Éxodo 27 - Bible in Tzotzil de Chamula

Ti c'anal taq'uin altare

¹ “Meltsano junuc altar ta acacia te' ti co'ol sjamlej xchanjotale, ti ja' buluch-ch'ix xchi'uc o'lol jquejlej (2.25mts.) ti jujujote, ti vac-ch'ix xchi'uc o'lol jquejlej (1.25mts.) ti stayleje.

² Meltsanbo chanib xulub. Jujun xavac'be ti jujujot xchiquine, ti snitoj sba xchi'uc ti altare.

³ Scotol ti c'usi ta xtun ti ta altare, xi s'elan ti ta xich' meltsanel ta c'anal taq'uine: ti xch'amlebtac tanil c'oq'ue, ti slupobile, ti lech-lech taq'uinetique, ti slats'obiltac ac'ale, ti yaviltac stileb ac'ale.

⁴ Meltsano xtoc chaj-chaj c'anal taq'uin. Ac'bo xot-xot c'anal taq'uin ta jujujot xchiquin.

⁵ Va'i un, ti chaj-chaj taq'uine, joc'ano yalel ta yolon svelbenal sti' ti altare yo' jech smacoj lec ta xc'ot o'lol ti c'u staylej ti altare.

⁶ Meltsano xtoc ta acacia te' sc'atlomte'altac ti altare. Bono ta c'anal taq'uin.

⁷ Ti sc'atlomte'ale, tey ta xich' xojel jelavel ta sat ti xotbil c'anal taq'uine, ti c'atal ta xcom ta jujujot xocon ti altare yo' jech xu' ta xtun ta sventa xchechobil.

⁸ Ti altare, sc'an pujul yut ti meltsanbil ta tenel-te'e, co'ol jech c'u cha'al laj avil ta vitse.

Yamaq'uil ti Axibalnae

⁹ “Meltsano yamaq'uil ti Axibalnae. Ti xi ta stuq'uil yolon ti yac'ol xocon sloq'ueb c'ac'al yu'un ti amaq'ue, lich'ano batel saquiquil poc' ti polajtic sts'otbenale, ti yich'oj vo'ob yoxvinic (45) metro ti snatile.

¹⁰ Ac'bo jtob ta bej yoyal, xchi'uc jtob stsaclebtac yoc ti naca ta c'anal taq'uine. Jech xtoc ti sluc-luc taq'uinaltaque xchi'uc ti xot-xot staq'uinaltaque, ja'uc me naca plata ta xich'.

¹¹ Ja' no'ox jech xtoc ti jot ti xi oy ta stuq'uil yolon ti yolon xocon sloq'ueb c'ac'ale, ta xajoc'anbe poq'uetic ti vo'ob yoxvinic (45) metro snatil yich'oje, jtob (20) ta bej yoyal xchi'uc jtob (20) spajlebtac ti meltsanbil ta c'anal taq'uine, xchi'uc sluc-luc taq'uinaltac xchi'uc xot-xot taq'uinaltac ti meltsanbil ta platae.

¹² Yan ti jot xocon ti xi oy ta yeloval smaleb c'ac'ale, chib xcha'vinic metro xchi'uc o'lol (22.50mts.) sjamlej ta xalich'an batel ti poq'uetique. Ti ja' jech sjamlej ti amaq'ue, ta xich' lajuneb yoyal xchi'uc lajuneb spajlebtac.

¹³ Yan ti jot xocon ti xi oy ta yelov sloq'ueb c'ac'ale, ti c'u sjamlej ti yamaq'uile, ja' no'ox jech chib xcha'vinic metro xchi'uc o'lol (22.50mts.) ti ta xajoc'anbe batel ti poq'uetique.

¹⁴ Yan ta jot xocon ti bu oy ti ochebale, vucubuc metro sjamlej ta xich' joc'anbel ti poq'uetique, xchi'uc oxib yoyal, xchi'uc oxib spajleb.

¹⁵ Jech xtoc ti jot xocon ti bu oy ti ochebale, vucubuc metro sjamlej ta xich' joc'anbel ti poq'uetique, xchi'uc oxib yoyal, xchi'uc oxib spajleb.

¹⁶ Ti ta ochebal yamaq'uile, oyuc me baluneb metro sjamlej poq'uetic ti ic'-ic' losantic sba stsajale, ti yax'elan xyaxale, ti tsajal poq'ue, ti saquil poc' ti polajtic sts'otbenal ti luchbil lec xnichimale. Oyuc xtoc chanib yoyal xchi'uc ti chanib spajlebe.

¹⁷ Scotol ti yoyaltac ti oy ta sjoylej ti amaq'ue, bats'i platauc me yich'oj ti xot-xot staq'uinaltaque, ti sluc-luc taq'uinaltaque, ta c'anal taq'uinuc me ti spajlebtac yoyale.

¹⁸ Ti yamaq'uile, ja'uc me vo'ob yoxvinic (45) metro ti snatile. Ja'uc o'loluc yoxvinic (22.50) metro sjamlej ti jujujote. Ti staylej ta jujujote, yich'ojuc buluch-ch'ix xchi'uc o'lol jquejlej (2.25mts.). Ti smaque, ja'uc me bats'i saquil poc' ti polajtic sts'otbenale, xchi'uc c'anal taq'uin ti spajlebtac yoyale.

¹⁹ Scotol ti c'usitic ta xtun ti c'alal ta spasbeic yich'obil ta muc' Dios ti ta Axibalnae, nacauc ta c'anal taq'uin jech c'u cha'al ti spajobte'altaque, xchi'uc ti spajobte'altac ti ta xtun ta yamaq'uile.

Yaceiteal ti lamparaetique

²⁰ “Albo ya'iic ti israeletique ti ac'o yich'ic talel ti bats'i yaceiteal olivoe yo' jech oy o ya'lel ti lamparaetic ta xtile.

²¹ Jech ti Aarone xchi'uc ti xnich'nabe ta sbainic ta sq'uelel ti lamparaetique yo' jech tsanal sbejel ac'ubal ta stojol Dios ta ch'ul cuarto ti bu nupel ta be xchi'uc Dios ta yeloval ti bu lich'il ti muc' ta poc' ti ja' smacoj ti xcaxail tratee. Ti va'i s'elan taje, ja' jbel ti tsots sc'oplal ti ch'unbil ta xc'ot ti jech ac'o spasic o ti israeletic xchi'uc ti snitilulique.