Ester 4 - Bible in Tzotzil de Chamula

Oyic ta at-o'nton ti judíoetic yu'un ti mantale

¹ C'alal laj ya'i Mardoqueo scotol ti va'i s'elan c'ot ta pasele, lic xch'i' ta jatel sc'u', senyail mu x'ech' ta xa'i ti vocole. Lajemic xa c'u'il lic slap. Lic svij tan ta sjol. Lic sjoyobta ta xaniel ti jteclum ti x'oc' x'avan yu'un ti vocole.

² Ja' jech c'ot c'alal to ochebal ti'na yu'un ti ajvalile. Mu x'aq'ue ochuc batel ti buch'u slapoj jech c'u'il taje.

³ Ti bu ta xc'ot xtoc ta jujun jteclumetic smantal ti ajvalile, mu xa stac' a'yeluc ta xa'iic ti judíoetic yu'un ti at-o'ntone. Laj yicta yotic ta svinajesel ti x'oc' x'avanic xmal no'ox ti ya'lel satique. Yepalic xpuch'an sbaic ta tanil c'oc' ti lajemal c'u'il slapojique.

Ti Estere ta sva'an sba ta spaquel ti c'ope

⁴ Ti me' mosoviletic ta xtunic ta stojol ti me' ajvalil Estere, xchi'uc ti viniquetic ti c'otem ta yajchabivaneje, laj yalbeic ya'i ti c'usi ta xc'ot ta pasele. Va'i ti me' ajvalile, och ta vul o'nton. Laj stac ech'el c'u'il ta stojol ti Mardoqueo ti sjeltauc ti lajemal c'u'il slapoje. Mu ja'uc c'ot ta yo'nton.

⁵ Ti Ester une laj sta ta iq'uel ti Hatac jun j'opisial ti sbainoj ta xchabiel sna ti ajvalile. Laj yalbe mantal ti batuc sq'uel ti Mardoqueoe, ti sjac'beuc c'usi ta xc'ot ta pasele, ti c'u cha'al ti va'i s'elan ta spase.

⁶ Ti Hataque bat sc'opon ti Mardoqueo ti oy ta yamaq'uil jteclum ta yeloval sti' sna ti ajvalile.

⁷ Ti Mardoqueoe xchapet lic yalbe ya'i ti c'usi ta xc'ot ta pasele, xchi'uc ti epal plata ta xac' ti Amán ta sq'uejobil taq'uin yu'un ti ajvalile, ti ja' xa stojol sjol sbaquilic yo' ta xc'ot ta tsutsesel ti judioetique.

⁸ Laj yac'be jlic sloc'ol vun xtoc, mantal ti meltsaj ta Susa sc'oplal ti ta xich'ic tsutsesele, ti yac'beuc ti Estere yo' jech chapal lec ta sni' xchiquin scotol ti c'usi ta xc'ot ta pasele. Laj sc'ubanbe xtoc ti batuc sc'opon ajvalil ti Estere, ti sc'anbeuc vocol ta spacbel sc'oplal ti slumale.

⁹ Sut ech'el ti Hataque. Xchapet laj yalbe ya'i Ester ti c'u s'elan laj yal ti Mardoqueoe.

¹⁰ Va'i ti Estere laj xcha'tac batel ti Hataque, ti xiuc yalbe ya'i ti Mardoqueoe:

¹¹ “Sna'ic lec scotolic ti buch'utic ochemic ta tunel yu'un ti ajvalile, xchi'uc ti jnaclejetic ti buyuc no'ox sventainoj ti ajvalile, chapanbil ti oy c'usi tsots albile, ti ta xich' milel scotol, ta vinic ta antsetic, mi ta xjelav batel ta o'lol yamaq'uil na ta sq'uelel ajvalil c'alal mu'yuc ic'bile. Ja' no'ox mu xlaj ta milel ti buch'u ta xye'bat ech'el ta stojol ti vaxtonil ti meltsanbil ta oroe, svinajeb ti c'ux to ta o'ntonale. Mu xa yanuc c'otem ta jtojol ec un, yu'un oy xa ta lajuneb xcha'vinic (30) c'ac'al, mu'yuc staojun ta iq'uel ti ajvalile.”

¹² C'alal albat ya'i Mardoqueo ti va'i s'elan stacoj batel a'yej ti Estere,

¹³ xi laj yal batel ti c'op ec une: “Mu xanop ti mu'yuc atijel ta c'op ti oyot ta sna ti ajvalil ti judio ants ti ta xacole.

¹⁴ Mi xach'ayet no'ox avi tanae, mi mu'yuc c'usi ta xavale, oy nan bu ta xlic talel spojel scoltaelic ti judíoetic ta yane. Albo xa no'ox ava'i avo'nton ti ta xacham xchi'uc ti yuts' yalal ti atote. ¡Ti lac'ot ta me' ajvalile, yic'al nan ti ja' c'ot ta pasel ta xacoltauncutic ti vi s'elan chapal jc'oplalcutique!”

¹⁵ Va'i ti Estere xi laj stac' batel ti a'yej ta stojol ti Mardoqueoe:

¹⁶ “Batan, ba tsobo scotol ti judíoetic ta Susae, ti yictaicuc yotic ta jventae. Mu'yucuc c'usi stun slajesic oxib c'ac'al xchi'uc oxibuc ac'ubal. Jech ta jpas ec xchi'uc ti cajmosovtaque. Ta ts'acal to un, ta xbat jc'opon ti ajvalile, ac'o mi mu jechuc ta xal ti oy c'usi tsots albile. Mi ta smilicune, ac'o smilicun xch'a.”

¹⁷ Va'i ti Mardoqueo une laj spas scotol ti c'u s'elan chapbat yu'un ti Estere.