Ezequiel 19 - Bible in Tzotzil de Chamula

Yoq'uitael ti ajvaliletic yu'un Israele

¹ “Yojtot, xi xlic aq'uejinta q'uejimoletic ta sventa ti jlajel jtubel ajvaliletic yu'un ti Israele:

² ‘Co'ol s'elan jc'ot me' león ma' ti ame' ti jmoj xcapet xchi'uc ti tot leonetique. Laj sva'an jq'uel-osil ta stojolic, ch'i talel yu'un ti yalab ti bu taje.

³ Jcot no'ox tsots sc'oplal laj stuc'ulan ta sts'itesel, laj sta scotlej yu'un. Laj xchan yu'un ta stsaquel ti sve'ele, ti naca smil no'ox ti jnaclejetique.

⁴ Ti muc'tiquil lumetique laj ya'ibeic sc'oplal ti toj jelavem xa'i sbae. Jech o xal laj scotanbeic spets'al ti bajal c'ot yu'une, ti jochbil bat yu'unic ta jun luc-luc taq'uin c'alal to muc' ta lum Egiptoe.

⁵ Ti me' leone, c'alal laj yil ti j'ech'el tub ta be ti oy xa ox c'usi smalaoje, lic sts'ites, lic scolta xtoc jcot ti xchi'iltac ta voq'uel ti yole.

⁶ Ti c'alal sta xa scotleje, tey xa xnabet ti bu ta xbatic ti tot leonetique. Lic xchan ta stsaquel ti sve'ele, ti naca smil no'ox ti jnaclejetique.

⁷ Mu sventauc c'uc no'ox spasbe ti muc' ta naetic bu tsots sc'oplale, naca soquesel no'ox yu'un ti jteclumetique, xnicnun yu'un scotol banomil ta loquetel ti snuq'ue.

⁸ Ti jnaclejetic ti joyol ta spat ta xocon ti nopol oyique, lic sjolic ta scontrainel. Och ta pets' yu'unic c'alal laj sc'otanbeic ti spets'ale.

⁹ Jochbil bat yu'unic ta xot-xot taq'uin, ba sbajic ta corral te'. Yic'ojic batel ta stojol ti ajvalil yu'un ti Babiloniae. Lapal c'ot ti bu taje yo' ch'am xi ta loquetel snuc' ta vitstic yu'un ti Israele.

¹⁰ ‘Ti co'ol s'elan jtec' uva ti ame' teq'uel ta ti' vo'e, ti naca xac' no'ox ti sate, limil no'ox ti sc'ob-c'obtaque, ta sventa ti col xa no'ox albat ta xmaltae.

¹¹ Tsots ta j'ech'el ch'i ti sc'ob-c'obtaque, tun ta xvaxton ti ajvaliletique. Ch'i ta j'ech'el ti c'ot c'alal to toc ti sni'e. Vinaj sc'oplal ta j'ech'el ti toyol bate, ti limil no'ox ti sc'ob-c'obtaque.

¹² Laj sjipic loq'uel ta scapemalic, yal yu'unic ta lum un. Taquij yu'un ic' ti lic talel ta sloq'ueb c'ac'ale, yal ta lum ti sat une. Ti sc'obtac stsacoj yip xchi'uque, taquij, laj sjipic ochel ta c'oc'.

¹³ Teq'uel xa ta sbajtical banomil tana le' une, ta staquinal banomil bu ch'abal jsetuc ti vo'e.

¹⁴ Ti ta sc'obtaque, ta xloc' talel tilemal c'oc' ta xchiq'uel ti sq'uelomtaque xchi'uc ti sate. Mu'yuc xa tsots sc'obtac ta sventa xvaxton ti ajvaliletique.’ ” Taj une, me'inal q'uejimol com o ta sventa sq'uejimolal ti jlajel jtubele.