Éxodo 28 - Bible in Tzotzil de Chamula

Sc'u'ic ti paleetique

¹ “Ti ta scotol ti israeletique, ja' nabano ta atojol ti achi'il ta voq'uel Aarone xchi'uc ti xnich'nabe, ja' ti Nadabe, ti Abiue, ti Eleazare, xchi'uc ti Itamare yo' jech ta xc'otic ta cajpaletac.

² Chapanbo jchopuc c'u'iletic ta sventa tunel yo' jech lec xa jun yutsil xtixet ta xc'ot o xchi'uc ti achi'il ta voq'uel Aarone.

³ Va'ano aba, c'opojan ta stojol scotolic ti buch'utic xjoybij sjolilal yu'unic ti vu'un laj cac'beic ti jun yutsiquil c'usitic xloc'taj yu'unic ta meltsanele, yo' jech ta smeltsanbeic sc'u'tac ti Aarone, yo' jech t'ujbil ta xc'ot ta cajpale.

⁴ Ti c'u'iletic ti sc'an ta xich' meltsanele, xi s'elane: Ti uile, ti jayal saquil c'u'ile, ti mochibal poq'ue, ti luchbil loin c'u'ile, ti saquil poc' ts'otobil jolale, xchi'uc ti chuquile. Ja' jech ta xich' chapanel c'u'il sventa tunel yu'un ti achi'il ta voq'uel Aarone, xchi'uc ti xnich'nabe, yo' jech ta x'abtejic ta tunel ta cajpaletac.

⁵ Ti buch'utic ta xchapanic ta smeltsanel ti c'u'ile, tsots sc'oplal ta stunesic ti oroe, ti poc' ti ic'-ic' losantic sba stsajale, ti poc' ti yax'elan xyaxale, ti tsajal poq'ue, ti saquil poc' ti polajtic sts'otbenale.

⁶ “Ti jayal saquil c'u'ile, ta sc'an ti nichimtasbil ta oroe, ta poc' ti ic'-ic' losantic sba stsajale, ta poc' ti yax'elan xyaxale, ta tsajal poc', ta saquil poc' ti polajtic sts'otbenale.

⁷ Ta xich' ac'bel stim snequeb ti ta snup sba ta jujujote.

⁸ Ti chuquil ti ta xc'ot ta sba ti jayal saquil c'u'il yo' jech ta stsin leque, syomoj lec ta xc'ot scotol. Yu'un ti chuquile, sc'an ti luchbil xtoc ta oroe, ta poc' ti ic'-ic' losantic sba stsajale, ta poc' ti yax'elan xyaxale, ta tsajal poc', xchi'uc ta saquil poc' ti polajtic sts'otbenale.

⁹ “Va'i un, sa'o chibuc baxton ti ic'-ic'tic sba stsajale. Lucho ta ts'ibtabel tey sbiic ti xnich'nabtac ti Israele.

¹⁰ Lec xcholet xatsac ti bu ba'yel laj voq'uicuque. Vaquib biiletic xavac' ta jujun ti tonetique.

¹¹ Ti biiletic ti bejel ta xcom ta tone, sc'an ti ja' ta spas ti buch'u yabtelinoj ta spaq'uel ti alac' sba tonetique. Ta xich' paq'uel co'ol jech c'u cha'al ti seyoe. Ts'acal to un, ac'bo stsacleb ta oro ti cha'bej tone.

¹² Va'i un, tey xajoc'an ta stimtac ti jayal saquil c'u'ile, yu'un ja' svulesobil ta o'ntonal xnich'nabtac ti Israel ta sventa ti baxtonetic taje. Ja' yu'un un, ti Aarone joc'ol ta xbat ta snequeb ti sbiic ta stojol ti Diose yo' jech mu xch'ay ta o'ntonal.

¹³ Ti stsacleb ti cha'bej baxtone, meltsano ta oro.

¹⁴ Ts'acal to un, meltsano junuc scarinail ti ja' bats'i oroe. Ac'bo cha'lic yaq'uil. Ac'o ta joyob ti stsacleb ti baxtone.

