Ezequiel 2 - Bible in Tzotzil de Chamula

Tae ta iq'uel yu'un Dios ti Ezequiele

¹ Ts'acal to un, laj ca'i oy Buch'u xi laj sc'oponune: “Ti vo'ote, Yojtot, lican, va'lan, yu'un ta jchi'inot ta lo'il.”

² Ti jech xvulvun ta xc'opoj ti Buch'ue, lic yu'ninun smuc'ul stsatsal ti Diose, liva'i yu'un un. Laj ca'i ti xi ta xalolanbun ti Buch'u ta xc'opoje:

³ “Yojtot, ta jtacot batel ta stojol israeletic, toyobba jteclum ti laj xa svalopatinicun comele. Ti stot sme'ic laj ech'icuc ta vo'nee, xchi'uc ti stuquique, jech staoj yav ta xiscontrainicun ti c'ac'al tana li'e.

⁴ Jech ec ti yalab xnich'nabique, pucujibemic xchi'uc c'usi xal yo'ntonique, pimuneb xchi'uc ti snopbenal yu'unique. Ta xajtac batel ta stojolic ti xi xavalbe ya'iique: ‘Xi s'elan ta xal ti Diose.’

⁵ Mi xayaq'uic ta venta, mi mu'yuc, ipaluc mi laj avalbe ya'ie, yu'un ja' jun toyobba jnaclejetic ti stuque, sna'icuc un ti oy jun j'alc'op ta stojolique.

⁶ “Mu xatsiq'ues avo'nton ta scoj ti c'usiuc no'ox ta xloc' ta alel yu'unique, yojtot, ac'o mi ta xava'i co'ol s'elan volibilot ta ch'ix, mi volibilot ta tsec, manchuc mi spajeb xa no'ox c'u s'elan ta spas satic xchi'uc ti stoyobbailique.

⁷ Ti vo'ote, va'ano aba ta yalbel ya'iic ti jc'ope, mi xich'ic ta muc', mi mu xich'ic ta muc', toyobba xa'i sbaic ono'ox.

⁸ Chiquintao ava'i lec ti c'u s'elan ta xcalbote, mu toyobbaucot ec jech c'u cha'al ti stuquique. Tic'o ta ave, lajeso ti c'usi ta xacac'bote.”

⁹ Va'i un, ta jech to yepal laj quil jun c'obil yilel sye'oj talel jun ts'ibabil balbil vun ta jtojol.

¹⁰ Ti c'obile laj stilch'un ti balbil vun ta jtojole. Ts'ibabil xcha'jotal ti xi s'elan ta xalbe sc'oplale: ti muc'ul ic'al me'inale, ti vocolajele, xchi'uc ti sibtasele.