Éxodo 14 - Bible in Tzotzil de Chamula

Ti israeletique ta xtuch'ic jelavel ti Tsajal Nabe

¹ Ti Diose xi laj yal ti c'alal laj sc'opon talel ti Moisese:

² “Albo ya'iic ti israeletique ti ac'o suticuc batel yo' ta svol sbaic ta yeloval Pi-hahirot ti oy ta o'lol yu'unic ti Migdole xchi'uc ti nabe, ta yeloval ti Baal-zefone. Ac'o sva'an yaxibalnaic ta yeloval ti bu taje, ta sts'el ti ti' nabe.

³ Ja' yu'un un, xu' xi ta snop ti faraone: ‘Ti israeletique mu sna'ic bu ta xbatic. Ch'ayemic xa ta be ta sbajtical banomil.’

⁴ Ja' no'ox un, vu'un ta xcac' pucujibuc yo'nton ti faraone yo' jech ta xlic sjol ta nutsvanej. Ti jech taje, ta xcac' iluc ti jmuc'ul jtsatsal ta stojole, xchi'uc ta stojol scotol ti yajsoldadotaque. Jech ti egipcioetique ta sna'ic ti vu'un Ajvalilune.” Ja' jech laj spasic ti israeletique.

⁵ Ti yorail taje, ti ajvalil yu'un ti Egiptoe laj yich' albel ya'i ti jatavic xa loq'uel ti israeletique. Ja' yu'un un, ti ajvalile xchi'uc ti yajtuneltaque lic sjelic ti c'usi yalojic ta stojolique, ti xi lic yalbe sbaique: “¿C'u no'ox cha'al laj cac'tic baticuc ti israeletique, ti laj yictabotic comel ti cabteltique?”

⁶ Jech ti faraone laj yal mantal ta ora no'ox ti ac'o chapanbatuc ti scarreta ta sventa ti letovajele. Laj yic' batel ti yajsoldadotaque.

⁷ Laj xchapan vaquib ciento (600) ta cot carreta ti bu lec meltsanbile. Ma'uc no'ox taje, yu'un bat scotol ti carretaetic yu'un ti Egiptoe, ti tey cajajtic batel ti buch'u tsots yabtelique.

⁸ Jech ti Diose laj yac' pucujibuc yo'nton ti faraone yo' jech ta snuts batel ti israeletique. Ja' no'ox un, ti israeletique, ta smuc'ul stsatsal xa Dios ti jech loq'uic batele.

⁹ Ti egipcioetique chapal lec xchi'uc scotol yajsoldadotac xchi'uc scarretaic, xchi'uc jcajlejetic ta ca' ti xvoletic no'ox loq'uel ta slubtsanel ta be ti israeletique. Va'i un, tey lubtsanatic ta be ta ti' nab ta sts'el Pi-hahirot ti oy ta yeloval Baal-zefón ti bu tsobol c'otique.

¹⁰ C'alal laj yilic ti israeletic ti nopol xa xtal snutselic yu'un ti faraone xchi'uc ti egipcioetique, toj xi'el c'otic. Laj sc'anic coltael ta stojol ti Diose.

¹¹ Xi laj yalbeic ti Moisese: —¿Mi yu'un mu'yuc mucobbail ta Egipto ya'yel ti laj aloq'uesuncutic talel tey yo' xtal avac' chamcuncutic li' ta sbajtical banomile? ¿C'u cha'al jech laj apasbuncutic? ¿C'u cha'al laj aloq'uesuncutic talel ta Egipto?

¹² Ti jech ta xcalcutic taje, yu'un xichi ono'ox laj calcutic ava'i ta Egipto: “Ch'an utuncutic, ac'o abtejcuncutic ta stojol ti egipcioetique. Ja' xloc' venta ti jech mosovinbiluncutique, ja' toj altic ti xbat chamcuncutic ta sbajtical banomile.”

¹³ Ti Moisese xi laj staq'ue: —Mu xaxi'ic. Tsots xavac' abaic. Q'uelic c'u s'elan ta stic' sba ta apojelic ti Dios avie. Yu'un ti egipcioetic ti ta xavilique, mi ja'uc xa ti ta to xtal avilbeic sat yelov yan veltae.

¹⁴ Ti vo'oxuque, ts'ijlanic no'ox, mu xatsiq'ues avo'ntonic. Yu'un ja' ta xletovaj ta aventaic ti Diose.

¹⁵ Ja' yu'un un, ti Diose xi laj yalbe ti Moisese: —¿C'u cha'al ta xac'anbun ti pojele? ¡Albo ya'i mantal ti israeletic ti ac'o stam jelavel ti sbeique!

¹⁶ Jech ti vo'ote, tuneso ti avaxtone. lich'o batel ac'ob ta xtuchel ta toyol yo' jech ta xch'ac sba ta jujujot ti nabe, yo' jech taquin lec ta x'ech' xtuch'ic ti israeletique.

