Ezequiel 16 - Bible in Tzotzil de Chamula

Yan sjol yo'nton ti lum Jerusalene

¹ Xi laj yalbun ti Dios ti laj sc'oponun talele:

² “Yojtot, ac'bo sna'ic ti c'usitic mu stac' q'uelel ta spasic ti lum Jerusalene.

³ Xi xavalbe ya'iique: ‘Xi ta xal ti Diose: Ti ats'unubal bu liquemot talel, Jerusalén, cananea lavoc', jun amorreo vinic ma' ti atote, hitita ants ti ame'e.

⁴ Ti sc'ac'alil lavoq'ue, mu'yuc xtuch'ic amixic', mi ja'uc laj avich' poquel, mu'yuc xavich' jaxel ta ats'am, mu'yuc xats'ale.

⁵ Mi junuc oy buch'u tsots sc'oplal laj ya'i ti c'uxubaj yo'nton ta atojol ta spasbelot scotol taje. Ti sc'ac'alil lavoq'ue, laj sjipoxuc comel ta osiltic, j'ac'-ib-o'nton laj yiloxuc.

⁶ “ ‘Li'ech' ta ats'el un. Laj quil ti xtelajan avacan xchi'uc avic'obale. Loc' ta co'nton ti cuxiane.

⁷ Lach'i lac'opoj cu'un jech c'u cha'al jtec' momol ta osiltic. Lach'i, lamuq'uib un, la'elomaj ta ants, bejelic no'ox liquel ti avuni chu'e, xlimet no'ox ti avuni jole. Le' une, j'ech'el cuxul t'analot un.

⁸ “ ‘Ts'acal to un, li'ech' ta ats'el, yorail xu' xa xamalij laj quil un. Laj jmacot ta jc'u'. Pixil lac'ot cu'un ti jech t'analote. Laj cac' que, laj jpas jtrate ta atojol, lac'ot ta cu'un. Ti vu'un Ajvalilune, mu lo'iluc no'ox ta xcal.

⁹ “ ‘Laj catintasot. Laj jpoc loq'uel ti ach'ich'ele. Laj jaxbot muil poxil.

¹⁰ Spajeb yutsil sbontac ti c'u'il laj cac'bot alape. Naca lequil nucul laj cac'bot alap ti axonobe. Meltsanbil ta xela no laj cac'bot jlic achuc, xchi'uc jlic c'u'il c'upil sba jalbil.

¹¹ Xatixet no'ox cu'un xchi'uc ti c'usitic spajeb c'upil sbae. Laj cac'bot xoj nuc' c'abal ta ac'ob. Laj cac'bot avuni uil nats'.

¹² Laj jtsoyanbot uni xotol taq'uin ta ani'. Laj jtsoyanbot staq'uinal achiquin. Laj cac'bot alap jun yutsil sronail ajol.

¹³ Ajunul xatixet no'ox lacom ta oro ta plata. Naca xela saquil poc' ti ac'u'tac ti c'upil sba jalbil ti ep ta tos c'upil sba ti sbontaque. Naca lec ti ave'el avuch'om ta xalajese. Naca ajapom xchi'uc aceite olivo ta xatunes. Ti xi s'elan spajeb xa no'ox avutsil lac'ot xchi'uque: lac'ot ta me' ajvalil un.

¹⁴ Puc batel ta jujun muc'tiquil lum ti xatixet no'ox xchi'uc ti avutsile. Ch'ayal c'ot ch'ulelal yu'un ti jun avutsil laj jtixanote. Ti vu'un Ajvalilune, mu lo'iluc no'ox ta xcal.

¹⁵ “ ‘Le' une, laj syacot ti avutsilale, xasa'sun xa liquel ta sbolomalinel aba ta stojol ti bu puquem batel sc'oplal ti avutsilale, xavac' no'ox aba ta stojol scotol ti buch'u ta x'ech'ique.

¹⁶ Laj ameltsan snail c'opojebaletic ta jujun stselej ta ac'u'tac no'ox, lic abolomalin aba xchi'uc.

¹⁷ Ti c'usitic laj jq'uelanbot ti meltsanbil ta oroe, ta platae, lic aloc'taan loc'obbailetic xchi'uc yo' ta xabolomalin aba yu'un.

