Ezequiel 21 - Bible in Tzotzil de Chamula

Yespada ti Diose

¹ Va'i un, xi laj yalbun ti Dios laj sc'oponun talele:

² “Yojtot, joybijan, q'uelo batel ta stuq'uil Jerusalén, vulvunan ech'el ta scontrainel ti ch'ulna yu'une. Va'ano aba ta c'opojel ta jventa ta scontrainel ti muc' ta lum Israele.

³ Xi s'elan ta xal ti Diose, xavut ya'i: ‘Ta xic'ot ta acontra. Ta jtam ma' ti quespadae. Mu'yuc ta alel mi oy slequil stuq'uil, mi jsa'mulil, ta jmil ya'i.

⁴ Melel xcal un, ta jtam ma' ti quespadae, j'ech'el ta xich'ic cu'un. Mu'yuc ta alel mi oy slequil stuq'uil, mi jsa'mulil, ta jliques ta yolon ti yolon xocon sloq'ueb c'ac'ale. Ta xc'ot cu'un ta yolon ti yac'ol xocon sloq'ueb c'ac'ale.

⁵ Sbejel banomil ta sna'ic ti vu'un Ajvalilun jtsacoj ti quespadae, mi ja'uc ta jq'uej.’

⁶ “Milo aba ta oq'uel ta sba ta sat ti jteclume, ti xtuch'el ta j'ech'el ti avo'ntone, Yojtot.

⁷ Mi oy buch'u ta sjac' c'u cha'al ta xa'oq'ue, albo ya'i vinaj xa sc'oplal oy xa c'usi ta xc'ot ta pasel, ti scotol banomil toj batel xch'ulel ta xc'ot yu'une. Aluneb ta xc'ot yu'un. Mu'yuc xa buch'u spac sc'oplal, scotolic xnicnun yacanic yu'un ti xi'ele. Sta xa yorail un, ta xa xc'ot ta pasel. Mu lo'iluc no'ox ta xcal ti vu'un Ajvalilune.”

⁸ Xi laj yalbun ti Dios laj sc'oponun talele:

⁹ “Va'ano aba ta c'opojel ta jventa, Yojtot, albo ya'i ti vu'un ta jmantal Ajvalilun ti xi s'elan xavale: ‘Juxbil xa sts'ayet no'ox ye ma' ti espadae, ti espadae.

¹⁰ Juxbil xa yo' ta xmilvan. Sts'ayet no'ox yo' ta xac' xojobal.

¹¹ Sts'ayet no'ox yu'unic yo' ta xich' tunesel. Juxbil sts'ayet no'ox ti espadae yo' ta x'ac'bat ta sc'ob ti jmilvaneje.

¹² Oc'an avanan, Yojtot, yu'un yich'oj talel ti oy sc'oplal smilel ti jteclumale, xchi'uc scotol ti jpas-mantaletic yu'un ti Israele. Ti jbel sc'oplal ta xmileic jmoj xchi'uc ti jteclumale, yayijeso aba ta smajel aba yu'un ti yipal xc'uxul un cha'e.

¹³ Mu lo'iluc no'ox ta xcal ma' ti vu'un Ajvalilune.’

¹⁴ “Va'ano aba ta c'opojel ta jventa, Yojtot, liquesbo sjol ti mu'yuc spajeb xlic xcaj ta yayijesvanej ta scapemal sjol ti espadae. Ti xi'bal sba jmilvanej espadae, buyuc no'ox ta sibtas scotol ti jteclume.

¹⁵ Ta xbat xch'ulelic ta xi'el yu'un. Buch'uuc no'ox telajtic ta xcom yu'un. Ti jmilvanej espada cu'une, q'uelel xa ta sna scotolic. Ja' cusbil espada, sts'ayts'un no'ox xojobal, juxbil ye ta milvanej.

¹⁶ Ta jc'an ti juxbilot leque, yao ta bojel ta jujujot ya'i.

¹⁷ Jechun ec ta jliquesbe sjol ta yayijesvanej ja' to ti c'uxi ta x'ech' ti jcapemale. Jech ono'ox caloj ti vu'un Ajvalilune.”

¹⁸ Xi laj yalbun ti Dios laj sc'oponun talele:

¹⁹ “Ac'bo senyail chibuc be c'u sjamlej ti bu ta x'ech' xchi'uc yespada ti ajvalil yu'un ti Babiloniae. Ti chib be ti ta xloc' talel ta muc' ta lume, ac'bo senyail bu jteclumal sq'ueloj batel ti bu ta xch'ac sbae.