¹⁷ Ta xcac' pucujibuc yo'nton ti egipcioetique yo' jech ta xasnutsoxuc. Va'i un, ta xcac'be yil ti jmuc'ul jtsatsal ta stojol ti faraone, ta stojol scotol ti yajsoldadotaque, ti carretaetic yu'une, ti jcajlejetic ta ca' yu'une.

¹⁸ C'alal mi laj xa cac'be yil jmuc'ul jtsatsal ti faraone, ta stojol ti scarretataque, xchi'uc ti jcajlejetic ta ca' yu'une. Jech ti egipcioetique ta sna'ic ti vu'un Ajvalilune.

¹⁹ Ti yaj'ánjel Diose xchi'uc ti voletel toc ti jba'be batel yu'unic ti israeletique, ta ora no'ox sut batel ta spatic.

²⁰ Ti voletel toque com ta o'lol yu'unic ti egipcio soldadoetic xchi'uc ti israeletique. Ti bu oy ti egipcioetique, ic' ta jmec ti toque. Yan ti bu oy ti israeletique, sac jaman ta xanavic batel. Jech o xal ti egipcioetique sjunul ac'ubal xanavic, ti mu ja'uc laj staic ta be ti israeletique.

²¹ Jech ti Moisese laj xlich' batel sc'ob ta sba ti nabe. Jech ti Diose laj yac' taluc tsots ic' ti xjumet sjunul ac'ubal ti lic talel ta sloq'ueb c'ac'ale. Jech ti nabe laj spas sba ta cha'ch'ac. Ja' yu'un un, ti Diose joybij yu'un ta taquin banomil ti nabe.

²² Taquin banomil ech' xtuch'ic nab ti israeletique, yu'un yijubem lec smac ta jujujot ti vo'e, co'ol s'elan ti oy ta bats'i c'obe, ti oy ta ts'et c'obe.

²³ Scotolic ti buch'u cajalic ta ca'e, ti cajalic ta carretaetic yu'un ti faraone, nabal ochic ta spat ti israeletique, nutsvanemic batel c'alal to o'lol nab.

²⁴ C'alal ta xa sacub talele, ti Diose, ta voletel toc to ti joybijem ta c'oq'ue, yiloj talel ti c'usi ta spasic ti egipcio soldadoetique. Ja' yu'un un, toj xi'bal sba ti c'usi lic spasbe ta stojolique.

²⁵ Soquesbat scarosal ti carretaetic yu'unique. Mu xa xu' xanavic lec. Ja' yu'un un, ti egipcioetique xi laj yalbe sbaique: —Jatavcutic, quictatic comel ti israeletique. Yu'un ja' ta xistsacotic ta leto stuc ti Diose. Ta spoj ti israeletique.

²⁶ Jech ti Diose xi laj yalbe ya'i ti Moisese: —Lich'o batel ac'ob ta toyol ta sba ti nabe yo' ta spuli sba sutel ti vo'e. Ac'o smut'i ya'i ti egipcioetic xchi'uc ti scarretaique, ti jcajlejetic ta ca' yu'une.

²⁷ Ti Moisese laj xlich' batel sc'ob ta sba ti nabe. Ti c'alal yorail ta xjatavic loq'uel ya'iic ti egipcioetique, macal c'otic ta be yu'un ti nabe. Mut'iatic ta vo' yu'un ti Diose. Ja' yu'un un, ti c'alal sacub ti osile, sta xa yav ti c'u ono'ox s'elan ti nabe.

²⁸ Yu'un ti c'alal laj xa sta yav ti nabe, laj smut'ian comel ti carretaetique, ti ca'etique, xchi'uc scotol ti soldadoetic ti ochic batel ta snutsel ti israeletique. Mi junuc yajsoldado ti faraón ti cuxul loc' talele.

²⁹ Ac'o mi jech un, taquin banomil ech' xtuch'ic nab ti israeletique. Yu'un yijubem lec smac ta jujujot ti vo'e, co'ol s'elan ti oy ta bats'i c'obe, ti oy ta ts'et c'obe.

³⁰ Ti jech c'ac'al taje, ti Diose laj spoj ti israeletic ti jbel xa ox sc'oplal ta xmilatic yu'un ti egipcioetique. Jech ti israeletique laj yilic ti javal sts'e'elic no'ox ti egipcioetic ta ti' nab ti laj lajicuque.

³¹ C'alal jech laj yilic ti israeletic ti laj sbusanbe ta sba egipcioetic scotol smuc'ul stsatsal ti Diose, ja' yu'un un, laj snijan sbaic ta stojol ti Diose. Laj spat yo'ntonic ta stojol, xchi'uc ta stojol ti Moisés ti ja' yajtunele.