¹⁸ Laj avac'be sc'u'in ti c'upil sba c'u'iletic ti ep ta tos sbone. Laj avac'be ti caceitee, ti jpome.

¹⁹ Ti naca lequil ve'lil laj cac'bote, ti t'ujbil harinae, ti lequil aceite xchi'uc ti lequil ajapom laj cac'bot ave'eline, laj avac'be smotonin ti jun yutsil smuil une. Ti vu'un Ajvalilune, mu lo'iluc no'ox ta xcal.

²⁰ “ ‘Ti jqueremtique xchi'uc ti jtsebtic laj quiltique, laj avac' ta c'abal ti yich'uc milel ta sventa sve'el ti loc'obbailetic meltsanbil avu'une. ¿Mi mu tsotsuc sc'oplal xana' lajoybij ta sbolomalinel aba xchi'uque?

²¹ Laj avac' ta milel ti jnich'nabe. Laj avac' ta chiq'uel ta sventa yich'el ta muc' ti meltsanbil loc'obbailetic une.

²² Le' une, mu xa stac' alel ti c'u s'elan acuxlej ta sbolomalinel abae. Mu xa xavules ta ajol c'alal t'analot ta anene'al to oxe, ti abol aba xteltun avacan xchi'uc ti avic'obale.’ ”

²³ “Ti vu'un Ajvalilune, xi s'elan mu stselbuj ma' ti jc'op ta xcale: Mu xa ono'ox cha'belucot un, yu'un scotol ti c'usitic laj apase,

²⁴ buyuc xa no'ox ta jujun toyol stselej vits jamal laj atae, laj ameltsan c'opojebaletic sventa yich'obil ta muc' ti loc'obbailetique, laj abolomalin aba xchi'uc un.

²⁵ Yabtel ti bu laj atam batel une, laj ameltsan c'opojebaletic ti bu taj une, mu stac' alel c'usitic lic apas xchi'uc ti xtixet no'ox avutsile. Laj abolomalin aba ta stojol ti buch'utic ta x'ech'e.

²⁶ Lec no'ox laj ava'i ta sbolomalinel aba xchi'uc ti alac'natac ti egipcioetic xyal o xchi'uquique. Laj aliquesbun sc'ac'al co'nton ti avac'ojbe yipal ta sbolomalinel abae.

²⁷ “Va'i un, xi s'elan laj jyales coc jc'ob ta stsitselote: Mu xa ta lec ti c'usitic ta xtun avu'une, jq'ueloj xa no'ox laj jtacot ech'el ta slumal ti filisteoetic ti xti'et sjol ta atojole, ti mu lecuc ta xil ti c'usitic q'uexlal sba ta xapase.

²⁸ “Mi ja'uc ech' o laj ava'i, lic abolomalin aba xchi'uc ti asirioetique. Mu'yuc no'ox x'ech' avo'nton xtoc un.

²⁹ Lic avac'be yipal ta sbolomalinel aba xchi'uc ti babiloniaetique, steclumal ti jbolomajeletique, mu'yuc x'ech' avo'nton xtoc un.

³⁰ “Ti vu'un Ajvalilune, mu stselbuj ma' ti xi ta xcale: Yan xa no'ox sba ma' ti xchamel avo'nton ta sbolomalinel aba ti q'uexlal sba ta j'ech'ele.

³¹ Yabtel scotol taj une, bu xa jujuti' jamal ti toyol stselej vitse, laj ameltsan altar yich'obil ta muc' ti loc'obbailetique, laj abolomalin aba xchi'uc un. Ti vo'ot une, xi s'elan mu jech laj apas jech c'u cha'al ti buch'u ta sbolomalin sbae: Mu'yuc xac'an atojol ti vo'ote.

³² “Ti ants buch'u smucul satioj ti smalale, lec xa xa'i ta xac' ochuc ti yan vinique.

³³ Scotol ti buch'u sna' sbolomalin sbae, ta xich'ic tojel. Ti vo'ot une ta xatoj. Ta xavac'be smoton scotol ti buch'u xch'ayobil ajol xchi'uc ti buyuc no'ox taluc ta sa'el amul xchi'uque.

