Ester 7 - Bible in Tzotzil de Chamula

Chapaj sc'oplal ta xich' milel ti Amane

¹ Ti ajvalile xchi'uc ti Amane batic ta ve'el uch'ubajel un.

² Ti xchibal c'ac'al taj une, ti ajvalil eque xi laj yalbe Ester ti c'alal xyaquet ti ve'el uch'ubajele: —Ti c'usi oy ta avo'nton ta xac'ane, c'anbun un, ta xcac'bot, ac'o mi o'lol jvoc' ti bu c'alal jmacoje, ta xcac'bot.

³ Ti Estere xi laj staq'ue: —Mi c'uxun ta yo'nton ti Jcuch abtele, mi lec ta xa'i ti c'u s'elan ta xcalbee, jun no'ox ti yatel co'nton ta jc'anbe ti Jcuch abtele. Ta jc'anbot ti xch'ayuc to ti jmul jcolo' ta yaq'uel ti jol jbaquile, ta yaq'uel sjol sbaquil ti jteclumale.

⁴ Ti vu'une jech c'u cha'al ti jteclumale, chonbil xa ti jol jbaquilcutic ti j'ech'el ta xquich'cutic tsutsesele. Ti ja'uc no'ox ta xquich'cutic chonel ta mosovile, mu'yuc c'usi ta xcal ti jechuque.

⁵ Va'i ti Asuero une xi laj sjaq'ue: —¿Buch'u xa ono'ox taj une? ¿Bu oy ti va'i s'elan snopoje?

⁶ Xi laj stac' ti Estere: —¡Ti jcontrainvanej jti'ovale, ti spajebal xa no'ox mu'yuc xch'ulele, ja' ti vinic Amán li'e! C'alal laj ya'i ti Amán taje, toj alubel c'ot ta xi'el ta stojol ti ajvalile, xchi'uc ta stojol ti me' ajvalile.

⁷ Xcapet xa sjol va'i loq'uel ti Asuero ta yut na ti bu xyaquet ti ve'el uch'ubajele. Bat ta yamaq'uil na ti bu ts'unbil ti nichime. Ja'uc le' une, c'alal yil ti Amán ti jbel sc'oplal ta x'aq'ue ta milel yu'un ti ajvalile, com ti bu oyic ta sc'anbel vocol ti me' ajvalil Estere, ti mu x'ac'bat stoj ta sjole.

⁸ C'alal sut talel ta ts'unubal nichim ti ajvalile, och batel ta yut na ti bu xyaquet ti ve'el uch'ubajele. Laj yil batel ti ja' o patal ech'el ti Amán ta chotlebal ti bu quiquil ti Estere, ti xi tsots c'opoj ti ajvalile: —¿Mi yu'un ta xavilbajin ava'i xtoc ti me' ajvalil ta jba ta jsat li' ta yut jnae? Ti jech loc' ta ye ta sti' ti ajvalil ti va'i s'elan ti c'op taje, ta jech yepal, talic jun chib j'opisialetic ti c'otem ta yajchabivanej ti ajvalile, nax to ti mac xutbeic sat ti Amane.

⁹ Ti Harbonae, jun ta scotol ti yajtunel ti ajvalile, xi laj yale: —Ta sna ti Amane, chapal xa yu'un jun joc'anobbail ti yich'oj chib xcha'vinic (22) metro ti stayleje, ti laj yac' ta pajel ta sventa ta sjoc'an ti Mardoqueoe, ti c'alal ja' jun vinic oy c'usi lec laj yalbe ya'i ti Jcuch abtele. Xi laj yal mantal ti ajvalile: —Ba joc'anic ya'i ti bu taj un cha'e.

¹⁰ Ti Amane, bat yich' joc'anel stuc ta joc'anobbail ti bu xchapanoj ox ta sventa ti Mardoqueoe. Xlaet to yo'nton laj ya'i ti ajvalil ti jech c'ot ta pasele.