Ester 9 - Bible in Tzotzil de Chamula

Tsalvanic ti judioetique

¹ Ta yoxlajunebal (13) c'ac'al yu'un ti xlajchebal (12) u sbiinoj Adare, ja' sc'ac'alil chapanbil ta xc'ot ta pasel smantal ti ajvalile, sc'ac'alil xtoc ti smalaojic ta stsalatic ti judioetique. Mu jechuc c'ot ta pasel un. Laj stsal scontraic ti judioetique.

² Ta scotol bic'tal lumetic ti bu c'alal smacoj ti ajvalil Asueroe, ti bu nacalic ta jteclumetic ti judioetique, laj svol sbaic ta jteclumetic yo' ta stsaquic ta leto ti buch'utic ta x'ilbat ti svocolique. Mi junuc ma' ti oy buch'u xu' xa yu'un ta stsaquel ta c'ope. Scotol ti jteclume, batem xch'ulelic ta xi'el.

³ Scotol ti j'abteletic ta bic'tal lumetique, ti its'inal ajvaliletic ti oy stalelic jujuvoc' oyic ta jujun bic'tal lume, xchi'uc ti buch'utic tsots yabtel ac'bilic yu'un ti ajvalile, stic' xa sba ta spacbel sc'oplal ti judíoetic ta scoj xi'elal ti Mardoqueoe.

⁴ Yu'un ti Mardoqueoe ja' xa jun vinic cajal yabtel c'otem ta sna ti ajvalile, ti puc xa batel sc'oplal ya'yejal ta scotol ti lumetique, ti jujun c'ac'al ta xich' yip ti yabtele.

⁵ Laj smilic ta espada scotol yajcontraic ti judioetique. J'ech'el laj stsutsesic. Laj spasbeic ta stojol ti bu xa c'alal xal ti yo'ntonique.

⁶ Ti ta steclumal no'ox Susae, laj smilic vo'ob ciento (500) ta vo' viniquetic.

^7-10 Laj smilic un, ti Parsandatae, ti Dalfone, ti Aspatae, ti Poratae, ti Adalíae, ti Aridatae, ti Parmastae, ti Arisaie, ti Aridaie, xchi'uc ti Vaizatae, slajunvo'al xnich'nab Amán ma' taj une. Ti judioetique mu'yuc laj yu'ninbeic ti c'usi oy yu'unic une.

¹¹ C'alal laj ya'i ajvalil ti c'u yepal lajic ta milel ta lum Susa ti c'ac'al taje,

¹² xi laj yalbe ya'i ti me' ajvalil Estere: —Ti judioetique laj xa smilic vo'ob ciento (500) ta vo' viniquetic, xchi'uc ti lajunvo' (10) xnich'nab Amán ta steclumal ti Susae. ¿C'u xa ono'ox s'elan laj spasic ta yan bic'tal lumetic ti bu c'alal jmacoje? ¡Alo xa ca'itic c'usi to yan ta xac'an, ta xacac'bot!

¹³ Ti Estere xi laj staq'ue: —Ti lecuc laj ya'i ti Jcuch abtele, ac'baticuc eil ti'il ti judíoetic oc'om li' ta Susae, ti ac'o spasic yan velta jech c'u cha'al ti mantal avaloje, xchi'uc ti yich'uc joc'anel ta te' sbec'tal stacopalic ti lajunvo' xnich'nab ti Amane.

¹⁴ Ti ajvalile laj yal mantal ti jechuc c'otuc ta pasele. Ti c'u s'elan loq'uem ta puquel ti mantale, laj yich' albel sc'oplal ta muc' ta lum Susa. Sbec'tal stacopal ti lajunvo' xnich'nab Amane, laj yich'ic joc'anel ta te'.

¹⁵ Ti judíoetic ti nacalic ta muc' ta Susae, lic xcha'tsob sbaic ta xchanlajunebal (14) sc'ac'alil yual ti sbiinoj Adare. Laj to smilic vo'lajunvinic (300) ta vo' viniquetic ti bu taje. Mu'yuc xa laj spicbeic ti c'usitic x'ayan yu'unique.

¹⁶ Ti judíoetic nacalic ta yan jteclumetique laj stsob sbaic ec ta sc'ac'alil oxlajuneb (13) yual ti Adar ono'oxe, ta spojel sbaic ta spaquel ti sc'oplalique, ta stsutsesel ti yajcontraique. Laj smilic vo'lajuneb xchanvinic mil (75,000) ta vo' ti yajcontraique. Mu'yuc laj spicbeic jutebuc ti c'usitic x'ayan yu'unique.

¹⁷ Taj une, ta sc'ac'alil xchanlajunebal (14) ti ue, lic xcux yo'ntonic un. Xmuyubajic lic spasic q'uin xchi'uc ve'ic uch'ubajic.

¹⁸ Yan ti judíoetic nacalic ta lum Susae, vololic o ta sc'ac'alil yoxlajunebal (13) xchi'uc ta xchanlajunebal (14) sc'ac'alil yu'un ti ue. Jech lic xcux yo'ntonic ta yo'lajunebal (15) sc'ac'alil. Xmuyubajic lic spasic q'uin xchi'uc ve'ic uch'ubajic.

