Éxodo 21 - Bible in Tzotzil de Chamula

Ti oy c'usi tsots sc'oplal albil ta sventa sc'oplal ti mosoviletique

¹ “Li'e, ja' ti oy c'usitic tsots sc'oplal albil ti ta xavac' ta na'el ti xi s'elane:

² “Mi ta xaman jun amosov ti ja' hebreoe, vaquib (6) no'ox jabil sjalil ta x'abtej. Ta yucubal (7) jabil une, ta xcol loq'uel ta mosovil, mi ja'uc xa juteb ta stoj ti ta xcol ta xloc' batele.

³ Mi stuc c'ote, stuc ta xbat. Mi xchi'uc yajnil c'ote, xchi'uc yajnil ta xbat.

⁴ Mi ja' ac'bat yajnil yu'un ti yajvale, mi laj yil jun squereme, mi jun stseb ti antse, va'i un, ti antse xchi'uc ti yalabe, ta xcom ta yoc ta sc'ob ti yajvale. Stuc smeyoj loq'uel yoc sc'ob ta xbat ti mosovile.

⁵ Yan mi mu sc'an xbat ti mosovil ti c'alal c'ot xa yorail ti xu' ta xcol batele, mi mu to ictabaj ta xa'i ti yajnile, ti xnich'nabe, xchi'uc ti yajvale,

⁶ va'i un, ti yajvale ta xic' batel ta stojol ti Diose. Xbat sva'an ta ti'na, mi ta smarcoil ti'na. Tey ta sjombe xchiquin ta jun jich'il ni' taq'uin. Ja' yu'un un, ja' smosov o ta xcom.

⁷ “Mi oy buch'u ta xchon ta mosovil ti yantsil nich'one, ti tsebe mu colemuc ta xloc' batel jech c'u cha'al sc'oplal ti viniquetique.

⁸ Mi mu sc'an xajnilin sme' mosov ti ajvalile, mi ma'uc sc'oteb o ta xil ti tsebe, ja' yu'un un, oy sc'oplal ti xu' ta xich' manbel loq'uel ti scolele. Ac'o mi sta xa yorail ti xu' ta xjipe loq'uele, ja' no'ox un, mu xu' ta xich' chonel batel ta stojol junuc ti jyanlume.

⁹ Ti mi ta xac'be yajnilin ti xnich'one, ac'o sbis jech c'u cha'al junuc yantsil nich'on.

¹⁰ Mi ta xlic sa' yan yajnile, mu me sjaltabe ti sve'ele, ti sc'u'e, xchi'uc ti mu me spajes sba ta spasel ti c'usi lec ta stojol ti ja' sba yajnile.

¹¹ Yan ti mi mu xac'be junuc ti oxtos taje, jech ti antse, mu'yuc xa c'usi chucul ta xcom o yu'un, mi jutebuc xa manbil ta sta ti scolel loq'uele.

Ti oy c'usitic tsots sc'oplal albil ta sventa ti c'usitic chopol ta xc'ot ta pasele

¹² “Mi oy buch'u ta xyayijesvane, mi ta xmilvane, chapal sc'oplal ta xich' milel ec.

¹³ Yan ti buch'u mu yolobajuc laj spase, yu'un xa jech c'ot o yorail ti buch'u chame, ts'acal to un, vu'un ta xcac'be sna' ti bu xu' chba snac' sbae.

¹⁴ Yan ti buch'u ta xcap sjol xchi'uc ti xchi'ile, ti yalel ta smile, laj xa sa' smul. Manchuc mi chba snac' sba ta yolon ti altare, ta jbel sc'oplal ta xich' milel.

¹⁵ “Ti buch'u ta syayijes ti stote, ti sme'e, chapal sc'oplal ta xich' milel.

¹⁶ “Ti buch'u ta cuxul ta xq'uex nac'van ti buyuc no'ox ta xtavan ech'el ta elc'anele, mi tey to oy ta stojole, mi laj xa xchon, jbel sc'oplal ti ac'o yich' milele.

¹⁷ “Buch'uuc no'ox ti ta sbis ta cotol chaval ti stote, mi ja' ti sme'e, chapal sc'oplal ti ta xich' milele.

¹⁸ “Mi oy bu ta xc'ot ta pasel ti ta smaj sbaique, mi oy jun vinic laj syayijes ta ton, mi ta sc'ob laj sc'av ta majel ti mu ta j'ech'eluc laj smile, ti ja' no'ox puch'ul ta stem com yu'une,

¹⁹ va'i un, ti buch'u yayijesvane, xu' to tey ts'ijil ta xcom sc'oplal yu'unic, ac'o mi ta ts'uy-te' xa ta xloc' ti buch'u yayijesate, ipaluc mi ta to xanav loq'uel stuque. Ja' no'ox un, tsots sc'oplal ta stojbe ti xpoxile, xchi'uc ta stojbe sc'ac'al ti c'u yepal ch'ay yu'une.

