Ezequiel 17 - Bible in Tzotzil de Chamula

Ti jtec uvae xchi'uc ti jcot muc' ta xique

¹ Ti Diose xi laj yalbun ti laj sc'oponun talele:

² “Yojtot, co'oltaso ya'i junuc joyob c'op ta slo'iltabel ti Israele.

³ Xi xavalbe une: ‘Ti Diose xi s'elan ta xale: Vul muc' ta xic ta Líbano pochol no'ox smuc'ul xiq'ue. Mu tsalbaj ta j'ech'el ti xvililete, ti ep ta tos xlaplun ti sc'uc'umale. Loch'ol c'ot ta sni' ti ch'ut te'e.

⁴ Laj stuch'be jep sc'ob ti oy ta toyole. Bat sts'un ta steclumalic ti jbolomajeletique, jun jteclum busul no'ox ti sbolomale.

⁵ Laj stam ta banomil un jbej sat ts'unubil ti bat sts'un ta jun lequil ve'ebal banomil ti oy ta ti' uc'um yepal no'ox ti vo'e.

⁶ Voc' talel ti sat ts'unubale, joybij ta jtec' uva, limil no'ox ta j'ech'el. Ac'o mi peq'uel no'ox bat un, laj sliman ech'el sc'ob-c'obtac ti bu oy ti xique, c'alal yacal ta sts'unan ech'el yibel ta banomile. Jetsel no'ox c'ot ta jtec' uva un, yepal no'ox sq'uelomtac xchi'uc limil no'ox sc'ob-c'obtac.

⁷ “ ‘Oy to jcot muc' ta xic, pochol no'ox smuc'ul ti xiq'ue, pim ti sc'uc'umale. Va'i un, ti uvae laj sts'un batel yibel, laj sliman ech'el sc'ob-c'obtac ti bu oy ti xique, ta snamaluc to, ich'batuc talel yepal vo' ti bu to teq'uele.

⁸ Manchuc mi jech un, teq'uel ono'ox ta lequil banomil, ti yepal no'ox oy ti vo' bu oye, ti slimanuc no'ox ech'el ti sc'ob-c'obtaque, ta yaq'uel ti sat xtoque, ti jetsel no'ox ta jun c'upil sba uvae.’

⁹ “Va'ano aba ta jventa ti xi xalbe ya'iique: ‘Xi ta xal ti Diose: Ti jpets uva li'e, mu cha'bel xchanbe yip. Ba'yel ta xjots'ilanbat yibeltac yu'un ti muc' ta xique, ta xlic bajuc ti sat yu'une. Ta juteb xa no'ox yipal, mu xa yepaluc yajval bul xi loq'uel xchi'uc yibel. Ta xtaquijuc liquel un ti sq'uelomtac ti uninic xa ta ch'iele.

¹⁰ Manchuc mi ta to xich' cha'ts'unel, mu xa cha'bel xq'uelomaj. Ta xtaquij o yu'un ic' ti ta x'ech' majeuc ti ta xlic talel ta sloq'ueb c'ac'ale. J'ech'el ta xtaquij o ti bu oy sc'oplal ta xch'i talel ti sq'uelomtaque.’ ”

¹¹ Xi laj yalbun ti Dios laj sc'oponun talele:

¹² “Jac'bo ca'itic ti toyobba jteclum li'e, mi xa'ibeic smelol c'usi ta xac' ta na'el ti joyob c'op taje. Xi xavalbe ya'iic une: ‘Ti ajvalil yu'un ti Babiloniae vul ta Jerusalén. Laj xchucan ti ajvalil yu'un ti Judae xchi'uc ti yaj'opisialtaque. Laj yic'anan batel ta Babilonia.

¹³ Laj stsatsal suj ti spasicuc strate xchi'uc jun snitilul ti ajvalile, ti laj yalbe ti mu sutes yee. Ti c'u yepal ich'bil yeic ta muc' ta lume, laj sbec' batel

¹⁴ yo' j'ech'el ta xlaj yipe, mu xa stam sba liquel ta ajvalilal ta Juda manchuc mi yac'oj ye ta xc'ot ta pasel yu'un ti tratee, ti j'ech'el mu stselbuj sc'oplale.

