Éxodo 37 - Bible in Tzotzil de Chamula

Ta xmeltsaj xcaxail ti tratee

¹ Ti Bezaleele, ta acacia te', ta smeltsan ti caxae, ti ja' yich'oj vo'ch'ix xchi'uc jquejlej (1.10mts) ti snatile, ti ja' yich'oj oxch'ix xchi'uc o'lol jquejlej (.65cms.) ti sjamleje, ti ja' yich'oj oxch'ix xchi'uc o'lol jquejlej (.65cms.) ti stayleje.

² Ta sbonbe ta bats'i oro ti yute, ti spate. Ja' jech xtoc ta xnichimtasbe ta oro sjoylej ti sti'ile.

³ Ja' jech xtoc ta smeltsan chanib xot-xot oro ta sventa ti xchanibal yacane, chib ti ta jot xocone. Ja' no'ox jech, chib ti ta jot xocone.

⁴ Ta spasbe sc'atlomte'altac ta acacia te'. Ta sbon ta oro.

⁵ Ts'acal to un, ta xoj jelavel ta yut ti xot-xot oro ti noch'ajtic ta xocon ti caxae yo' jech xu' ta xich' chechel batel.

⁶ Ta bats'i oro ta smeltsanbe ti smac sti' xtoque, ti yich'oj vo'ch'ix xchi'uc jquejlej (1.10mts.) ti snatile, ti ja' yich'oj oxch'ix xchi'uc o'lol jquejlej (.65cms.) ti sjamleje.

⁷ Ti ta jujujot xocon sti'il ti smaque, ta sloc'ta chib ti c'usi oy xiq'uique, ti ja' oro ti anbil ta yanobile.

⁸ Ti smaque xchi'uc ti c'usitic oy xiq'uique, xi s'elan ti jun no'ox snitoj sba ta meltsanele. Ti jujunique sq'ueloj sbaic ta jujujot xocon ti smaque.

⁹ Jech o xal un, sq'ueloj sbaic ti ta jujujote. Ja' no'ox un, yac'oj satic ta sba ti caxae, ti xlich'ojan xiq'uic ta smacbel ti smaque.

Ta smeltsaj xmexail ti pan ti ta xich' aq'uel ta stojol ti Diose

¹⁰ Ti Bezaleele, ta acacia te' ta smeltsan ti mexa xtoque, ti ja' yich'oj chanch'ix xchi'uc jquejlej (.90cms.) ti snatile, ti ja' yich'oj cha'ch'ix xchi'uc o'lol jquejlej (.45cms.) ti sjamleje, ti ja' yich'oj oxch'ix xchi'uc o'lol jquejlej (.65cms.) ti stayleje.

¹¹ Ta sbon ta bats'i oro. Ta xac'be xnichimaltac ta oro ta joyob.

¹² Ta smeltsanbe o'lol jquejlej sjamlej xnichimal stsec ta joyob. Ja' jech xtoc ta sbon ta oro.

¹³ Ja' jech xtoc ta smeltsanbe chanib xotbil oro. Tey ta xnoch'anbe ta xchanjotal xchiquin ti bu tsacajtic ti yacantaque.

¹⁴ Jech o xal un, noch'ol com ta yolon ti xnichimale yo' jech xu' ta xich' xojel jelavel ti sc'atlomte'al ti ja' sventa xchechobil ti mexae.

¹⁵ Ti sc'atlomte'al xchechobil ti mexae, ta acacia te' ta smeltsan. Ts'acal to un, ta sbon ta oro.

¹⁶ Ja' jech xtoc ta bats'i oro ta smeltsan ti c'usitic ta xtun ti ta sba ti mexae jech c'u cha'al ti sets'etique, ti slupobiltaque, ti jarruetique, ti bisetic yavil ti c'usi sts'ants'un ta xich' aq'uel ta matanale.

Ta xmeltsaj ti spajleb cantilae

¹⁷ Ti Bezaleele ta smeltsan xtoc ti spajleb cantilae, ti ja' pasbil ta bats'i oro ti anbil ta yanobile. Ta xac'be xchotleb, yacan, sbisoltac, stsectac, xchi'uc xnichimaltac, ti jun no'ox snitoj sba ta scotole.

¹⁸ Ti ta xocontaque, loc' batel oxib sc'ob ta jujujot, ti c'ot ta vaquib sc'ob ti ta xcha'jotal xocone.

¹⁹ Ti ta jujun ti svaquibal sc'ob ti loq'uemic talel ta yacane, yich'oj oxib sloc'taobbail stsacleb xnich nichim ti co'ol s'elan stsacleb yuxub xnich ti almendroe, ti votol lec xchi'uc ti xniche.

²⁰ Ti ta smuc ta acane, ta sloc'tabe chanib stsacleb xnich nichim ti co'ol s'elan yuxub stsacleb xnich almendro ti lec votol ti xniche.

²¹ Ti bu tsacal liquel ti vaquib sc'obtac ti oy ta xocontaque, tey loc'tabil yuxub xnich almendro tsacal lec xchi'uc yuxub xnich ti tuquemic leque.

²² Ti sloc'obbail stsacleb xnich ti nichimetique xchi'uc ti sc'ob c'obtac ti spajleb cantilae, jun no'ox nitil xchi'uc ti spajleb cantilae. Taje, ja' bats'i oro ti anbil ta yanobile.

²³ Ja' jech xtoc ta smeltsan ta bats'i oro ti vucub lamparaetique, ti xtuch'obil xnichtaque, ti scajanobile.

²⁴ Ti jech ta smeltsan ti spajleb cantilaetique xchi'uc scotol ti c'usitic tey ta xtune, ta stunesic oxlajuneb xcha'vinic (33) kilo ti bats'i oroe.

Ta xmeltsaj ti altar xchic'obil pome

²⁵ Ti Bezaleele ta smeltsan ta acacia te' ti altar xchic'obil pome. Ja' co'ol sjamlej xchanjotal xocon, cha'ch'ix xchi'uc o'lol jquejlej (.45cms.) ti sjamleje, cha'ch'ix xchi'uc o'lol jquejlej (.45cms.) ti snatile, ja' chanch'ix xchi'uc jquejlej (.90cms.) ti stayleje. Ti xulubtac ti altare, ta jun no'ox nitil o xchi'uc.

²⁶ Ts'acal to un, ti sbae, ta sbon ta bats'i oro ti xchanjotale, ti xocontaque, xchi'uc ti xulubtaque. Ta xnichimta ta oro ta joyob ti sti'iltaque.

²⁷ Ja' jech xtoc ta xac'be xot-xot oro ta yolon ti xnichimale, chib ta xocon ti jote, chib ta xocon ti jote, yo' jech ta xich' xojel jelavel ti sc'atlomte'altaque. Ti jech taje, xu' ta xich' chechel batel ti altare.

²⁸ Ti sc'atlomte'altaque, ta smeltsan ta acacia te'. Ja' jech xtoc ta sbon ta oro.

Ta xmeltsaj ti jtunel aceitee, xchi'uc ti pome

²⁹ Ti Bezaleele ta smeltsan xtoc ti jtunel aceitee, xchi'uc ti pom ti bats'i smuil o stuque jech c'u cha'al ti jmeltsanej muil poxiletique.