²⁰ “Mi oy buch'u ta stam te' yo' ta smaj o ti smosove, mi vinic, mi ja' jun ants, ti cham yu'un ta j'ech'ele, ta stoj lec ti jech ve'baj xae.

²¹ Yan ti mi cuxul to c'ot yu'un jun chibuc c'ac'ale, mu sta tsots vocol, ja' ti smanoj ta taq'uin ti smosove.

²² “Mi oy cha'vo' viniquetic ta xlic stsac sbaic ta majel ti ta syayijesic junuc ants ti xchi'uc yole, ti yal yu'unic ti olole, ti mu'yuc xcham o yu'unique, jech ti buch'u jliquesej letoe, ta stoj multa ti c'u yepal ta xc'anbat yu'un smalal ti antse. Jech ta xcom ti c'u yepal c'ot ta nopel yu'unic ti jchapanvanejetique.

²³ Yan ti mi ta to xvinaj ti xu' ta xcham o ti antse, ja' no'ox jech ta xich' ti buch'u yayijesvane.

²⁴ Ti buch'u ta stub ti satile, jech ta xich'. Ti buch'u ta sc'as ti tanal-eile, jech ta xich'. Ti buch'u ta sc'as ti c'obile, jech ta xich'. Ti buch'u ta sc'as ti acanile, jech ta xich'.

²⁵ Ti buch'u ta xjumvan ta c'oq'ue, jech ta xich'. Ti buch'u ta syayijesvane, jech ta xich'. Ti buch'u ta xc'avvan ta majele, jech ta xich'.

²⁶ “Mi oy buch'u ta sc'av ta majel ti smosove, mi vinic, mi ants, ti toj tubel ti sat c'ot yu'une, ac'o scolta loq'uel ta mosovil, yu'un ja' xa tey toj o yil ti jech tub ti sate.

²⁷ Mi laj sc'asbe stanal ye, ja' jech xtoc, ac'o scolta loq'uel ta mosovil. Yu'un ja' xa tey toj o yil ti jech c'as ti stanal yee.

Ti oy c'usi tsots sc'oplal albil ta sventa ti mu na'biluc ti c'usi chopol ta xc'ot ta pasele

²⁸ “Mi ja' jun vacax laj xluch jun vinic, mi ja' jun ants, ti laj smile, jech ti vacaxe ta xich' milel ta ton ec. Ja' no'ox un, mu xu' xich' ti'bel ti sbec'tale. Mu xu' ta sbainbe smul xvacax ti yajvale.

²⁹ Yan ti mi stalel o ti jech sna' xluchvan ti vacaxe, ti oy buch'u laj smile, ta xich' milel ta ton co'ol xchi'uc ti yajvale, ta scoj ti tey no'ox sq'ueloj ti c'alal sna' ono'ox lec ti sna' xluchvan ti xvacaxe.

³⁰ Mi c'ux to ta o'ntonal ti jech j'ech'el ta xich'e, ac'o sc'anbeic multa yo' jech mu xac' o sjol sbaquil xchi'uc, ac'o stoj ti c'u yepal ta xc'anbat ti smultae.

³¹ Va'i un, ti jbel ti c'usi tsots albile, ja' ono'ox jech yip ta xc'ot mi oy bu ta xlaj sluch junuc querem, mi junuc tseb.

³² Yan mi ja' jun mosovil, mi vinic, mi ants, ti laj ta luchel yu'un ti vacaxe, jech ti vacaxe ta xich' milel ta ton. Ja'uc ti yajval ti mosovile, mi vinic, mi ants ti chame, ta xtojbat lajuneb xcha'vinic (30) ta sep plata taq'uin.

³³ “Mi oy buch'u jamal ta xicta comel ti jun joq'ue, mi ta sjoc' jun joc' ti mu'yuc ta smaque, mi tey ta xbaj yalel jcot vacax, mi jcot burro,

³⁴ jech ti yajval joq'ue ta xq'uextabe sutel ti buch'u cham ti xchon sbolome. Ac'o yich' comel ti c'usi chame.

³⁵ “Mi jcot vacax ti ta smilbe ta luchel xvacax ti jun vinique, jech ti jluchvanej vacax ti cuxule, ta xich' chonel. Jech ti stojole, ta xich' ch'aquel ta o'lol. Ja' jech xtoc ti chamem vacaxe, ta xch'acbe sbaic ta o'lol ti sbec'tale.

³⁶ Yan mi mu xac' ta venta ti sna' ono'ox ti yajval ti ja' ono'ox yes ta xluchvanej ti xvacaxe, ja' yu'un un, cuxul ta xac'be sutel xq'uexol ti buch'u cham ti xvacaxe. Jech ti chamem vacaxe ta xc'ot ta yu'un.