Ezequiel 12 - Bible in Tzotzil de Chamula

Ti Ezequiele ta scaj'al ti bec'bil ta xloq'uique

¹ Ti Diose xi laj yalbun ti laj sc'oponun talele:

² “Ti vo'ote, yojtot, li' capalot ta naclej xchi'uc ti jun jteclum ti toj toyobbae. Oy satic yo' ta xilic ti osil banomile, c'u stu un, mu xilic ti c'usi leque. Oy xchiquinic xtoc yo' ta xa'iic ti c'usi ta xich' alele, c'u stu un, mi ja'uc xa'ibeic xchiquinal. Yu'un ja' jun jteclum ti toj toyobbaique.

³ “Ja' yu'un un, chapano aba xchi'uc ti c'usitic tsots sc'oplal ta xtun avu'une, yu'un ta xaloc' batel. Ta c'ac'altic, lec ta sba ta sat scotolic, loc'an batel ta ana. Tamo batel abe, yic'al nan ti ja' to ta sna' sbaic ti ja' jun toyobba jteclume.

⁴ Ta c'ac'altic, lec ta sba ta sat scotolic, loq'ueso scotol ti c'usitic ta xtun avu'une yo' ta xavich' batel ta yanlum. C'alal mi mal ti c'ac'al xtoque, ta sba ta sat scotolic, biso aba ti co'ol xa s'elan bec'bil ta xabat ta yan jteclum yilele.

⁵ Mi laj taj une, jomo jutebuc ti moque. Tey ta sba ta satic scotolic, loc'an xchi'uc ti c'usitic oy avu'une.

⁶ C'alal ta xyam xa talel ti osile, cucho scotol ti c'usitic oy avu'une. Ta sba ta sat scotolic, ta xaloc' batel xchi'uc. Yo' jech mu xavil ti bu ta xaxanav batele, maco loq'uel ti asate. Yu'un ta jc'an ti ja' xa svinajeb ta xac'ot yu'unic ti mu xa yanuc jech ta xc'ot ta stojolic ti jteclum Israele.”

⁷ Lic jchapan ti c'usitic oy cu'un jech c'u cha'al laj yalbun ti Diose. Ta c'ac'altic, xich'etet loq'uel xchi'uc ti c'usitic oy cu'une, ti co'ol xa s'elan bec'bil ta xibate. C'alal mal xa tal ti c'ac'ale, li'och ta sjomel ti moque. C'alal xyamet xa talel ti osile, ta sba ta sat scotolic, jcuchoj xa loq'uel ti c'usitic x'ayan cu'une.

⁸ C'alal sacub ti osil ta yoc'omale, xi laj yal ti laj sc'oponun talel ti Diose:

⁹ “Ti israeletic ti ja' toyobba jteclume, ta j'ech'el ta sjac'bot c'usi smelol ti jech ta xapase.

¹⁰ Albo ya'i ta jventa ti ja' scaj-bijubtasel ti ajvalil yu'un ti jteclum Jerusalene, xchi'uc scotol ti israeletic ti tey nacalique.

¹¹ Albo ya'i ti vo'ot lac'ot ta svinajeb ti oy c'usi ta xc'ot ta stojolique, ti jech ta spasic ec jech c'u cha'al ti laj avac' ta q'uelele. Yu'un ti stuquique bec'bil ta xloq'uic ec.

¹² Yu'un ti banquilal avu'unic teye ta xcuch loq'uel ti c'usitic oy yu'un eque. C'alal ta xyam xa talel ti osile, xch'etet loq'uel ec xchi'uc ti c'usitic oy yu'un ti bu jombil ti moque. Smacoj xa sat ta xloc' batel yo' jech mu x'ojtiquinat, xchi'uc yo' jech mu xil ti c'u s'elan ta xcom ti jteclume.

¹³ Jech ti vu'une ta jipbe talel syacobil ti ta sts'otat lec yu'une. Ta xquic' batel ta jteclum Babilonia, ta yosilic ti caldeoetique, ti naca xa no'ox tey ta xc'ot chamuque, ti mu sc'upin ti osil banomil teye.

¹⁴ Tan puc ta xbat cu'un ta xchanjechal banomil ti epal soldadoetic ti ja' spojobbail ti joyol ta spat ta xocone. Ja' no'ox jech ta jpasbe ta stojolic xtoc ti jvoc' soldadoetic yu'une. Jye'oj no'ox quespada ta jnutsic batel.

