Éxodo 36 - Bible in Tzotzil de Chamula

¹ Jech o xal un, ti Bezaleele, ti Oholiabe, xchi'uc scotol ti buch'utic xac' sc'abalil yu'unic ta sloc'tael ta xluchel ti abtel sc'an pasele, ti ac'bat sbijilic snopbenal yu'un ti Dios ti lec ta smeltsanic scotol ti c'usitic ta xtun ta Axibalna sventa yich'el ta muc' ti Diose, ja' ta sliquesic ti abtel jech c'u cha'al laj yal mantal ti Diose.”

Mu no'ox albajuc ta xich'ic talel matanal ti jteclume

² Jech ti Moisés une laj sta ta iq'uel ti Bezaleele, ti Oholiabe, xchi'uc scotol ti buch'utic xac' sc'abalil yu'un ta sloc'tael ta xluchel ti abtele, ti ja' ac'bil sbijilic yu'un ti Diose, ti laj yal sbaic ti loq'uem ayanem ta yo'ntonic ta scolta sbaic yu'un ti abtel taje.

³ Ti c'u yepalic taje, ac'bat ta yoc ta sc'obic yu'un Moisés ti matanaletic ti laj yich'ic talel ti israeletique yo' jech ta sliquesic ta yabtelanel ti c'usitic ta xtun ta Axibalna sventa yich'el ta muc' ti Diose. Ac'o mi jech un, jujun c'ac'al tey ono'ox ta yutsil slequil yo'ntonic ti israeletic ta xich'ic talel ti matanale.

⁴ Va'i un, ti j'abteletic ti sva'anoj sbaic ta smeltsanel ti c'usitic ta xtun ta sventa ti Axibalnae, quechel laj yicta comel ti yabtelique.

⁵ Yu'un xi bat yalbeic ya'i ti Moisese: “Ti c'usitic ta xich'ic batel ti jteclume, ech' xa ta jmec ti c'u yepal ta xtun ta sventa abtel ti yaloj mantal Dios ti sc'an pasele.”

⁶ Va'i un, ti Moisese laj stani batel slo'il ya'yej ta stojol viniquetic antsetic ti bu lamalic ta nacleje, ti mu xa xich'ic talel ti matanal ti jech ta scolta sbaic ta abtel ti ta xtun ta sventa ti Axibalnae. Ja' jech laj yich' pajesel ti lum ti tey no'ox ta xich'ic talel ti matanale.

⁷ Yu'un mu xa xlaj yich' tunesel ti c'usitic laj vuluc talel ta sventa ti oy c'usi ta xich' va'anele.

Ta xlic smeltsanel ti Axibalna yu'un ti nupel ta bee

⁸ Ti buch'utic xjelav to xac' sjolic ta sc'abalinel ta sloc'tael ta xluchel ti abtele, jech c'u cha'al ti sbijilic ti yan j'abteletique, ja'ic lic smeltsanic ti Axibalnae. Ta smeltsanic lajunlic muc' ta saquiquil poc' ti polajtic stsotbenal sate, ti ic'-ic' losantic sba stsajale, ti yax'elan xyaxale, ti tsajal poq'ue, ti ta sloc'taic ta luchel chib sloc'obbail ti c'usitic oy xiq'ue.

⁹ Yu'un ti jujulic muc'tic poq'ue, ta xich' o'lol yoxlajunebal (12.50) metro ti snatiquile. Ta xich' lajunch'ix (2mts.) ti sjamleje. Scotol jmoj ta xich' ti sbisole.

¹⁰ Vo'lic muc' ta poc', ta snitic jmoj ta ts'isel. Ja' jech ta snitic ta ts'isel ti yan vo'lic xtoque.

¹¹ Laj xtoc un, ta smacbeic ta ts'isel ta ic'-ic' losantic no ti ta sjombeic sat ti sliquebal jvoc' muc' ta poq'ue. Ja' no'ox jech ta spasbeic xtoc ti slajeb jvoc' muc' ta poq'ue.

¹² Ja' yu'un un, ti jvoc' sliquebal yo'lical muc'tic poq'ue xchi'uc ti slajeb jvoc' yo'licale, ta spasic ta lajuneb yoxvinic (50) ta jom sat ti snupojan sba ta xc'ote.

¹³ Ja' jech xtoc ta smeltsanic lajuneb yoxvinic (50) lucajtic oro yo' jech ta sjoc'anic ti jvoc' muc'tic poq'uetic ti joc'ol ta xc'ot ta sba ti yane. Ti jech taj une, ta xc'ot ta jun no'ox ta scotol.

¹⁴ Jech ti Bezaleele ta sjal buluchlic tsotsil tentsun yo' jech ta xich' lich'anel ta sjol ti Axibalnae.

¹⁵ Ti jujulic jalbil tsotsil tentsune, ta xich' o'lol yoxlajunebal (12.50) metro ti snatile. Ta xich' lajunch'ix (2mts.) ti sjamleje. Jmoj sbisol scotol.

¹⁶ Jmoj ta snitic ta ts'isel ti jvoc' yo'licale. Ja' vaclic ta snitic ta ts'isel ti jvoq'ue.

