Éxodo 12 - Bible in Tzotzil de Chamula

Sliquebal ti Colele

¹ Xi laj yal ti Dios ta stojol ti Moisese xchi'uc ti Aarón ti tey ta Egiptoe:

² —Ti u li'e, na'bil lec ta xcom avu'unic, yu'un ja' sliqueb u yu'un ti jabile.

³ Va'i un, xi s'elan xcholet xavalbe ya'i scotol ti jnaclej israeletique: ‘Ta slajunebal (10) c'ac'al yu'un ti u li'e, ti jujunoxuc ta jujuchope ta xaviq'uic talel jcotuc chij, mi ja' jcotuc tentsun.

⁴ Mi mu'yuc ep ti jchop ta na ti mu xlaj ta ti'el yu'un ti jcot chon bolome, ja' yu'un unbi, ti yajval nae, ac'o scomon chi'in sbaic ta ve'el xchi'uc ti buch'u nopol xil sbaic ta naclej xchi'uque. Ja' ac'o xch'acbe sbaic ti c'u yepal xu' yu'unic ta sti'el ti jujunique.

⁵ Jech ti chon bolometic ti ta xamilique, sc'an ti jun to no'ox jabil yich'oje, ti mu'yuc jutebuc xchopolile, ti mu'yuc xchamele. Xu' ta chij, mi ta tentsun, ipaluc ti mi ja' yuni tote.

⁶ Chabiic to me un, yu'un ja' to ta xtun ta xchanlajunebal (14) sc'ac'alil ti u taje. Yu'un ti jech c'ac'ale, scotolic jujucot ta smilic ta smalil c'ac'al sjunul ti Israele.

⁷ Ac'o xch'ambeic xch'ich'el ti chon bolome, xchi'uc ac'o sbonic ta smarcoil ti'na ti bu ta xich' ti'el ti chon bolome.

⁸ Ti jech ac'ubal taje, vobil ta c'oc' ta xati'ic ti beq'uete, capal ta ch'ail itaj, xchi'uc pan ti mu'yuc yich'oj ti spajubtasobile.

⁹ Mu me ja'uc jutebuc xati'ic ta stseil, mi ja'uc ta lacanbil. Scotol ti c'usi oy yu'un ti chon bolome, ta xich' voel ta c'oc' jech c'u cha'al ti sjole, ti yacantaque, ti sbeeltac xch'ute.

¹⁰ Mi ja'uc xcom scomelal avu'unic ta yoc'omal. Ti mi oy to com scomelale, chiq'uic ta c'oc'.

¹¹ Caj lapic xa ti ac'u'ique, ti axonobique, ti teyuc xa ta ac'obic ti anabte'ique, ti sujomoxuc ta ve'ele. Yu'un ja' xa sliquebal Colel yu'un ti Diose.

¹² Yu'un ti jech ac'ubal taje, ta xi'ech' ta stojol scotol ti egipcioetic ti ta jyayijesbe ta milel scotol ti sbanquilal nich'nabic ti jujuchop jnaclej egipcioetique, xchi'uc scotol ti sba yoltac ti xchon sbolomique. Yu'un ta jchapan ya'iic ti diosetic yu'un ti egipcioetique. Yu'un jech xcal ti Vu'un Ajvalilune.

¹³ ‘Yu'un ti ch'ich'e, ja' ta xtun ta senyail ti ta xvinaj ti bu nail tiq'uiloxuque. Jech ti c'alal ta jyayijes ta milel ti egipcioetique, mi junuc ta xachamic. Yu'un ta xquil bu oy ti ch'ich'e, jelavel ta xijelav.

¹⁴ Taje, ja' jun c'ac'al ti tsots sc'oplal ti ta xavules ta ajolique, xchi'uc ti ta xapasic jun muc'ul q'uin ta sventa yich'el ta muc' ti Diose. Yu'un ta xc'ot ta jbel c'usi albil ti tsots sc'oplale, ti na'bil ta xcom ta ajolic ta spasel ti q'uine, ti jech ta xcom ta stojol ti totil me'ile xchi'uc ti alab nich'nabiletique.