¹⁵ Snitilul ti ajvalil taj une, lic stoy sba ta stojol ti ajvalil yu'un ti Babiloniae. Laj stac batel yajtuneltac ta jteclum Egipto ta sc'anel ca'etic xchi'uc yepaluc no'ox ti viniquetique. Ti va'i s'elan taj une, ¿mi tac'al to ta xc'ot avu'un xana' un, mi ta to stam sba liquel, xchi'uc mi xu' to ta xcuxi? ¿Mi oy xa ono'ox la xana' q'uelbil ta xcom ti buch'u mu xc'ot ta pasel yu'un ti tratee?

¹⁶ “ ‘Ti vu'un Ajvalilune, j'ech'el ta jva'an jba ta yalel ti ta xc'ot lajuc ta Babilonia ti buch'u naca no'ox laj yixtol-c'opta mu'yuc xc'ot ta pasel yu'un ti trate ti laj xchapic lec xchi'uc ti ajvalil ti ac'bat yich' yabtel yu'une.

¹⁷ C'alal ta xlic volvanuc ti ajvalil yu'un ti Babiloniae, ta xlic sbujanan ti lume, xchi'uc ta smeltsanbe smocal ta joyob ti lume, ta smilel yepal ti jnaclejetique. Ti faraone, mu stac talel epal soldadoetic ta spacbel sc'oplalic yu'un, mi ja'uc ti epal viniquetique.

¹⁸ Ti c'usi loc' ta yee, laj yixtol-c'opta. Mu'yuc xc'ot ta pasel yu'un ti strate ti yaloj ta xc'ot ta pasel yu'une manchuc mi jech un vi s'elan laj spas scotol le' une. Laj to c'op ti cuxul ta xbat une.

¹⁹ “ ‘J'ech'el xi ta jva'an jba ta yalel ma' ti vu'un Ajvalilune: Jeche' no'ox laj yixtol-c'opta ti c'u s'elan laj yac' ye ta jtojole. Mu'yuc xc'ot ta pasel yu'un ti strate laj spas ta jtojole. Ta xquich'be ye sti' ya'i un.

²⁰ Ta jipbe talel ta sba ti syacobile, ta jts'ot ya'i xchi'uc. Ta xquic' ech'el ta Babilonia. Ti bu taje, ta xlic jchapan jc'op xchi'uc ta scoj yan ti sjol yo'nton ta jtojole.

²¹ Ti yajsoldadotac xtojobic leque, ta xchamic ta letovajel. Ti bu cuxul to ta xcomique, tan puc ta xbatic ta xchanjotal banomil. Ta xlic sna'ic un ti vu'un Ajvalilun lic'opoje.’ ”

²² “Ti vu'un Ajvalilune xichi ta xcale: Ta jtsac junuc sc'ob ma' ti ch'ut-te' oy ta toyole. Ta jepbe junuc yuninal sq'uelom ti spajeb oy ta toyole. Ta jts'un jtuc ta jun toyol vits ta j'ech'el.

²³ Ti bu slajeb toyol vits yu'un ti Israele, ta slim sba ti sc'obtaque, ta xac' lec sat, ta xc'ot ta jun c'upil sba lequil te'. C'usiuc no'ox chanul lamal no'ox ta xcux yo'ntonic ta yolon yaxinal squeoval ta yolon yaxinal ti sc'obtaque. C'usiuc no'ox mutaletic ta smeltsan stasic ta yolon yaxinal squeoval ti sc'ob-c'obtaque.

²⁴ Scotol ti co'ol te' oy ta osiltique, ta xlic sna'ic ti vu'un Ajvalilune. Jbainoj ta slomesel ma' ti uni toyobba te' xa'i sbae. Ta jtoyesbe sc'oplal ma' ti co'ol s'elan uni biq'uit te' xa'i sbae. Jbainoj ta staquijesel ma' ti uni yaxal te' xa'i sbae. Ti uni taqui te' xa'i sbae, ta jyaxubtas. Jech xcal, ta xc'ot ta pasel cu'un ma' ti vu'un Ajvalilune.”