Éxodo 35 - Bible in Tzotzil de Chamula

Smantalil ti sc'ac'alil cuxob o'ntonale

¹ Ti Moisese laj stsob talel scotol ti c'u yepal svoloj sbaic ti israeletique, ti xi laj yalbee: “Ti Diose laj yalbun mantal ti ac'o xi xcholet ac'o yich' pasele:

² Vaquib no'ox c'ac'al sjalil ta xich' pasel ti abtele. Yan ti ta yucubal c'ac'ale, ja' jun ch'ul c'ac'al avu'unic, ti j'ech'el ja' jun cuxob o'ntonal sventa yich'el ta muc' ti Diose. Buch'uuc no'ox ta x'abtej ti jech c'ac'al taje, chapal xa sc'oplal ta xich' milel.

³ Ti buyuc no'ox ti oyoxuc ta nacleje, mi ja'uc xu' xatsanic jsetuc c'oc' ti ja' o sc'ac'alil cuxob o'ntonale.”

Ti matanaletic ti ta xich' aq'uel ta Axibalnae

⁴ Ti Moisese xi laj yal ti c'alal laj sva'an sba ta sc'oponel scotol ti israeletique: “Xi s'elan laj yalbun mantal ti Dios ma' ti sc'an ac'o yich' pasele:

⁵ Tsobic li' ta atojolic junuc smoton Dios ti c'usi x'ayan avu'unic ta jujune. Yu'un scotol ti buch'utic ta xloc' x'ayan ta yutsilal yo'nton sc'an ta xac'be ya'i smoton ti Diose, tsots sc'oplal ac'o yich' talel ti oroe, ti platae, ti c'anal taq'uine.

⁶ Ma'uc no'ox taje, ac'o yich' talel ti poc' ti ic'-ic' losantic sba stsajale, ti poc' ti yax'elan xyaxale, ti tsajal poq'ue, ti saquil poq'ue, ti stsotsil tentsune,

⁷ ti nuculil chij ti bonbil ta tsoje, ti nuculetic ti jun yutsiquile, ti acacia te'e.

⁸ Ma'uc no'ox taje, ac'o yich' talel ti aceite sventa ti lamparaetique, ti muil jtunel aceite sventa abtelale, ti muil pome,

⁹ ti baxton ic'-ic' losantic sba stsajale, ti yan baxtonetic ti c'upil sbae yo' ta xich' noch'anel ta jayal saquil c'u'ile, xchi'uc ti ta xich' noch'anel ta uil yu'un ti banquilal palee.

Ti c'usitic ta xtun ta Axibalnae

¹⁰ “Yu'un xi s'elan laj yal mantal ti Diose: Scotolic ti buch'utic xac' sjolilal yu'unic ta xluchel xnichimal ti c'usiticuque, tsots sc'oplal, ac'o talicuc ta yabtelanel:

¹¹ ti Axibalnae xchi'uc ti yaxibe, ti sluc-luc taq'uinaltaque, ti stenel te'altaque, ti sc'atlomte'altaque, ti yoyaltaque, ti stsacleb yoyaltaque,

¹² ti caxae, ti sc'atlomte'altaque, ti smac sti'e, ti muc' ta lich'il poc' smaque.

¹³ Ma'uc no'ox taje, ac'o talicuc ta yabtelanel ti mexae, ti sc'atlomte'altaque xchi'uc scotol ti c'usi ta xtun ta sbae, ti pan ti ch'acbil ta sventa ti Diose,

¹⁴ ti spajleb cantila yo' xojobin no'oxe xchi'uc ti c'usitic ta xtune, ti lamparaetique, ti yaceiteal ti lamparaetique,

¹⁵ ti yaltaril xchic'obil pom xchi'uc ti sc'atlomte'altaque, ti jtunel aceite sventa abtelale, ti muil pome, ti muc' ta poc' ti lich'il ta ochebal ti Axibalnae.

¹⁶ Ma'uc no'ox taje, ac'o talicuc ta yabtelanel ti yaltaril xchic'obil matanale xchi'uc ti chal-chal c'anal taq'uine, ti sc'atlomte'altaque xchi'uc scotol ti c'usi ta xtun yu'une, ti muc' ta lech-lech c'anal taq'uine xchi'uc ti xlechlebe,

¹⁷ ti muc' ta lich'-lich' poc' sventa smac ti amaq'ue, ti yoyaltaque xchi'uc ti stsaclebtaque, ti lich'-lich' poc' smac ti ochebal amaq'ue.

¹⁸ Ma'uc no'ox taje, ac'o talicuc ta yabtelanel ti spajobte'al yu'un ti Axibalnae, ti yamaq'uile, ti snitobiltaque,

¹⁹ ti jalbil c'u'il ti ta xtun ta sventa ta xich' pasel ti abtel ta Axibalnae, ti abtelal c'u'il ti ta stunes ta paleal ti Aarone, xchi'uc ti c'u'il ti ta stunesic ta paleal ti xnich'nabe.”

