Éxodo 20 - Bible in Tzotzil de Chamula

Ti lajuneb mantaletique

¹ Ti Diose xi s'elan xcholet lic yal scotol ti c'opetique:

² “Vu'un Ajvalil ti ja' Diosun avu'unique, ti laj jloq'uesoxuc talel ta Egipto ti bu mosovinbiloxuc to oxe.

³ “Diosinicun ti vu'une, mu xadiosinic yan.

⁴ “Mu xava'an jtosuc loc'obbail, mi ja'uc sloc'obbailtac ti c'usitic oy ta ac'ol ti ta vinajele, mi ja'uc sloc'obbailtac ti c'usitic oy ta banomil ti oy ta peq'uele, mi ja'uc ti c'usitic oy ta nab ti ts'anal ta banomile.

⁵ Mu xanijan xachiman aba ta stojolic. Mi ja'uc xamuyubta ta yich'el ta muc', yu'un vu'un ti Ajvalil Diosun avu'unique. Yu'un ti jech Diosune, mu lecuc ta xca'i ti buch'u ta spec'tsanbun jc'oplal ta yich'el ta muc' ti yane. Ta jtsitsic ya'i ta scoj smulic ti totil me'iletic ti xti'et xcapet sjolic ta jtojole, ti ta staic ta maquiel ti yalab xnich'nabique, ti smomique, ti syialmomique.

⁶ Ja' no'ox un, mu'yuc spajeb ta jc'uxubinan ti buch'utic c'ux ta xiya'iique, ti ta xc'ot ta pasel yu'unic ti jmantaltaque.

⁷ “Va'i un, mu xaloq'uesic sbi ta jeche' no'ox ti Ajvalil ti ja' Dios avu'unique, yu'un ti stuque ta stsits ya'i. Mu teyuc no'ox sq'ueloj ti buch'u ta sbiiltasat ta jeche' no'oxe.

⁸ “Vuleso ta avo'nton sc'ac'alil ti cuxob o'ntonale yo' jech ich'bil ta muc' ta xc'ot ti Diose.

⁹ Vaquib (6) c'ac'al ta xa'abtejic. Yu'un ja' o yorail ta xavabtelan scotol ti c'usi sc'an pasele.

¹⁰ Yan ti ta yucubal (7) c'ac'ale, ja' cuxob o'ntonal ti t'ujbil yu'un ti Ajvalil Dios avu'unique. Mi ja'uc xa'abtejic jset'uc ti jech c'ac'al taje, mi ja'uc ti aquerem nich'one, ti avantsil nich'one, mi ja'uc ti amosov vinique, ti antse, mi ja'uc ti chon bolometic avu'une, mi ja'uc ti jyanlum ti oy ta atojole.

¹¹ Yu'un ti Diose, ta vaquib (6) no'ox c'ac'al, laj smeltsan ti vinajele, ti banomile, ti nabe, xchi'uc scotol ti c'usitic oy ta stojolique. Ta yucubal (7) c'ac'al une, laj xcux yo'nton. Jech o xal ti Diose laj sts'uiltas ti sc'ac'alil cuxob o'ntonale. Jamal laj yal ti ja' jun ch'ul c'ac'ale.

¹² “Ich'o ta muc' ti atote xchi'uc ti ame'e yo' jech ta xnatij acuxlejal ta banomil ti ta xac'bot ti Ajvalil Dios avu'unique.

¹³ “Mu xamilvan.

¹⁴ “Mu xamulivaj.

¹⁵ “Mu xa'elc'aj.

¹⁶ “Mu xajut c'op ta soquesel achi'il.

¹⁷ “Mu xc'upij avo'nton yu'un sna ti achi'ile. Mu xc'upij avo'nton yu'un ti yajnile, mi ja'uc ti smosov vinique xchi'uc ti smosov antse, mi ja'uc ti xvacaxe, ti sburroe, mi ja'uc jtosuc ta scotol ti c'usi ja' yu'untaque.”

Ti israeletique ta xa'iic ti sc'an xi'tael ti Diose

¹⁸ Ja' rexticoetic scotol ti israeletic ti laj yilic ti xc'avlajet ti chauque, ti xjaplajet ti sac tsele, ti xvochet yech'omal ti oq'uesetique, ti xtomet no'ox xch'ailal ti vitse. Nom va'ajtic ta scoj ti xi'ele.

¹⁹ Ja' yu'un un, xi laj yalbeic ti Moisese: —Vo'ot c'oponuncutic. Ta jch'uncutic ti ac'ope, naca mi chamcuncutic ti mi ja' ta xisc'oponuncutic ti Diose.

²⁰ Ti Moisese xi laj staq'ue: —Mu xaxi'ic. Yu'un ti Diose tal sq'uel avo'ntonic yo' jech ac'o axi'taic, yo' mu xasa' amulic.

²¹ C'alal nom va'alic ti israeletique, jech ti Moisese nopaj batel ti bu oy ti pimil toc ti ja' tey oy ti Diose.

Ti oy c'usi tsots sc'oplal albil ta sventa ti altare

²² Ti Diose xi laj yalbe ti Moisese: “Xi xcholet xavalbe ya'i ti israeletique: ‘Laj xa avilic ti ta vinajel to lic'opoj talel ta atojolique.

²³ Mu xaloc'taic ta smeltsanel avajdiosic ta c'anal taq'uin, ta saquil taq'uin, ti ta xanijan abaic ta stojol jech c'u cha'al ta xanijan abaic ta jtojole.

²⁴ Ja' yu'un un, meltsanbeicun junuc altar ti meltsanbil no'ox ta latsbil lume. Cajanic tey ti chon bolometic ti oy ta acorralique, ti avacaxique, ti ta xich' svocol ta chiq'uel ta sventa ti lajesobil o'ntonale. Ta xtal jts'uiltas ta jujun ti bu ta jc'an ta xich' na'el ti jbie.

²⁵ Mi ta xameltsanbeicun jun altar ta tone, mu me anbiluc. Yan ti mi anbil ta yanobil ti tone, ta xasoquesbeic sc'oplal ti altare.

²⁶ Ti caltare, ma'uc me ti scojol cojol xa ta xameltsanique yo' jech mu xavaq'uic ta q'uelel ti abec'talic ti bu ma'uc yeloval osil ti c'alal ta xamuyic batele.’