³⁴ Ta sbolomalinel abae, xi s'elan ti mu jechuc ta xapas jech c'u cha'al ti yan antsetique: Ma'uc ta sa'icot ta stael amul xchi'uc, mi ja'uc ta stojicot, ta xatoj ti vo'ote. Ja' xa no'ox sjeloj sba taje.

³⁵ “Ants, ti xana' xabolomalin abae, a'yio ava'i ti jc'op ti ta xcalbote.

³⁶ Ti vu'un Diosune xi ta xcalbote: Laj xa avinajes aq'uexlalil ta j'ech'el ta sbolomalinel aba xchi'uc ti xch'ayobil ajole, xchi'uc ti loc'obbailetic avu'un ti mu stac' albel sc'oplale, xchi'uc ti laj amalbe xch'ich'el ti avalabtac ti c'ot ta matanal avu'une.

³⁷ Jech o xal ta jtsob talel scotol ti xch'ayobil ajol ti laj atabe ti yo'ntone, xchi'uc scotol ti laj yic'bot avo'ntone, xchi'uc ti buch'u ti' ajol yu'une. Ta jvol talel ta atojol, ta sba ta satic scotolic, cuxul t'analot ta j'ech'el ti yilicuc ti aq'uexlalile.

³⁸ Ta jchapanot ava'i un, ta scoj ti laj abolomalin abae, xchi'uc ti lamilvane. Ta sti'emal, ta scapemal jol, ta xacac'ot ta milel.

³⁹ Ta xcac'ot ta sc'obic yo' ta slilinic ta j'ech'el ti bu avavil ta sbolomalinel abae, xchi'uc ti yich'obil ta muc' ti loc'obbailetique. Ta slilinic ta j'ech'el ti ac'u'e, xchi'uc ti c'usitic c'upil sba xach'alet xchi'uque. J'ech'el cuxul t'anal ta xayictaic comel.

⁴⁰ “Ta xlic sjol ti jteclum ta scontrainelote. Ta xaspujbeic ton. Ta xasmilic ta yespadaic.

⁴¹ Ta sjumbeic sc'ac'al ti anataque. Ta sba ta sat scotol ti yan antsetique, ta xchapaj ti amule. Ta jtsutsesbe sc'oplal ti jech ta xabolomalinel abae, ta xch'ay stojel avu'un ti xch'ayobil ajole.

⁴² Va'i unbi, ta xlamaj ti sc'ac'al co'nton ti mu ts'icbaj ta xca'i ta atojole, mu xa xi'ilin un.

⁴³ Ch'ay ta avo'nton ti c'u a'elan ta atsebal to oxe, ti c'u s'elan mu stac' alel ti c'usitic ta xapas ti laj asoquesbun ti co'ntone. Ta jtsitsot ava'i yu'un le'e ti yan avuni talele. Ti vu'un Ajvalilune, mu me lo'iluc no'ox ta xcal.

C'u s'elan ti me'ile, jech ti antsil olal eque

⁴⁴ “Scotol ti buch'utic xac' sjolic xlo'ilajic ta joyob c'ope, xi ta xalic ti ja' avuni c'oplale: ‘C'u s'elan ti me'ile, jech loc' ti antsil olale.’

⁴⁵ Yantsil olot me'il ti xti'et sjol yu'un ti smalale, xchi'uc ti yalabtaque. Xti'et sjol yu'un smalalic ec xchi'uc yalabic ti achi'iltac ta voq'uele. Hitita ants ma' ti ame' acotolique. Amorreo vinic ti atotique.

⁴⁶ “Ti avix ti oy ta yolon ti yolon xocon sloq'ueb c'ac'ale, co'ol s'elan lum Samaria xchi'uc ti bic'tal jteclumetic yu'une. Ti amuc ti oy ta yolon ti yac'ol xocon sloq'ueb c'ac'ale, co'ol s'elan lum Sodoma xchi'uc ti bic'tal jteclumetic yu'une.

⁴⁷ Laj achanbe yuni talelic un, jech lic apas ti c'usitic mu stac' alel ta spase. Mu'yuc x'ech' o ava'i un, x'ech to labat, jc'ol mu sta ti stuquique.

⁴⁸ “J'ech'el xi ta jva'an jba ta yalel ti vu'un Diosune: Ti achi'il ta voq'uel lum Sodomae, xchi'uc ti bic'tal jteclumetic yu'une, mu jechuc laj spasic jech c'u cha'al ta xapas xchi'uc ti bic'tal jteclumetic avu'une.