¹⁵ “Ti uile xchi'uc ti c'usitic jtunel ta sventa ti chapanele, ja' jech ta xameltsan jech c'u cha'al ti jayal luchbil saquil c'u'ile. Ti xcaltique, ja' ti luchbil lec ta c'abale, ti meltsanbil ta oroe, ti ta ic'-ic' losantic sba tsajal poq'ue, ti ta yax'elan yaxal poq'ue, ti ta tsajal poq'ue, xchi'uc ti ta saquil poc' ti polajtic sts'otbenale.

¹⁶ Va'i un, lec pim xameltsan, co'ol sjamlej ti xchanjotale, ti ja' jch'ix xchi'uc o'lol jquejlej (.22cms.) ti jujujote.

¹⁷ Pac'o ta noch'anel ta chanchol ta c'upil sba baxtonetic. Ti jchol ta sliquebale, noch'anbo baxton ti xlablajet tsoj-tsojtic ta xac' xojobale, baxton ti c'on-c'ontic sba xyaxal ta xac' xojobale, xchi'uc baxton ti ic'-ic' losantic xyaxal xlablajet ta xac' xojobale.

¹⁸ Ti xcha'cholale, ja' noch'anbo baxton ti ep no'ox ta tos ti c'u s'elan xu' ta sjoybin sba ti xojobale, baxton ti ic'-ic' losantic sba xyax ts'ijanil ti ep ta tos ta sjoybin xojobale, xchi'uc baxton ti cuxul lec xyax ts'ijanil ta q'uelele.

¹⁹ Ti yoxcholale, ja' noch'anbo baxton ti jtos-otic ti c'upil sba ta q'uelele, baxton ti xvayet ta q'uelel ti xojobale, xchi'uc baxton ti yax'elantic stsajal xojobale.

²⁰ Ti xchancholale, ja' noch'anbo baxton ti sac-sac vilantic sc'anal ta xac' xojobale, baxton ti ic'-ic'tic sba stsajal ta xac' xojobale, xchi'uc baxton ti ic'-ic'tic yic'al yaxts'ijanil xojobale. Ti baxtonetic taje, tsots sc'oplal ti joybil lec ta oro ti jujucoj stsaclebtaque.

²¹ Tsots sc'oplal ta xich' lajcha'bej baxtonetic. Yu'un ja' lajcha'vo' viniquetic xnich'nab ti Israele. Ti jujubej baxton ti ta xich' cholel ta paq'uele, co'ol s'elan seyo ta xc'ot, ti jun no'ox tey pac'al ta xcom sbiic ti lajcha'voc' nitiluletique.

²² “Ti uile, meltsanbo scarinailtac sventa yaq'uil ti naca oro ts'otbile.

²³ Meltsanbo xtoc chibuc biq'uit xot-xot oro. Noch'anbo ta xcha'jotal xchiquin sventa sjoc'leb ti uile.

²⁴ Mi laj taj une, xaxoj jelavel ti carina oro ta sat ti chib xot-xot oro ti noch'anbil ta xcha'jotal xchiquin sventa sjoc'leb ti uile.

²⁵ Ti sba sni'tac ti chib carinae, tey xatsac ti bu chib stsaclebe. Lec xatsacan comel ta stim ti jayal saquil c'u'il ti oy ta yelovale.

²⁶ Meltsano xtoc chib biq'uit xot-xot oro. Noch'ano ta xcha'jotal xchiquin ti bu c'otem ta olon yu'un ti uile, ta sti'il ti oy ta spat ti snaboj sba ta xc'ot xchi'uc ti jayal saquil c'u'ile.

²⁷ Meltsano xa yan chib xot-xot oro. Noch'ano ta yeloval ta stim ti jayal saquil c'u'ile. Noch'ano ta yolon ti bu ta x'ech' sts'inbenal ta yac'ol juteb ti bu ta x'ech' xchuquilal ti jayal saquil c'u'ile.

²⁸ Va'i un, ti xot-xot taq'uinaltac ti uile, snupoj sba ta xc'ot xchi'uc ti xot-xot taq'uinaltac ti jayal saquil c'u'il ti ic'-ic' losantic sba stsajal ti yaq'uil ta xich'e. Jech ti uile, chotol lec ta xcom ta sba xchuquilal ti jayal saquil c'u'ile yo' jech mu xjipetuc ta xc'ot.