¹⁵ Vucub c'ac'al sjalil ta xave'ic pan ti mu'yuc yich'oj ti spajubtasobile. Yu'un ta xlic ta sliquebal sba c'ac'al ti ch'abal xa yich'oj spajubtasobil ti pan ta anaique. Buch'uuc no'ox ta sve' pan ti yich'oj spajubtasobil ti vucub c'ac'al taje, tenbil ta xloc' ta stojol ti israeletique.

¹⁶ Ti c'u s'elan ta xapasic ti ta sliquebal sba c'ac'ale, ja' jech ta xapasic ti ta yucubal c'ac'ale, yu'un ta xapasic ch'ul tsoblej. Yu'un ti jech c'ac'al taje, mu xa'abtejic, ja' no'ox mi tsots sc'oplal ta xameltsan ave'elic ti jujune.

¹⁷ Sq'uinal ti pan ti mu'yuc yich'oj ti spajubtasobile, ja' jun c'ac'al ti tsots sc'oplal ta xapasic ti q'uine. Yu'un jech yorail laj jloq'uesoxuc talel ta Egipto, ti ta xc'ot ta jbel c'usi albil ti tsots sc'oplal bejtsanbil ta xcom ta ajolique, ta stojol ti totil me'ile xchi'uc ti alab nich'nabiletique.

¹⁸ Ta xlic ave'ic pan ti mu'yuc yich'oj ti spajubtasobil ta smaleb c'ac'al yu'un ti xchanlajunebal (14) sliqueb ue, c'alal to ta smaleb c'ac'al ta jun xcha'vinic (21) c'ac'al yu'un ti u ta xc'ot ta tsutsele.

¹⁹ Vucub c'ac'al sjalil mi ja'uc jset'uc ta xavac'beic spajobtasobil ti pane. Buch'uuc no'ox ta sve' pan ti yich'oj spajubtasobile, ta xich' jipel loq'uel ta stojol ti Israele, manchuc mi ja' jyanlum, mi ja' israel.

²⁰ Ja' yu'un ti jech taj une, mu me xave'ic ti pan ti yich'oj spajubtasobile. Ti buyuc no'ox tanijemoxuc batel ta nacleje, tsots sc'oplal ti mu xave'ic ti yich'oj spajubtasobile.’ ”

²¹ Jech ti Moisese laj stac ta iq'uel ti banquilal moletic yu'un ti Israel ti xi laj yalbee: “Batanic, ba tsaquic talel jcotuc ti ch'iom tot chije, mi ja' jcotuc ti ch'iom tot tentsun ti ta xtun avu'unic xchi'uc ti avalab anich'nabique. Ta xamilic xtoc yo' jech ta xich' pasel ti q'uin sventa Colele.

²² Ti xch'ich'ele, tsots sc'oplal ta xach'amic ta jun xch'amobil. C'asic talel xtoc jyomuc yanal hisopo te', ti ts'ajic ta ch'ich'e. Bonic ta ch'ich' sjunul smarcoil ti ti'nae. Mu me buch'u junucal xloc' batel ta sna c'alal mu to ta sacub ti osile.

²³ C'alal ta x'ech' ti Dios ta syayijesel ta milel xnich'nab ti egipcioetique, ta xil ti ch'ich' ti bonbil ta sjunul smarcoil ti ti'nae, jelavel ta xjelav xtoc ti ta na taje. Ja' jech ti Diose mu xac' ochuc ta anaic ti buch'u yich'oj yabtel ta yayijesvanej ta milele.

²⁴ Ti va'i s'elan laj yich' alel taje, ta me xavich'ic ta muc' xchi'uc ti anitilultaque, ti ja' c'ot ta jbel c'usi albil ti tsots sc'oplal com o sbatel osile.