¹⁹ Ti judíoetic ti nacalic ta jteclum xchi'uc ti ta bic'tal lumetic ti mu'yuc bajal ta moque, laj spasic q'uin ve'el uch'ubajel ta xchanlajunebal (14) sc'ac'alil u ti sbiinoj Adare. Xmuyubaj no'ox ech' yu'unic ti q'uin laj spasique, ti laj sq'uelanbe sbaic matanal ta jujun tale.

Ti q'uin Purime

²⁰ Ti Mardoqueoe laj sbejan ta vun ti va'i s'elan xlaj c'otanuc ta pasele. Laj stacanan batel vunetic ta stojol ti judíoetic ti buyuc no'ox nacalic ta jujun lum smacoj ti Asueroe, mi nopol no'ox, mi nom to.

²¹ Laj yalbe batel ti jujunuc jabil spasicuc q'uin ta sc'ac'alil xchanlajunebal (14) xchi'uc ta sc'ac'alil yo'lajunebal (15) ti u sbiinoj Adare.

²² Yu'un ja' o jech sc'ac'alil laj stsutsesic yajcontra ti judioetique, ti ja' o yual lic joybijuc ta muyubajel, ta q'uin, ti c'alal x'oc' x'avanic yu'un ti at-o'ntone. Tsots sc'oplal, muyubajicuc spasicuc ve'el uch'ubajel, ta yac'anbel sbaic matanal ta jujun tal, ti yac'beicuc limoxna ti buch'u abol sbaic ti c'ac'al taje.

²³ Na'bil o com yu'un ti judíoetic ti va'i s'elan laj c'otuc ta pasele, xchi'uc ti c'u s'elan laj sbejan comel ta vun ti Mardoqueoe.

²⁴ Yu'un ti Amán yajcontra scotol ti judioetique, laj snop ta stsutses ta j'ech'el ti laj sq'uel ta orail ta smilele, ti j'ech'el ta stsutsese.

²⁵ Le' une, c'alal bat ta stojol ajvalil ti Estere, ti ajvalile laj yal jun mantal ti yich'ic ts'ibael ta vun scotol ti c'u s'elan chopol ta spas ti Amán ta stojol ti judioetique, ti cajaluc c'otuc ta sba stuc xchi'uc ti xnich'nabe.

²⁶ Jech o xal ti sc'ac'alil taje, laj yac'beic sbiin Purim, yu'un Pur xi no'ox ma' ti jbel no'ox albile, q'uel orail ta xal ta sc'op ti stuquique. Jech c'u cha'al ti buch'u laj yilique, xchi'uc ti laj ya'i ta sni' ta xchiquinique, ti buch'u laj yilic ta sba ta satic ti c'u s'elan c'ot ta pasele, na'bil c'ot yu'unic un cha'e ti c'u s'elan laj sbejan ta vun ti Mardoqueoe.

²⁷ Ti judíoetic une, xi s'elan na'bil c'ot yu'unic xchi'uc ti snitilulique, xchi'uc scotol ti buch'utic laj sco'oltas yo'ntonic xchi'uc ti judioetique: Mu stselbuj yu'unic jujun jabil ta spasel q'uin chib c'ac'al co'ol s'elan albil ti sc'oplale, ti mu syanijesic c'u s'elan laj yich'ic chanubtasele,

²⁸ ti vulesbiluc ta o'ntonal ti jech c'ac'al taje, ti spasicuc no'ox q'uin ti alab nich'nabiletic ta x'ech'ique, ti jujuchop totil me'iletique, ti ta bic'tal jteclumetique, ti ta muc' ta lumetique, ti mu xch'ay sc'oplal yu'unic ti judioetic xchi'uc ti snitilulic ta x'ech'ique.

²⁹ Ti me' ajvalil Ester yantsil nich'on ti Abihaile, xchi'uc ti Mardoqueo ti jun judio vinique, lic yabtelan ta sts'ibael vun ta sventa sc'oplal ti q'uin Purime, ti ta svinajesbe sc'oplal ti sliqueb q'uine.

³⁰ Laj stac batel ta stojol scotol judíoetic ti oy ta vucub yucvinic (127) ta jchop muc' ta lum smacoj ti Asueroe. Ta yutsilal o'ntonal ti jamal lec ti eil ti'ile,

³¹ laj yal mantal ti yich'uc pasel sq'uinal Purim ti sc'ac'alil albil sc'oplale, jech c'u cha'al laj yal mantal ti Mardoqueoe, xchi'uc ti me' ajvalil Estere, ta sventa ti stuque xchi'uc ti snitilulique. Laj stacbeic ta alel xtoc sc'oplal yan mantaletic sventa ti comtsanej vaje, xchi'uc ti oq'uel avanele.

³² Vinaj sc'oplal c'u s'elan laj yal mantal ti Estere, ti tsots sc'oplal mu stselbuj ta spasel ti q'uin Purime. Scotol ti va'i s'elan taje, laj yich' bejanel ta jpoc vun.