²⁹ C'alal ta x'och batel ta Axibalna ti Aarone, yuinojuc batel ti uil sventa ta xac' ta na'el ti c'u s'elan sc'an pasele. Ja' jech xtoc joc'ol ta xbat ta sti' yo'nton ti bu tsacal sbiic xnich'nabtac ti Israel c'alal ta xbat ta stojol ti Diose, yo' jech tey ono'ox ta svulesatic ta o'ntonal yu'un.

³⁰ Tic'o ta uil ti Urim Tumime, ti yuinoj ta xbat ti Aarón ta stojol ti Diose yo' jech ta x'ac'bat sna' ti c'usi oy ta yo'nton ti Dios ta stojol ti israeletique.

³¹ “Meltsanbo ta ic'-ic' losantic tsajal poc' xmochibal ti jayal saquil c'u'ile.

³² Ch'ojbo snuc' ta o'lol yo' ta xich' lapel. Balbo sti'iltac ti bu ch'ojbile jech c'u cha'al ti c'u'il ti meltsanbil ta nucule yo' jech mu xjat.

³³ Ti sti'il mochibale, nichimtaso ta sloc'obbail granada ta poc' ti ic'-ic' losantic sba stsajale, ta poc' ti yax'elan xyaxale, xchi'uc ta tsajal poc'. Jelbiquil ta ch'inic campana oro xchi'uc ta sloc'obbail granada ta sjoylej ti sti'ile.

³⁴ Ti jech xcaltique, jbej campana oro, jbej sloc'obbail granada. Ja' jech jelbil ta xbat ta sjoylej sti'il ti mochibale.

³⁵ C'alal ta x'abtej ta paleal ti Aarone, tsots sc'oplal ti slapoj ochel ti mochibal c'u'ile. Ja' yu'un un, c'alal ta x'och batel ta xloc' talel ta Axibalna ti c'alal ta xbat sva'an sba ta stojol ti Diose, xvinaj sts'inlajet ti ch'inic campanaetique. Yu'un ti jech taje, mu xcham.

³⁶ “Meltsano junuc uni pech-pech bats'i oro. Ts'ibao tey ti co'ol s'elan seyo ta xc'ote: ‘C'otem ta yajtunel Dios li'e’ ti xiuc ti c'ope.

³⁷ Jech ti pech-pech oroe, noch'ano ta sba ti ts'otobil jolile. Chuco ta jun yaq'uil ti ic'-ic' losantic sba tsajal poq'ue yo' jech lec tsacal ta xcom.

³⁸ Va'i un, tey chucul o ta sti'ba ti Aarone. Jech ti Aarone, cajal ta xc'ot ta sba smulic ti israeletic ti c'alal oy bu mu lecuc ta xbat yu'unic ti c'alal ta xaq'uic ti ch'ul matanale. Ta sventa ti jech chucul ta sti'ba ti pech-pech oroe, ja' to jech ta stsac smoton ti Diose.

³⁹ “Meltsano junuc saquil loin c'u'il ti c'upil sba xluchbenale, xchi'uc saquil poc' sventa ti ts'otobil jolile. Ti chuquile, sc'an ti lec luchbil ti xnichimaltaque.

⁴⁰ Va'i un, xnich'nabtac ti Aarone, meltsanbo ti sloin c'u'ique, ti xchuquique, xchi'uc ti sts'otobil sjolic ti jun yutsil ta xc'ot o xchi'uque.

⁴¹ “Ja' jech ta xavac'be slap sc'u' ti achi'il ta voq'uel Aarone, ti xnich'nabe, xchi'uc ta xamalbe aceite ta sjol ti ta xavac'be yich' tsots yabtel ti t'ujbil ta xc'ot ta cajpaletaque.

⁴² Meltsano xtoc scom-com vex ta saquil poc' yo' jech ta smac ti yo'e.

⁴³ Va'i un, ti Aarone xchi'uc ti xnich'nabe, ac'o slapic batel ti c'alal ta x'ochic batel ta Axibalna, mi ja' ti ta xnopajic batel ta sts'el ti altare. Ac'o slapic ti c'alal ta xtunic ta paleal tey ti bu nupel ta be xchi'uc ti Diose yo' jech mu jset'uc oy c'usi chopol ta xc'ot ta pasel, yo' jech mu xchamic. Li'e, ta me xc'ot ta jbel ti oy c'usi tsots albil ti j'ech'el ch'unbil ta xcom o yu'un ti stuque xchi'uc ti snitilultaque.