Ester 5 - Bible in Tzotzil de Chamula

Ti Estere ta xbat sc'opon ti ajvalile

¹ Ech' xa ox oxib c'ac'al un, ti Estere lic slap sc'u' sventa ti me' ajvalilale. Och batel ta yut na. C'ot sva'an sba ta stuq'uil bu chotol ti ajvalil ta xchotlebe, ta yeloval ti ti'nae.

² C'alal laj yil ti ajvalil ti va'al ta amac' ti me' ajvalil Estere, stse'et xa ta stojol laj sye'be ech'el ti xvaxtonil meltsanbil ta oro ta stuq'uil ti bu va'ale. Nopaj ech'el ti Ester ta snupel ti vaxtone.

³ Xi laj sjac' ti ajvalile: —¿Mi yu'un oy c'usi laj anuptan, me' ajvalil Ester? ¿Mi yu'un c'usi oy ta avo'nton ta xac'an? Le'e, mi ta xac'anbun o'lol jvoc'uc ti c'u yepal jmacoje, ta xcac'bot.

⁴ Ti Estere xi laj staq'ue: —Mi lec ta xava'ie, Jcuch abtel, avocoluc, c'otan ta ve'el uch'ubajel ti jchapanoj xa ta aventae, ti ic'o batel xtoc ti Amane.

⁵ Ti ajvalil une xi laj yal ti mantale: —Sa'ic talel ta jech yepal ti Amane, ti yich'uc ch'unel jech c'u cha'al oy ta yo'nton ti me' ajvalil Estere. Ti ajvalile xchi'uc ti Amane batic ta ve'el uch'ubajel ti bu xchapanoj xa ti me' ajvalile.

⁶ Ti sjalil xyaquet ti ve'el uch'ubajele, ti ajvalile xi laj yalbe ti Estere: —C'anbun ti c'usi oy ta avo'ntone, mi ja'uc ta jaltabot, ac'o mi ta xac'anbun o'loluc ti c'u yepal jmacoje.

⁷ Ti Estere xi laj staq'ue: —Xi s'elan ma' ti jtos oy ta co'nton ta jc'ane:

⁸ Mi c'ux ta xiya'i ti Jcuch abtele, ti ta spas ta jtojol ti c'usi oy ta co'ntone, ti ta xc'ot ta pasel yu'un ti c'usi ta jc'anbee, talanic oc'om ta ve'el ta uch'ubajel xchi'uc ti Amane, ti chapanbil xa cu'un xtoc ti ve'el uch'ubajel ta sventa ti Jcuch abtele. Va'i unbi, ta xlic calbe ya'i ti c'usi ta xisc'anbun ti Jcuch abtele.

Ti Amane ta xchapanbe sjoc'anobil ti Mardoqueoe

⁹ C'alal laj yo'nton ta ve'el uch'ubajel ti Amane, mu xa c'usi sna', xmuyubaj xa loc' batel. Ja' no'ox un, toj ilinel c'ot yu'un ti Mardoqueoe, ti laj yil ti oy ta sti' sna ajvalil ti jeche' nijil ta j'ech'ele, ti mu stoy sat ta stojol ti ta x'ech'e.

¹⁰ Manchuc mi jech un, mu'yuc xac' ta ilel ti xti'et sjol ti uni jliquel taje. C'alal c'ot ta sna une, laj sta ta iq'uel ti buch'utic lec xil sba xchi'uque, xchi'uc ti yajnil ti Zeres sbie.

¹¹ Lic slo'iltabe ya'iic ti yepal no'ox ti sc'ulejale, ti yepal no'ox ti yalab xnich'nabtaque, ti stuc no'ox cajtsanbat sc'oplal yu'un ti ajvalil ta scotol ti yajtuneltaque, ti yaj'opisialtaque, ti cajal yabtel ac'bile, ti mu sta ti yane.

¹² Xi to laj sts'ac batel ti slo'il xtoque: —C'ajomal no'ox jtuc li'iq'ue ta ve'el yu'un ti me' ajvalil Ester ti laj yac' jun ve'el uch'ubajel ta sventa ti ajvalil naxe. Ic'bilun xa xtoc ta ve'el uch'ubajel ti ta xac' oc'om ti me' ajvalile.

¹³ Manchuc mi jech un, mu to xlaetuc ta xca'i ti chotol ta sti' sna ajvalil ti Mardoqueo ta xquile.

¹⁴ Va'i ti yajnil une xchi'uc scotol ti buch'u lec xil sbaic xchi'uque, xi laj yalbeique: —Alo mantal ti yich'uc pajel junuc joc'anobbail ti yich'ojuc chib xcha'vinic (22) metro ti snatile. Ti sob oc'ome, c'anbo ti ajvalil ti yich'uc joc'anel ti Mardoqueo ti bu taje. Mi ja'uc xa xvulvun avo'nton jutebuc c'alal ta xabat ta ve'el uch'ubajel xchi'uc ti ajvalile. Xvic'luj to sat laj ya'i ti Amán ti va'i s'elan laj yich' bijubtasele. Laj stac ta smeltsanel ti joc'anobbaile.