²⁵ C'alal mi la'ochic batel ta osil ti ta xa'ac'batic yu'un Dios jech c'u cha'al yaloj ono'oxe, jechuc me staojuc yav ta xapasic ti q'uin ti va'i s'elan lique.

²⁶ C'alal xi ta xasjac'boxuc ti anich'nabique: ‘¿C'usi smelol le'e ti q'ue s'elan ta xapasique?’

²⁷ tsots sc'oplal ti xi xatac'beique: ‘Ti chon bolom li'e, ta xich' svocol ta milel yu'un ti q'uin Colel ti ja' yich'el ta muc' ti Diose. Yu'un ti c'alal laj syayijesan ta smilel ti egipcioetique, jelavel jelav ti bu snaic ti israeletic ti c'alal nacalic to ox ta Egiptoe, xchi'uc xtoc c'ot ta pasel ti colic ti calab jnich'nabcutique.’ ” Jech ti israeletique laj snijan sbaic ta yich'el ta muc'.

²⁸ Laj taj une, jech laj spasic scotol jech c'u cha'al albilic yu'un Dios ti Moisese xchi'uc ti Aarone.

Smilelic ti banquilal nich'nabiletique

²⁹ Ta o'lol ac'ubal un, ti Diose, mu yalel toyoluc ech' smilbe sbanquilal nich'nabtac ti jujuchop jnaclej egipcioetique. Yu'un jech c'ot ta stojol sbanquilal nich'on ti faraón ti oy sc'oplal ti ta xich' comel ti abtele, xchi'uc ti banquilal nich'oniletic ti tiq'uilic ta chuquele, xchi'uc sba yoltac ti chon bolometique.

³⁰ Jech ti faraone xchi'uc ti yaj'abteltaque, xchi'uc scotol ti egipcioetique, scotolic mu'yuc vayel yu'unic ti jech ac'ubal taje. Sjunlej Egipto x'avlajetic ta oq'uel yu'un ti me'inale. Yu'un scotol naetic buyuc no'ox oy animaetic.

³¹ Ti jech ac'ubal taje, ti faraone xi laj yal ti c'alal laj stac ta iq'uel ti Moisese xchi'uc ti Aarone: —Batanic, ch'aco abaic ta stojol ti jvinquileltac ti vo'oxuc israeloxuque. Batanic ta yich'el ta muc' ti Diose jech c'u cha'al laj avalique.

³² Iq'uic batel ti achijique, ti avacaxique jech c'u cha'al laj ac'anique. Batanic xa. Ja' no'ox un, c'anbeic vocol ti Dios ta jtojolale.

³³ Jech ti egipcioetique laj sujic ti israeletic ti ac'o loq'uicuc batel ta ora no'ox ti ta slumalique. Yu'un laj snopic ti xu' ta xchamic scotolique.

³⁴ Jech ti israeletique laj sbalic loq'uel ti vots'bil harina ti mu'yuc to yich'oj ti spajubtasobile. Laj stiq'uic ochel ta yavil. Laj spixic ta sc'u'ic ti laj scajan batel ta snequebique.

³⁵ Ja' jech xtoc jech laj spasic jech c'u cha'al albilic yu'un ti Moisés ti laj sc'anbeic ti egipcioetic ti c'usitic meltsanbil ta oroe, ti ta platae, xchi'uc ti c'u'ile.

³⁶ Jech ti egipcioetique, ac'bat xc'uxul yo'ntonic yu'un ti Diose. Jech o xal sjunul yo'ntonic laj yaq'uic batel ti c'usi ta xc'anbatic yu'un ti israeletique. Ja' jech laj spojic batel ti israeletic ti c'usi x'ayan yu'unic ti egipcioetique.

Ti israeletique ta xloq'uic ta Egipto

³⁷ Jech ti israeletique iloq'uic batel ta Ramsés. C'otic ta Sucot. Oy nan vaquibuc ciento ta mil (600,000) ti lec to no'ox jva'lej viniquetic ti ja' to sjabilal ta x'ochic ta soldadoil ti ta xanavic batele. Ja' mu'yuc tsacbil ta atel ti antsetique xchi'uc ti ololetique.