Ti jteclume ta xich'ic talel ti matanale

²⁰ Scotol ti c'u yepal svoloj sbaic ti israeletique, laj sc'oponic comel ti Moisés ti c'alal loq'uic batele.

²¹ Ac'o mi jech scotol taj une, ts'acal to un, ti buch'utic tijbil c'ot yo'ntonic ta j'ech'el ti laj ya'iic ta melele, laj yich'ic talel ti matanal ta sventa ti Diose yo' jech ta xich' meltsanel ti Axibalna ti bu nupel ta bee, xchi'uc scotol ti c'usi ta xtun yu'une, xchi'uc ti abtelal c'u'ile.

²² Viniquetic, antsetic, talic scotolic taje, ti loc' ayan ta yutsil yo'ntonic ti yich'ojic talel ti c'usitic uinbile, ti yixtol c'obile, ti xoj nuc' c'obale, ti taq'uinal chiquinal meltsanbil ta oroe, xchi'uc scotol ti c'usitic yan nichimtic no'ox ti ja' meltsanbil ta oroe. Ta jujun tal laj yich'ic talel matanal oro ti tsots sc'oplal ti ja' ta xc'ot ta yu'un ti Diose.

²³ Laj yich'ic talel ti buch'utic oy yu'unic ti ic'-ic' losantic sba tsajal poq'ue, ti yax'elan yaxal poq'ue, ti tsajal poq'ue, ti saquil poq'ue, ti stsotsil tentsune, ti nuculil chij ti bonbil ta tsoje, ti nuculetic ti jun yutsiquile.

²⁴ Ti buch'utic ta xaq'uic ta matanal ti platae, ti c'anal taq'uine, ta xich'ic talel ta stojol ti Diose. Ti buch'utic oy yu'unic ti acacia te'e, ta xich'ic talel yo' jech ta xich' meltsanel scotol ti c'usitic tsots sc'oplal ta xtune.

²⁵ Ti antsetic ti buch'utic xac' sjolic ta jolob xluchel ta c'abal ti c'usitic ta xtune, ta xich'ic talel ti c'usitic ic'-ic' losantic sba stsajale, ti yax'elan yaxal noe, ti tsajal noe, ti saquil no ti jalbil xa yu'unique.

²⁶ Jech ti antsetic ti xac' sjolic ta xluchel ti c'usiticuque, ti tsots sc'oplal laj ya'iic ta yo'ntonic ti sc'an pasele, laj snauic ti stsotsil tentsune.

²⁷ Ti banquilaletic yu'unique laj yich'ic talel ti baxton ti ic'-ic' losantic sba stsajale, xchi'uc yan baxtonetic ti c'upil sba ta q'uelele yo' jech ta xich' noch'anel ta jayal saquil c'u'ile, xchi'uc ta yuil ti banquilal palee.

²⁸ Laj yich'ic talel xtoc ti muil poxile, ti aceite ti ta xtun ta sventa ti lamparae, ti jtunel aceite sventa abtelale, xchi'uc ti muil pome.

²⁹ Scotol israeletic, viniquetic, antsetic, ti c'ot ta yo'ntonic ti laj ya'iic ti sc'an ta xcoltavanic yo' jech ta xc'ot ta pasel ti c'u s'elan albat mantal yu'un Dios ti Moisese, ta slequil yutsil yo'ntonic, laj yich'ic talel ti matanal ta stojol ti Diose.

Ti buch'utic sna'ic yabtelanel ti c'usitic ta xtun ta Axibalnae

³⁰ Ti Moisese xi laj yalbe ti israeletique: “A'yio ava'iic, ti Diose ja' laj st'uj loq'uel ta stojol ti jvoc' nitiluletic yu'un ti Judae, ja' ti Bezaleele, xnich'on ti Urie, smom xtoc ti Hure.

³¹ Yu'un j'ech'el ac'bil ti xcuxlejal Dios ta stojol ti jech oy sbijile, ti snopbenale, ti yojtiquinele, xchi'uc ti sc'abalil ta sloc'taele,

³² yo' jech xu' yu'un ta sloc'tael ta xluchel, ta yabtelanel ti oroe, ti platae, ti c'anal taq'uine.

³³ Ja' jech xtoc ac'bil sbijilic ta stuq'uibtasel ti bu sc'an toe, ta xnoch'anel ti c'upil sba baxtonetique, xchi'uc ti c'usiuc no'ox yan abtelal ti luchbilic ta xich' pasele.

³⁴ Ja' jech xtoc ac'bil sbijilic ta chanubtasvanej. Yu'un ti stuque xchi'uc ti Oholiabe, xnich'on ti Ahisamac ti ja' yu'un ti jvoc' snitilul ti Dane,

³⁵ yich'ojic ta j'ech'el sbijilic sc'abalinel ta sloc'tael ti c'usiuc no'ox abtelal ta xluchel ta ic'-ic' losantic sba tsajal poq'ue, ti ta yax'elan yaxal poq'ue, ti ta tsajal poq'ue, ti ta c'upil sba saquil poq'ue, xchi'uc ta sjalel ti c'usitic luchbil ta xich'e.