Éxodo 33 - Bible in Tzotzil de Chamula

Laj yal mantal ti Diose ti ac'o stam batel ti sbeique

¹ Ti Diose xi laj yalbe ti Moisese: —Tamo batel abe. Loc'an batel xchi'uc ti israeletic ti laj aloq'ues talel ta Egiptoe. Batanic ta banomil ti bu calojbe ya'iic ti Abrahame, ti Isaaque, ti Jacobe, ti caloj ti ta xcac'be ti snitilulique.

² Ta jtac talel ti caj'ánjele yo' jech ta xayic'oxuc batel. Ta jten loq'uel xtoc ta slumalic ti cananeoetique, ti amorreoetique, ti hititaetique, ti ferezeoetique, ti heveoetique, xchi'uc ti jebuseoetique.

³ Batanic ta banomil ti bu co'ol s'elan vo' ta xbein ti chu' vacaxe, ti ajapome. Ja' no'ox un, mu teyuc ta xajchi'inoxuc batel, naca mi jtub ats'unubalic ta be, yu'un toyobba jteclumoxuc ta xquil.

⁴ Ti israeletique ochic ta at o'ntonal ti c'alal laj ya'iic ti va'i s'elan tsots albatic ti c'ope. Mu'yuc xa buch'u laj sc'upiltas sba ta slapel ti c'usi x'ayan yu'unique.

⁵ Yu'un ti Diose xi ono'ox laj yalbe ya'i ti Moisese: —Xi xavalbe ya'i ti israeletique: “Ti vo'oxuque, toyobba jteclumoxuc. Yu'un xu' ta jtub ats'unubalic ti mi ta jchi'inoxuc uni jliqueluque. Loq'uesic ta ora no'ox ti c'usitic c'upil sba alapojique. Ta jq'uel quil c'usi xu' ta jpas ta atojolic.”

⁶ Va'i un, ta Horeb no'ox, lic yicta sbaic ta slapel ti c'usitic jun yutsiquil oy yu'unic ti israeletique.

Ti Axibalna ti bu nupel ta be xchi'uc ti Diose.

⁷ Ti Moisese laj spet loq'uel ti Axibalnae. Bat yac' ta loq'uebal xa ti bu lamalic ta nacleje. Laj yac'be sbi Axibalna ti ja' nupel ta be yu'un ti Diose. Yu'un mi oy buch'u ta sjac' ya'i sba ta stojol ti Diose, ta xbat ta Axibalna ti oy ta loq'ueltic ti bu lamalic ta nacleje.

⁸ C'alal ta xbat ta Axibalna ti Moisese, scotol ti israeletique ta sva'an sbaic ta sti' ti yaxibalnaic ta jujune. Sq'uelojic batel ja' to ti mi och batel ta Axibalna ti Moisese.

⁹ C'alal ochem xa ta Axibalna ti Moisese, jech ti voletel toque ta xyal talel. Ta xcom ta stuq'uil sba ti ochebal Axibalna ti c'alal ta sc'opon sbaic xchi'uc Dios ti Moisese.

¹⁰ C'alal ta xilic ti israeletic ti xvolet ti toc ta stuq'uil ti ochebal Axibalnae, ta jujun tal ti ta ochebal snaique, ta squejan sbaic ta lum ta yich'el ta muc' ti Diose.

¹¹ Ti Diose sq'uelojbe sba satic xchi'uc ti Moisés ti c'alal ta xc'opojique, co'ol s'elan ta xchi'in ta lo'il ti lec xil sbaic xchi'uque. Ts'acal to un, ti Moisese ta sut batel ti bu lamalic ta nacleje. Yan ti yajcoltaobbae, ja' ti querem vinic Josuee, xnich'on ti Nune, tiq'uil ta xcom ta yut ti Axibalnae.

Ti Diose ta xac' iluc yutsilal slequilal ta stojol ti Moisese

¹² Ti Moisese xi laj yalbe ti Diose: —A'yio ava'i, ta xac'an ti vu'un ta xquic' batel ti israeletique. Ja' no'ox un, q'uel avil un, mu'yuc avalojbun ti buch'u ta xavac'bun batel jchi'ine. Ja' jech xtoc ta xaval ti jun avo'nton ta jtojole, ti lec xavilune.

¹³ Ti mi jech ta melel taje, ac'bun jna' ti c'usi anopoje yo' jech xu' ta jpat co'nton ta atojolal, yo' jech staoj yav ta xca'i ti lec xavilune. Mu xach'ay ta avo'nton ti israeletic li'e, ja' anich'nab.

¹⁴ Xi laj yal ti Diose: —Vu'un ta jchi'inot batel. Ta xacux avo'nton cu'un.

¹⁵ Ti Moisese xi laj staq'ue: —Ti mi mu xachi'inune, mu xaloq'uesuncutic batel li'e.

¹⁶ Va'i un, mi yu'un mu xachi'inuncutic batele, ¿c'usi xa xut ta xa'iic ti yan jteclum ti ta jchapbecutic ya'i ti lec xaviluncutic xchi'uc ti avalab anich'nabe? Yu'un ja' to jech ta xvinaj ti mu co'olucuncutic xchi'uc scotol ti jteclumetic ti oyic ta scotol banomile.

¹⁷ Xi laj yal ta jamal ti Diose: —Ti c'usi laj avale, ja' ta jpas xtoc, yu'un lec xaquil, xacojtiquin lec.

¹⁸ —Ac'bun quil ti alequilale, ti avutsilale, avocoluc —xi ti Moisese.

¹⁹ Ja' no'ox un, xi tac'bat yu'un ti Diose: —Ta xcac' ta atojol scotol ti jlequilale. Ta aba ta asat ta xcal ti jbie. Oy xc'uxul co'nton yu'un ti buch'u ta jc'uxubine. Oy smuc'ul co'nton ta stojol ti buch'u ta jc'an ta jts'icbee.

²⁰ Jamal ta xcalbot ava'i, ti mu xu' ta xaq'uelbun ti jsate. Yu'un mu'yuc buch'u cuxul ta xcom junuc vinic ti buch'u ta xilbun ti jsate.

²¹ Xi laj yal xtoc ti Diose: —A'yio ava'i, ti bu oyune, oy bu xu' xava'an aba ta ba ton.

²² C'alal ta xcac' abain ti jlequilale, ta jtic'ot ochel ta c'al ton. Ta jmacot ta jc'ob ja' to ti mi lijelave.

²³ Ts'acal to un, ta jloq'ues ti jc'obe. C'ajomal xa no'ox xu' ta xata ta q'uelel ti jpate. Yan ti jsat quelove, mu xu' ti oy buch'u ta sq'uele.