³⁸ Ja' jech xtoc xchi'inojic batel ep ta jmec stosol-tos sts'unubal ti jnaclejetique, xchi'uc ep xchijic, xvacaxic.

³⁹ Ti jech tacatic loq'uel ta jteclum Egipto ti israeletic yu'un ti egipcioetique, mu'yuc xa c'usi laj yutic ti laj smeltsanic ti ve'lile. Ja' yu'un un, laj sta'ajesic muc'tic pan ti vots'bil ta harina ti mu'yuc yich'oj ti spajubtasobile.

⁴⁰ Ti israeletique joc'tsajic ta naclej ta Egipto chanib ciento xchi'uc lajuneb xcha'vinic (430) jabil.

⁴¹ C'alal ts'aqui sc'ac'alil ti chanib ciento xchi'uc lajuneb xcha'vinic (430) jabile, xvoletic no'ox loq'uel ta j'ech'el ta Egipto ti yu'untac ti Diose.

⁴² Ti jech ac'ubal taje, lec stuc'ulanoj ti Diose yo' jech ta sloq'ues batel ta Egipto ti israeletique. Ti jech ac'ubal taje, ja' yich'el ta muc' ti Diose. Jech xtoc ti jech ac'ubal taje, ja' tsots sc'oplal ti ta xchabiic ti israeletic ti jaypoj chlaj ech'icuc xchi'uc ti yalab xnich'nabique.

Ti oy c'usi albil ta sventa ti q'uin Colele

⁴³ Ti Diose xi laj yalbe ya'i ti Moisese xchi'uc ti Aarone: “Ti oy c'usi tsots albil ta sventa ti q'uin Colele, xi s'elane: Ti milbil chon bolome, mu xu' ta sti'ic ti jyanlume.

⁴⁴ Yan ti mosovil ti manbil ta taq'uine, xu' ta sti' ti mi yich'oj xa ox ti circuncisione.

⁴⁵ Ti j'ech'el-be jyanlume xchi'uc ti buch'u ta sa' tojele, mu xu' sti' ti milbil chon bolome.

⁴⁶ Sc'an ti ta jbej no'ox na ti bu ta xich' ti'ele. Mi ja'uc jutebuc sbec'tal ti milbil chon bolom ta xich' ich'el loq'uele. Ti bu ta xich' ti'ele, mu xu' ta xich' c'asbel ti sbaquile.

⁴⁷ Ti jech taje, scotol ti israeletic ti jaychop oyique, ac'o yaq'uic ti matanale.

⁴⁸ Ac'o mi jech taje, ja' no'ox un, mi oy jun jyanlum ti nacal ta atojolic ti ta sc'an ta spas ya'i ti q'uin Colel sventa yich'el ta muc' ti Diose, ja' ta sc'an ti ba'yel ta xac'be yich' circuncisión scotol ti viniquetic ti c'u yepal oy ta snae. Ts'acal to un, xu' ta spas ti q'uine, ja' ti co'ol xa s'elan voq'uem ta alumalique. Ja' no'ox un, ti buch'u mu'yuc yich'oj ti circuncisione, mu xu' ta sti'ic ti milbil chon bolome.

⁴⁹ Ti israeletique xchi'uc ti buch'utic voq'uemic ta alumalique, xchi'uc ti jyanlumetic ti nacalic ta atojolique, jun no'ox me ti oy c'usi jbel tsots albil ta stojolique.”

⁵⁰ Jech ti israeletique laj spasic scotol jech c'u cha'al albilic yu'un Dios ti Moisese xchi'uc ti Aarone.

⁵¹ Ti jech c'ac'al taje, ja' o ti Diose laj sloq'ues batel ta Egipto ti mu albajuc yepal xvoletic batel ti israeletique.