Ester 1 - Bible in Tzotzil de Chamula

Ti ve'el uch'ubajel laj xchapan ti ajvalil Asueroe

¹ Ti lo'il a'yej li'e, c'ot ta pasel c'alal tiq'uil ta yabtel ti Asueroe, ti ja' ajvalil yu'unic ti vucub yucvinic (127) ta chop bic'tal lumetique, ti lic ech'el ta slumal Indiae, ti c'ot c'alal to Etiopiae.

² Ti jteclum Susae, c'otem ta spasob mantal ta scotol.

³ Ta yoxibal jabil stic'lej ta ajvalilal une, ti ajvalil Asueroe lic spas q'uin sventa yich'el ta muc' scotol ti yajtuneltaque, xchi'uc ti xchi'iltac ta abtel sventa ti ajvalile, ti banquilal soldado yu'un ti Persia xchi'uc ti Mediae, ti its'inal ajvaliletique, xchi'uc ti banquilaletic yu'un ti jujuchop bic'tal lumetique.

⁴ Yu'un c'ajomal no'ox ta xac' ta ilel ti sc'ulejale, ti cuchem yu'un ti ochem ta ajvalilale, ti stuc xa no'ox ti jelavem stsatsal ta j'ech'ele. Jalij o'lol jabil ti q'uine.

⁵ C'alal laj taje, laj to spas yan q'uin ti ajvalil ti jalij vucub (7) c'ac'al ta yamaq'uil sna bu ts'unul ti nichimetique. Scotolic c'u yepal nacalic ta slumal Susae, ic'bilic ti buch'utic tsots yabtelique, xchi'uc ti buch'utic mu tsotsuc yabtelic yich'ojique.

⁶ Ti amaq'ue nichimtasbil lec ta c'upil sba lequiquil saquil poc', xchi'uc ta yax'elan ti xyaxale, ti joc'ajtic ta yax'elan tsajal xela noe, ti xojbil jelavel ta jomolil sat ta plata taq'uine, ti c'otem xchuc sba ta jujun oy ti meltsanbil ta baxtone. Ti peq'uel chotlebaletic laj yaq'ue, naca meltsanbil ta oro, ta plata, ti yich'oj naca c'upil sba pac'bil tonetic ti sts'ayts'un no'ox yutsile, ti jtos o ta baxtone, ti saquil baxtone, xchi'uc ti ic'al baxtone.

⁷ Sbisol ti uch'bolal ta xuch'ique, naca meltsanbil ta oro, ti yalel toyol c'u s'elan ti jujun bise. Yepal no'ox ta j'ech'el ti vinoe, jech c'u cha'al loq'uem ayanem ta yo'nton ti ajvalile.

⁸ Le' une, ti ajvalile yalojbe mantal ti banquilal jtuneletic ta snae, ti mu sujvanic ta uch'bajele, ti st'ujuc stuquic ti c'usi lec ta xa'iic ti buch'utic ic'bilique

⁹ Jech ec ti me' ajvalil Vastie lic xchapan ta yaq'uel ve'lil sventa yajniltac ti buch'utic ic'bilic ti oy ta sna ti ajvalil Asueroe.

¹⁰ Ta yucubal xa c'ac'al ti q'uine, xmuyubaj no'ox ta xa'i ti ajvalil ti xjimet xa sjol yu'un ti vinoe. Jech laj stac talel ti Mehumane, ti Biztae, ti Harbonae, ti Bigtae, ti Abagtae, ti Zetare, xchi'uc ti Carcase, vucub viniquetic ti ja' co'ol yo'ntonic xchi'uque.

¹¹ Laj yalbeic mantal ti yiq'uicuc talel ta stojol ti me' ajvalil Vasti ti c'upiluc sba xchi'uc ti sronail sjole, yo' jech ti jteclume xchi'uc ti buch'utic cajal yabtel yich'ojique, ch'ayaluc c'otuc yo'ntonic yu'un ti xtixet no'ox yutsil ti me' ajvalile, ti c'upil sba ta j'ech'el ti me' ajvalile.