¹⁷ Ts'acal to un, ta sjombe lajuneb yoxvinic (50) ta jom sat ta sti'il ti bu snupoj sba xc'ot ti sliquebal jvoc' yo'lical ti jalbil tsotsil tentsune. Ta sjombe xtoc lajuneb yoxvinic (50) ta jom sat ti slajeb yo'licale.

¹⁸ Ja' jech xtoc ta smeltsanic lajuneb yoxvinic (50) luc-luc c'anal taq'uinetic yo' joc'ol lec ta xc'ot ta sjunul ti Axibalnae.

¹⁹ Ta sventa smac spat ta sjoylej ti Axibalnae, ti Bezaleele ta smeltsanbe ta nuculil chij ti bonbil ta tsoje. Yan ti ta sbae, ta sc'alta ta maquel xtoc ta jun yutsiquil nuculetic.

²⁰ Ts'acal to un, ta smeltsan ta acacia te' ti stenel-te'altac ti Axibalnae, ti lec tuc' ta sva'anane.

²¹ Ti jujupech tenel-te'e, ta xich' o'lol yo'obal (4.50) metro ti snatile. Ta xich' oxch'ix xchi'uc o'lol jquejlej (.75cms.) ti sjamleje.

²² Ti jujupech tenel-te'e, ta xich' sjelbenal sti'iltac yo' jech lec snupoj sba chlaj c'otuc ti jujupeche. Ja' jech ta smeltsanan scotol ti tenel-te'etic ta sventa ti Axibalnae.

²³ Ta xchapan ta meltsanel jtob (20) ta pech tenel-te' ti xi sq'ueloj ta yolon ti yac'ol xocon sloq'ueb c'ac'ale.

²⁴ Ja' jech xtoc ta xac'be cha'vinic (40) ta bej plata taq'uin sventa scaj yoctac. Ti jujupech tenel-te'e, ta xich' chib stsacleb ti bu snupojan sba ta xc'ot ti sti'ile.

²⁵ Ja' no'ox jech xtoc ta jot xocon ti Axibalnae, ti xcaltique, ti xi oy ta yolon ti yolon xocon sloq'ueb c'ac'ale, ta smeltsan jtob (20) ta pech tenel-te'.

²⁶ Ja' jech xtoc ta smeltsanbe cha'vinic (40) ta bej plata sventa scaj yoctac yo' jech oy chib scaj yoctac ti jujupech tenel-te'e.

²⁷ Ta sventa spat ti Axibalnae, ti xcaltique, ja' ti xi sq'ueloj ta smaleb c'ac'ale, ta smeltsanbe vacpech (7) stenel-te'al.

²⁸ Ta smeltsanbe xtoc yan cha'pech tenel-te' ti ta xtun ta jujujot xchiquin ti xi oy ta spate.

²⁹ Ti tenel-te'etic taje, oy snuptac ti snupoj sba ta xc'ot ti sjoltaque, xchi'uc ti bu tsacal liquel ti yoque. Ja' jech s'elan ta smeltsan ti cha'pech tenel-te' ta sventa ti jujujot xchiquine.

³⁰ Ja' yu'un un, ja' vaxacpech tenel-te' xchi'uc snuptac, xchi'uc vaclajuneb scajlebtac yoc ta plata. Yu'un ti jujupech tenel-te'e, ta xich' chib scajtac yoc.

³¹ Ja' jech xtoc ti Bezaleele ta smeltsan ta acacia te' vo'ob (5) sc'atlomte'al sventa stsaclebtac ti tenel-te'etic ta jot xocon ti Axibalnae.

³² Ta smeltsan xtoc vo'ob sc'atlomte'altac ta sventa ti tenel-te'etic ta jot xocon ti Axibalnae. Vo'ob sc'atlomte'al xtoc sventa ti tenel-te'etic ta jot xocon ti oy ta spat ti xi sq'ueloj ta smaleb c'ac'ale.

³³ Ti sc'atlomte'altac ti ta x'ech' ta o'lol ti tenel-te'etique, c'otem lec ta jujujot xocon.

³⁴ Ts'acal to un, ta sbon ta oro ti tenel-te'etique. Ta smeltsanbe xtoc xot-xot oroetique yo' jech ta xoj jelavel ta sc'atlomte'al ti bonbil xa ta oroe.

³⁵ Ta smeltsan xtoc ti smac ta ic'-ic' losantic sba tsajal poq'ue, ta poc' ti yax'elan xyaxale, ta saquil poc' ti polajtic stsotbenale, ta tsajal poq'ue, ti laj sjal ta loc'tael ta luchel ti chib c'usi oy xiq'ue.

³⁶ Ts'acal to un, ta jayibuc luc-luc oro, lic sjoc'anan ta chanib acacia te' oyetic ti bonbil xa ta oroe, xchi'uc ti chotol ta spajlebtac jujun ti meltsanbil ta platae.

³⁷ Ta sventa ti ochebal sti' ti Axibalnae, ta smeltsanbe ta ic'-ic' losantic sba stsajal poq'ue, ta yax'elan yaxal poc', ta tsajal poc', ta saquil poc' ti polajtic stsotbenal ti luchbile.

³⁸ Ja' jech xtoc ta smeltsan vo'ob (5) oy ti ta xac'be sluc-luc staq'uinale, xchi'uc vo'ob stsacleb ti ja' c'anal taq'uine, xchi'uc ta sbon ta oro sjol ti oyetique xchi'uc ti xot-xot staq'uinaltaque.