¹⁵ “C'alal mi tanijic xa batel cu'un ta yan muc'tiquil lumetique, ja' to ta xlic sna'ic ti vu'un Ajvalilune.

¹⁶ Ja' no'ox un, ta jpas xtoc ta stojolic ti oy to jun chibuc ta xcolic c'alal ta x'ech' ti letoe, ti c'alal ta x'ech' ti vi'nale xchi'uc ti tsots chameletique, yo' jech ti bu ta xc'otic ta jteclumetique, ta xchapbeic ya'i scotol ti c'usitic mu'yuc smelol ti c'usitic laj spasique. Ja' jech ta xlic sna'ic ti vu'un Ajvalilune.”

Ta xlic yich' caj'alel sc'oplal ti vocole

¹⁷ Yan to no'ox velta xtoc xi laj yalbun ti Dios ti laj sc'oponun talele:

¹⁸ “Ti vo'ote, yojtot, nicnunan xa liquel ta xi'el ta xapas aba ti c'alal ta xave'e. Vinajuc ta q'uelel avu'un ti mu'yuc yutsil ta xa'uch'ubaj ta scoj ti vocole.

¹⁹ Jech xtoc un, xi xlic avalbe ya'i ti jnaclejetic yu'un ti muc' ta lume, ti jnaclejetic yu'un ti Jerusalene, xchi'uc scotol xtoc ti israeletique: ‘Ja' jech ta xal ti Dios ta atojolic jech c'u cha'al li'e: C'alal ta xave'ique, mu xa xbat ta biq'uel avu'unic ta xava'iic ta scoj ti vul o'nton yu'un ti vocole. Mu'yuc xa yutsil ta xava'iic ti c'usi ta xavuch'ique. C'ajomal xa no'ox batem ach'ulelic yu'un ti xi'ele. Yu'un ti jteclume ta xlilij ta j'ech'el, sicotan ta xcom ta scoj ti ech' jelav xa ta jyalel ti c'usitic chopol ta spasic ti jnaclejetique.

²⁰ Ti jnaclejetic ti oy ta scotol ti jteclumetique, ta xc'ot ta pasel ti ta stsutsic ta j'ech'ele. Ta xlic joybijuc ta sbajtical banomil ti muc' ta jteclume. Va'i unbi, ja' to tey ta xlic vuluc ta avo'ntonic ti vu'un Ajvalilune.’ ”

²¹ Ti Diose xi no'ox tal yalbun ti laj sc'oponun talele:

²² “¿C'usi ta xaq'uic ta na'el ti israeletic ti ta xalic ‘ti x'ech' xjelav no'ox ti c'ac'ale, ti mu xc'ot ta pasel ti c'usi laj yilic ti j'alc'opetic ti jambat sba satique’?

²³ Xi xatac'bee: ‘Xi ta xal ti Dios jech c'u cha'al li'e: Ta xc'ot ta pasel cu'un ti ma'uc yacalic ta yalel ta Israel ti va'i s'elan ti c'op taje.’ Albo ya'iic xtoc ti nopol xa sc'an xc'ot yorail ti ta xc'ot ta pasel scotol ti c'usitic laj yich' ilel c'alal jam ti ba satile.

²⁴ “Ta xlaj sc'oplal ta stojol israeletic ti ma'uc melel ti oy c'usi ta xilic ti jutc'op j'alc'opetique.

²⁵ Yu'un ti vu'un Diosune ta xic'opoj ta stojolic. Yu'un ti c'usi ta xich' alele, ta xc'ot ono'ox ta pasel, mu xjalij. Yu'un ta xavil ta aba ta asat, toyobba jteclumetic. Yu'un mi lic'opoj xa ono'oxe, ta xc'ot ta pasel cu'un ti c'usi ta xich' alele. Jbel xic'opoj ti c'usi ta xloc' ta que ti vu'un Ajvalilune.”

²⁶ Ti Diose xi laj yalbun ti laj sc'oponun talele:

²⁷ “Ti israeletique, ja' xa yeinojic ta yalel ti ta to xjalij batel yo' ta xc'ot ta pasel ti c'usitic laj avale, ti c'usitic la'ac'bat ana' ta yalele.

²⁸ Ja' yu'un un, xi xavalbe ya'iique: ‘Ja' jech ta xal ti Dios jech c'u cha'al li'e: Ti jc'op ti c'usi loc' ta quee, mu xa jaluc ta xc'ot ta pasel. Yu'un ti c'usi laj cale, mu xch'ay ta be. Yu'un jbel xic'opoj ti vu'un Ajvalilune.’ ”