ue.

¹⁰ Ich'o talel epal si' ti vo'ote, lometuc no'ox avu'un ti c'oq'ue, ta'ajuc lec ti beq'uet avu'une, uluc ta j'ech'el ti ya'lele, c'ac'uc ya'i ti baquetique.

¹¹ Ti xocol bine, cajano muyel ta c'oc', tsajubuc ta c'oc' ti c'anal taq'uin bine, ti mu'yucuc xa c'usi yatinoj ta xcome, ti mu'yucuc xa ta j'ech'el ti xcuxil ta xcome.

¹² Ti cuxinem ta j'ech'el une, mu xloc' ma' ti xcux ta c'oq'ue.

¹³ ‘Ti vu'une, Jerusalén, oy ta co'nton ta jmes loq'uel ta atojol ti asoquesoj abae xchi'uc ti bu ic'bil avo'nton yu'une. Mu'yuc xc'ot ta pasel ti mesbil tusbil lacom yu'une. Ja' to ta xames xatus yu'un mi laj jbusan talel ta aba ti sc'ac'al co'ntone.

¹⁴ Laj xa cal ti vu'un Diosune. Jech ono'ox ta xc'ot ta pasel. Ta jbain ta spasel. Mu stselbuj ma' ti sc'oplal une. Mu jcha'na'. Laj ma' ti xc'uxul co'ntone. Ta jtsitsot ava'i yu'un ti c'u s'elan ti snopbenal avu'une, ti c'u s'elan laj xa apase. Ti vu'un Ajvalilune, mu lo'iluc no'ox ta xcal.’ ”

Ta xcham yajnil ti Ezequiele

¹⁵ Xi laj yalbun ti Dios laj sc'oponun talele:

¹⁶ “Ti buch'u mu tuch'baj ta avo'ntone, ta jech yepal, ch'ab xi batel cu'un. Mu xapas ti mu x'ech' ta xava'i ti me'inal yu'une. Mu xa'oc' yu'un ta smalel ya'lel asat.

¹⁷ Avo'ntonuc no'ox ti mu x'ech' ta xava'i ti vocole. Mu xachabi sme'unalil jech c'u cha'al ta spas yan ti buch'u ta xcham yu'une. Ma'ucuc ti ch'abal sts'ot ajole, ti ch'abal xa axonob ta xaxanave, ti amacoj xa asat ta scoj sme'unalile, ti xave' pan sventa taje.”

¹⁸ Xilo'ilaj no'ox xchi'uc jnaclejetic ta sob. Ta smalil c'ac'al un, chamem cajnil. Ti ta yoc'omal une, jech laj jpas jech c'u cha'al laj yalbun ti Diose.

¹⁹ Va'i un, ti jnaclejetic ta jteclume xi laj yalbeicune: “Ti vi s'elan ta xapase, albun ca'icutic c'usi svinajeb c'otem ta jtojolcutic.”

²⁰ Xi laj calbeique: “Xi laj yalbun ti Dios laj sc'oponun talele:

²¹ ‘Xi xavalbe ya'i ti lum Israele: Ti Diose xi ta xale: Ta jsoques ti jch'ulnae, ti c'upil sba ta q'uelel ta xavilic ti mu tuch'baj ta avo'nton ta xava'iique, ti atuc xa no'ox mu'yuc buch'u xtaun ta xava'iic yu'une, ti yip avo'nton ta xava'iic yu'une. Ti avalab anich'nabic laj avictaic comel ta Jerusalene, milel xa'i xcham xlajic.

²² Xi xavalbeique: Jech ta xapasic liquel jech c'u cha'al ta jpas vu'une, xavut: Laj ta alel ma' ti ta xamac asatic yu'un ti me'unale, ta sve'el pan ti chapanbil ta sventa taje.

²³ Oy no'ox sts'ot ti ajole. Alapoj no'ox ti axonobe. Nom to ta xc'ot ti me'unale, ti oq'uel avanele. Ta scoj ti mu stac' albel sc'oplal ti c'usi laj apasic une, ta xlaj yipal avu'unic, xaq'uel-q'uelbe aba asatic ta xcha'na'el un.

²⁴ Naca svinajeb c'otem ta aventaic ti c'u s'elan laj spas ti Ezequiele. Scotol ti c'u s'elan laj spas avilique, jech ta xlic apasic ec. Ta xlic ana'ic un ti vu'un Ajvalilune.

²⁵ ‘Ti jch'ulna spojobbail ta xa'iic ti israeletic tana le'e, ta jch'aybe sc'oplal ta stojolic, ti xmuyubaj no'ox xchi'uquic ti yutsile, ti batem satic ta sq'uelele, ti mu tuch'baj ta o'ntonal yu'unique. Jech ti squerem stsebique, ta jch'aybe sc'oplal.

²⁶ Ti buch'u xcuch to yu'un jatobal ti jech c'ac'al taje, ta xtal yalbot ava'i slo'il ya'yej.

²⁷ Ta xlic jamuc ave ma' ti jech c'ac'al taj une. Ta xlic c'opojan ta stojolic ti buch'u cuch to yu'un ti jatobale. C'otemot ta svinajeb yu'un ti jteclume. Ta xlic sna'ic unbi vu'un ti Ajvalilune.’ ”