⁴⁹ Ti smul laj sta ti achi'il ta voq'uel Sodomae, xi s'elane: Ti stuque xchi'uc ti bic'tal jteclumetic yu'une, stuc xa no'ox xa'iic ma' ti busul c'usitic ta stun slajese. Mu'yuc c'usi sna'ic ti cuxulique. J'ech'el mu'yuc xt'olbijic ta scoltael ti me'une, xchi'uc ti buch'utic ch'abal c'usi x'ayan yu'une.

⁵⁰ Stuc xa no'ox mu'yuc buch'u xtaun xa'iic ta j'ech'el, lic spasic ti c'usi mu stac' alel ta xquile. Laj jtubbe sc'oplal un jech c'u cha'al ta xavile.

⁵¹ “Ja'uc ti lum Samariae, mi o'loluc laj spas jech c'u cha'al ti amule. Xjelav laj apas ti c'usi mu stac' albel sc'oplale. Mu stac' xaco'oltas aba xchi'uc, ch'abal smul yilel un.

⁵² Ts'ico ava'i ti bisel ta cotol chaval une. X'ech' to laj apas ti c'usitic mu stac' albel sc'oplale, mu sta laj spasic ti achi'iltac ta voq'uele. Vinaj ti ch'abal smulic yilel une. Ts'ico ava'i ti vocol ta q'uexlale, mu stselbuj ac'oplal. Ts'icuc avu'un ti bisel ta cotol chavale. Laj avinajes atuc ti mu'yuc smulic yilel ti achi'iltac ta voq'uele.

⁵³ “Ta jcha'ac'beic slequilal yutsil ti lum Sodomae, ti Samariae xchi'uc ti bic'tal jteclumetic yu'une. Ta jcha'ac'bot un, mu'yuc c'usi xana' liquel.

⁵⁴ Ts'ico ava'i un ti bisel ta cotol chavale, q'uexavan liquel yu'un c'usitic laj apas une, ti ta aventa spatoj liquel yo'nton avu'une.

⁵⁵ C'alal ta staic liquel ti lum Sodomae, ti Samariae xchi'uc ti jteclumetic yu'un jech c'u cha'al staojic ta ba'yele, ti vo'ote xchi'uc ti bic'tal lumetic avu'une, ta xacha'ta ec un.

⁵⁶ Atuc no'ox mu'yuc buch'u xtaun laj ava'i, lalabaj yu'un stsitsel ti achi'il ta voq'uel Sodomae

⁵⁷ c'alal mu'yuc to ox vinajem ti spajebal c'usi chopol ta xapase. Tana le'e, ti edomitae, ti filisteoe, xchi'uc scotol ti alac'nataque, ta sti'oltaot, bajbil tenbilot yu'unic scotol.

⁵⁸ Ts'ico ava'i tana un ti tsitsel yu'un ti c'usitic mu stac' alel xchopol laj apase. Ti vu'un Ajvalilune, mu lo'iluc no'ox ta xcal.

⁵⁹ “Xichi ta xcal ti vu'un Diosune: Ta xcac'bot atoj ava'i ti c'u s'elan loc' ta sa'el avu'une. Mu'yuc xc'ot ac'op, tselbuj avu'un ti tratee.

⁶⁰ Ti vu'une, bejel ta jol ti trate laj jpas ta atojol c'alal atsebal to oxe. Ti trate laj jpas ta atojol un, j'ech'el ta xcom o.

⁶¹ C'alal ta xc'ot ta atsebtac cu'un ti avixe xchi'uc ti amuque, ti ma'uc ta sventa ti jtratee, ta xvul ta ajol c'u s'elan la'ech', ta xaq'uexav yu'un.

⁶² Ta xcach'ubtas ti jtrate ta atojole. Ta xlic ana' ti vu'un Ajvalilune.

⁶³ Ta xavules ta ajol un. Ta xlic ava'i q'uexlal yu'un ti bisel ta cotol chaval ta xbet'bunel ave ta yalel ti laj jch'ay amul yu'un scotol ti c'usitic laj apase. Ti vu'un Ajvalilune, mu lo'iluc no'ox ta xcal.”