Éxodo 7 - Bible in Tzotzil de Chamula

¹ Va'i un, ti Diose xi laj yalbe ti Moisese: —A'yio ava'i, ta xcac' que jti' ta jva'anot ta jq'uexol ti oy c'usi ta xapasbun ta stojol ti faraone. Jech ti achi'il ta voq'uel Aarone, ja' ta xc'opoj ta aventa.

² Scotol ti c'u s'elan ta jpasot ta mantale, ja' ta xavalbe ya'i ti Aarone. Jech ti stuque ja' ta xalbe ya'i ti faraone yo' jech ta xac' loc'uc batel ti israeletic ta steclumale.

³ Ja' no'ox un, vu'un ta xcac' pucujibuc ti faraone. Yu'un ti li' ta jteclum Egiptoe, ep ti c'usi ta xcac' iluc ti ch'ayal o'ntonal ta xc'ot yu'une.

⁴ Ti faraone mu xayac'oxuc ta venta. Manchuc mi jech un, ta jbusanbe ya'i talel ta stojol Egipto ti jmuc'ul jtsatsale. Ta jva'an jba ta spasel ti ep ta tos ti c'usitic ta xc'ot ta pasele yo' xu' ta jloq'uesic batel ti cajsoldadotaque, ti xcaltique, ja' ti israeletic ti ja' jteclumale.

⁵ C'alal mi laj xa cac' iluc ti jmuc'ul jtsatsal ta stojol ti Egiptoe, mi loc' xa talel cu'un ti israeletique, jech ti egipcioetique ja' jech ta sna'ic ti Vu'un Ajvalilune.

⁶ Ti Moisese xchi'uc ti Aarone jech laj spasic scotol jech c'u cha'al albilic yu'un ti Diose.

⁷ Ti Moisese yich'oj xa chanvinic (80) jabil. Yan ti Aarone yich'oj xa oxib yo'vinic (83) jabil ti c'alal ay sc'oponic ti faraone.

Svaxton ti Aarone

⁸ Ti Diose xi laj yalbe ti Moisese xchi'uc ti Aarone:

⁹ —Mi ta sc'an ti oy c'usi ta xavac'beic yil ti faraone, albo ya'i ti Aarone ti ac'o stsac ti xvaxtone. Ac'o stelan ta lumtic ta sba ta sat ti faraone yo' jech ta xjoybij ta jun muc' ta chon.

¹⁰ Jech ti Moisese xchi'uc ti Aarone bat sc'oponic ti faraone, ti xi s'elan laj spasic jech c'u cha'al albatic yu'un ti Diose: Jech ti Aarone, ta sba ta sat faraón xchi'uc yajtuneltac, laj stelan ta lumtic ti svaxtone. Jech ti vaxtone lic joybijuc ta jun muc' ta chon.

¹¹ Jech ti faraón eque laj stac ta iq'uel ti bijil viniquetic ti oy c'usi sna'ic yesomtaele, xchi'uc ti buch'u xilic ti toyol cajale. Esomtaj yu'unic ec ta sc'op spucujic.

¹² Ta jujun tal laj stelanic ta lumtic ti svaxtonique. Ti jujun vaxtone joybij ta muc' ta chon. Ja' no'ox un, svaxton ti Aarone laj sbic'be ta ti'el svaxtontac ti oy c'usi sna'ic yesomtaele, xchi'uc ti buch'utic xilic cajal toyole.

¹³ Ac'o mi jech laj yil ti faraone, c'ajomal pucujib yo'nton xchi'uc. Mu'yuc laj yich' ta muc'. Jech c'ot ta pasel jech c'u cha'al laj ono'ox yal ti Diose.

Ti vo'e ta xjoybij ta ch'ich'

¹⁴ Ts'acal to un, ti Diose xi laj yalbe ti Moisese: —Ti faraone pucujib xa ti yo'ntone. Mu sc'an xac' loc'uc batel ti israeletique.

¹⁵ Sob xbat aq'uel oc'om ti c'alal ta xbat ta uc'ume. Malao ta ti' uc'um. Ja' jech xtoc, ich'o batel ti vaxton ti joybij ta chone.

¹⁶ Ti bu taje, xi xavalbee: “Ti Ajvalil ti ja' Dios yu'unic ti hebreoetique, laj stacun talel ti xi ta xcalbote: ‘Ac'o ave ati' ti xu' ta xacolta batel ti calab jnich'nabtaque yo' jech chba yich'icun ta muc' ta sbajtical banomil. Avi tanae, jech o staoj yav ti mu xava'ibe xchiquinale.

¹⁷ Ja' yu'un un, ti Diose xi ta xayalbot ava'ie: Avi tana un, ta xavil ti Vu'un Ajvalilune. C'alal ta jmaj ti uc'um ta jvaxton ti oy ta jc'obe, ti uc'ume ta xjoybij ta ch'ich'.

¹⁸ Jech ti choyetique ta xcham. Ta xtuib ti uc'ume. Ja' yu'un un, ti egipcioetique ta x'ib yo'ntonic ta yuch'el ti vo'e.’ ”

¹⁹ Ja' jech xtoc ti Diose xi laj yalbe ti Moisese: —Albo ya'i ti Aarone ti ac'o stsac ti svaxtone. Ac'o stoy batel sc'ob ta sba ti uc'umetique, ti bic'tal uc'ume, ti nabetique, ti ta joq'uetic yu'unic ti egipcioetique. Yu'un ta xjoybij ta ch'ich' scotol ti c'usiuc no'ox oy ya'lele. Ti buyuc no'ox ts'anajtic ti vo'e, mi ta ton, mi ta te', ta xjoybij ta ch'ich'.

²⁰ Ti Moisese xchi'uc ti Aarone jech laj spasic jech c'u cha'al albatic yu'un ti Diose. Jech ti Aarone laj stoy ti svaxton ta smajel ti uc'ume. Jech laj spas ta sba ta sat ti faraone xchi'uc ti yaj'abteltaque. Ti vo'e joybij ta ch'ich' scotol.

²¹ Ti choyetique laj chamicuc. Ti uc'ume tuib ta j'ech'el. Jech ti egipcioetique mu xa stac' xuch'ic ti vo'e, yu'un ta sjunlej Egipto joybij ta ch'ich' ti vo'e.

²² Pas yu'unic ec ta sc'op spucujic ti egipcio viniquetic ti xilic ti toyol cajale. Ja' yu'un un, c'ot ta pasel ti pucujib yo'nton ti faraone. Mu'yuc laj yich' ta muc' ti c'u s'elan albatic yu'un ti Moisese xchi'uc ti Aarone. C'ot ta pasel jech c'u cha'al yaloj ono'ox ti Diose.

²³ Jech ti faraone sut batel ta sna. Mi ja'uc tsots sc'oplal laj ya'i ti c'usi laj yile.

²⁴ Scotolic ti egipcioetique lic spasic sjoq'uic ta ti'ti' uc'um yo' jech ta slupic lequil vo' yuch'ic, yu'un ti vo' ta uc'ume, mu xa stac' uch'el.

Ti j'ilbajinvanej ranaetique

²⁵ C'alal ech' xa ox vucub c'ac'al ti laj smaj uc'um ti Diose,