¹² Ti me' ajvalil une mu'yuc laj xch'un iq'uel yu'un ti ajvalil ti tacvan ta iq'uel ta sventa ti viniquetic ti co'ol yo'ntonic xchi'uque. Va'i ti ajvalil une ilin ta j'ech'el, ti sbic' xa sc'ac'al yo'nton xchi'uque.

¹³ Jech laj yich'be ye sti' un ti buch'utic xojtiquinic lec ti oy c'usi tsots albil ta sventa taje. Stalelic ti ajvalil ti ta sbainic yu'un ti buch'utic xojtiquinic ti oy c'usi tsots albil ta sventa ti c'usi sc'an pasele.

¹⁴ Ti buch'utic nabalic ta sts'el ta stojol ti ajvalile, ja'ic ti Carsenae, ti Setare, ti Admatae, ti Tarsise, ti Merese, ti Marsenae, xchi'uc ti Memucane, vucub viniquetic cajal yabtelic yich'oj yu'un ti Persia xchi'uc ti Mediae, ti sbainojic ti jbijubtasvanej ti cajal yabtel yich'ojic ta sventa ti ajvalil yu'un ti muc' ta lume.

¹⁵ Xi jac'batic yu'un ti ajvalile: —Ti co'ol ta xal jech c'u cha'al ti oy c'usi tsots albile, ¿c'usi ta nopbel ti me' ajvalil Vasti ti mu'yuc laj xch'un ti laj jta ta iq'uel ta sventa ti cajtuneltaque?

¹⁶ Xi laj yal ti Memucan ta stojol ti ajvalil ta sba ta satic ti c'u yepal svoloj sbaic ti c'otem ta jbijubtasvanej yu'un ti ajvalile: —Ti me' ajvalil Vastie ma'uc no'ox laj stoy sba ta soquesbel yo'nton ti Jcuch abtele, laj stoy sba ta soquesbel yo'ntonic scotol ti j'abteletic yu'une, xchi'uc scotol ti jteclumetic ti bu c'alal smacoj ti ajvalil Asueroe.

¹⁷ Ti c'usi laj spas ti me' ajvalile, ta xlic ya'iic scotol ti antsetique. Ta scoj unbi, mu xaq'uic ta venta liquel ti smalalique, ti xi ta xlic yalique: “Ti ajvalil Asueroe laj sta ta iq'uel ma' ti me' ajvalil Vastie, mu'yuc laj xch'un batel ti iq'uel yu'une.”

¹⁸ Yajnil ti j'abteletic yu'un ti Persia xchi'uc ti Mediae, c'alal ta xa'iic ti va'i laj spas ti me' ajvalile, avi tana le'e, ta xlic svul sbaic xchi'uc ti smalalique. Ta xc'ot ta pasel ti ta xjipvan xtenvanique.

¹⁹ Mi lec ta xa'i ti Jcuch abtel une, xi s'elan licuc sts'iba mantal ti ajvalile, ti bejanbil comuc jmoj xchi'uc ti oy c'usi tsots albil yu'un ti Persia xchi'uc ti Mediae, yo' jech mu xtub ti yipe: “Ti me' ajvalile, j'ech'eluc mu xa xbat sva'an sba ta xchi'inel ti ajvalile.” Ti sbiinoj me' ajvalile, yich'uc yan ants ti buch'u xich'be ti smelole.

²⁰ Ti mantale, yich'uc aq'uel ta na'el ta scotol ti bu c'alal amacoje, ja' to jech ta xlic yich' ta muc' smalal scotol ti antsetique, ti c'uc no'ox s'elan oyique.

²¹ Ti c'u s'elan laj snop ti Memucane, lec laj ya'i ti ajvalile, xchi'uc ti c'u yepal yich'oj yabtelic ta tsoblebal yu'un ti ajvalile. Ja' jech laj spas o ti ajvalile.

²² Lic stac batel vunetic ta jteclumetic ti bu c'alal smacoje, ti ts'ibabil ta sc'op stuquique, ti xa'iic lec ti jujuchop ti bu nacalique, xchi'uc ti jteclum bu c'alal smacoje, ti ta xich'ic albel ti antsetic ti jch'unej-mantaluc ta stojol ti smalalic ta snaique, xchi'uc ti ich'biluc ta muc' sc'opic ti viniquetic yu'unique.