²⁰ Tsots sc'oplal ac'o senyail junuc be ti bu ta x'ech' xchi'uc yespada ti ajvalile. Ti jteclumetic q'uelel sc'oplale, ja' ti Rabá yu'un ti amonitaetique xchi'uc ti Jerusalén ti nac'obbail jteclum yu'un ti Judae.

²¹ Ti ajvalil yu'un ti Babiloniae va'al xa bu ta xch'ac sba ti chib bee. Xi ta sjac'olan ti yorail yu'une: Sjimolan xa ti sni' syolobtaque. Sjac' xa sba ta stojol ti diosetic yu'une. St'unilan xa ta sventa secub ti chon bolometique.

²² Ta sbats'i c'ob une, ti sni' yolobe laj yac' iluc ech'el ta stuq'uil Jerusalén. Ta xac' ta na'el un ti ac'o stsac ta leto xchi'uc ti ep ta tos yabtejebtaque, ta yalel mantal ti q'uivanicuc ta milele, ti avanicuc ta yalbel sc'oplal ti ac'-letoe, ti svoq'uicuc ti ti'naetique, ti sbujanicuc ti lum ta joyobe.

²³ Ti jnaclejetic ta Jerusalén une, jutbil no'ox ta xa'iic ti oy c'usi ta xcaj'albatique, yu'un oy lec trate xchi'uc ti ajvalile. Ja' mu'yuc tabil ta na'el yu'unic ti mu xa lecuc x'ilatic ta scoj ti smulique, ti jbel sc'oplal ta x'ochic ta c'abale.

²⁴ Jech o xal ti Ajvalilune xichi ta xcale: Ti mu stac' alel xchopolal laj apasique, ti amilvanejalique, chajal ta q'uelel ti xasa'sunic ta spasel ti c'usi mu lecuc ta q'uelele. Jech o xal ta xa'ochic ta c'abal.

²⁵ “Ti vo'ot une, ajvalil yu'un Israel, ti mu'yuc ach'ulel xava'i aba ta spayel ti c'ope, nopaj xa talel yorail avu'un ta xac'ot ta tsutsel yu'un ti tsitsele.

²⁶ Xi ta xcalbot ti vu'un Ajvalilune: Ta sjipic loq'uel ti sts'ot ajole. Ta stsatsal pojic ti sronail ajole. Jech c'u cha'al ta ba'yele, ts'ij xi c'op un. ¡Ti buch'u peq'uel sc'oplale, cajal ta xc'ot! ¡Ti buch'u cajal sc'oplale, peq'uel ta xc'ot!

²⁷ Scotol ta jlilin ta jsoques ta j'ech'el. Ja' to ta xc'ot ta pasel mi vul ta loq'uel ti buch'u jva'anoj ta xchapanel cu'une.

Stsitselic ti amonitaetique

²⁸ “Va'ano aba ta c'opojel ta jventa, Yojtot, ti xi xavalbe ya'i ti amonitaetic ti ta xchopol-c'opojic ta stojol ti Israele: ye'bil xa ti yespadailique. Chapal xa ta ve'bajel. Cusbil sts'ayts'un no'ox xojobal ta tsutsesvanej.

²⁹ Ti c'usitic laj yilic ti jam ti sba sat yalojique, naca yesomal sjolic laj yalic. Naca jutbil ti c'usitic laj scaj'alique. Espada xa no'ox xve' ta snuq'uic ti buch'u mu'yuc xch'ulel xa'i sbaique, ti jpayc'ope. Nopaj xa talel yorail ti stsitsel ta xc'ot ta stojolique.

³⁰ “Espada, tic'o aba ta ana. Ta xlic jchapanot ava'i ti bu la'ayan talele, ta banomil ti bu lavoq'ue.

³¹ Co'ol s'elan xi'bal sba tilemal c'oc' ta jbusan talel ta aba ti sc'ac'al co'ntone. Ta xcac'ot ech'el ta yoc ta sc'ob pucujil jnaclejetic ti xtojobic ta tsutsesvaneje.

³² Ta xavich' chiq'uel, sts'ijlajan ta xacom. Ta xmal ach'ich'el ta sjunul ti muc' ta lume. Mu'yuc buch'u ta svulesot ta o'ntonal. Jech laj cal ti vu'un Ajvalilune.”