Esdras 9 - Bible in Tzotzil de Chamula

Smul ti jteclume xchi'uc c'opoj ti'in ti Esdrase

¹ C'alal laj taj une, xi tal yalbeicun ti banquilaletic ti nopajic talel ta jtojole: “Ti israeletique, xchi'uc ti paleetique, ti levitaetique, co'ol sjolic ti mu xicta sbaic ta spasel jech c'u cha'al liquem yu'un ti jnaclejetic yu'un ti jteclume. Ti xcaltique naca stalel ti cananeoetique, ti hititaetique, ti ferezeoetique, ti jebuseoetique, ti amonitaetique, ti moabitaetique, ti egipcioetique, xchi'uc ti amorreoetique, ti spajebal xa o ti c'usi chopol liquem yu'unic ta spasele.

² Ti yalab xnich'nabique laj yic' sbaic xchi'uc yalab xnich'nabic ti yan jteclum taje. Ti steclumal Dios une laj scap sba sts'unubalic xchi'uc ti jnaclej yan jteclumetique. Ti buch'utic ba'yel laj sliquesic ti mulil colo'ile, ja' ti banquilal jtsobvanejetique, ti its'inal ajvaliletique.”

³ C'alal laj ca'i ti va'i s'elan ti c'ope, lic jch'i' ta jatel ti jc'u'e. Laj jots ta bulel ti stsotsil jole, ti quisime, svinajeb ti mu x'ech' ti yipal xc'uxul laj ca'i yu'une. Juteb xa tsacal com ti co'nton yu'un ti laj jchotan jbae.

⁴ Scotol ti buch'utic bec'bil to ox loq'uic ta slumalic ti ta xi'taic ti sna' xac' taluc vocol ta scoj mulil ti Dios yu'un ti Israele, chotol xa no'ox licom ti c'alal vulic ta jtojole. Yoquel mu x'ech' o ta xca'i c'alal laj sta yorail ta xich' aq'uel ti milbil matanal sventa mal c'ac'ale.

⁵ Ti jech ora taje, ech' jutuc ti yipal laj ca'ie. Jatantic xa jc'u' lic jta ta c'oponel ti Ajvalil Dios cu'une.

⁶ Xi laj cale: “Jch'ul tot, Cajval, nijilun ta q'uexlal. Mu xa jchi'uc jch'ulel ta xca'i ti mu stac' a'yeluc ti c'usi ta xcalbot talele. Yu'un ti jchopolilcutique, spajebal xa ti bu c'ote. Ti jmul jcolo'cutique c'otem c'alal to vinajel.

⁷ Jech staoj o yav ti mu x'ech' xjelav oyuncutic ta mulile, ti vo'ne xa sliquel talele. Ta scoj ti jelavem ti jtoyobbailcutique, co'oluncutic xchi'uc ti ajvaliletic cu'uncutique, ti paleetique, li'aq'uecutic ta yoc ta sc'ob ti yan ajvaliletic yu'un ti muc' ta lumetique. Laj jtacutic yayijesel. Bec'bil liloc'cutic batel. Lipojbatcutic ti c'usitic oy cu'uncutique. Ilbajinbiluncutic ti jech to oyuncutic tanae.

⁸ Ja' no'ox jech tana xtoque, Cajval, Ch'ul Dios, c'ot ta pasel ta sventa syail xc'uxul avo'nton ti oy jvoc' cu'uncutic ti pojbil ta xc'ote. Ta xavac' ave ati' ti ta xinaquicutic avu'un ta ch'ul banomile. Yu'un laj jtacutic avu'un ti sacub to ti osil banomil ta xca'icutique. Laj avac'buncutic ti siquetel co'ntoncutic licolcutic ta mosovile.

⁹ Manchuc mi jech un, mu'yuc laj ajip laj atenuncutic ti c'alal tiq'uiluncutic ta mosovile. Laj avac' ta ilel yutsil avo'nton ta jtojolcutic ta stojol ti ajvaliletic yu'un ti Persiae, ti laj to avac' ave ati' ti cuxuluncutic yo' ta jcha'va'ancutic ti ach'ulna ti bu stuc xch'uch'ulil busul come. ¡Yu'un ava'anoj atec'anoj aba cu'uncutic ta Judae ta Jerusalene!

¹⁰ “Tana une, Ch'ul Dios, ¿c'usi xa xu' ta xcalcutic ta atojol ti c'alal c'ot xa ta pasel cu'uncutic scotol ti c'usi mu lecuque? Yu'un mu'yuc xc'ot ta pasel cu'uncutic ti amantaltaque,

¹¹ c'alal laj avalbuncutic mantal ta sventa ti j'alc'opetique, ja' ti avajtuneltaque. Laj ono'ox avac' jna'cutic ti soquem ta j'ech'el ti jteclum ti bu oy sc'oplal ta xi'ochcutic batele, ti ta xcu'nincutique. Laj avac' ta na'el ti naca mulil oy ta yo'ntonic ti jnaclejetic teye, ti mu lecuc ta q'uelel ti c'u s'elan liquem yu'unic ta spasele, ti yac'ojbeic yipal spasel ti c'usi mu stac' q'uelel ta xavile.

¹² Ja' jech xtoc laj avalbuncutic ti mu xu' ta xiq'uic jtsebcutic ti squerem nich'onique. Mi ja'uc xu' ta xiq'uic stsebic ti jquerem jnich'oncutique, ti mu'yuc sc'oplal ta jpas ta jun co'ntoncutic ti mu xa c'usi jna'cutic xchi'uc ti jnaclejetic taje, ti c'ajomaluc no'ox oyuc yipal cu'uncutique, yo' jech ta jc'upincutic yutsil slequil avo'nton ta jteclum taje, yo' jech ta xcac'becutic comel ta xrexto sbatel osil ti jnitilulcutique.

¹³ “Ti jech c'ot xa ta pasele, yu'un ta scoj scotol ti c'usitic laj c'otuc ta jtojolcutic yu'un ti jtoyobbailcutique, xchi'uc ti jmul jcolo'cutique, lic vinajuc un, mu ta jloq'ueluc avo'nton laj atsutsesuncutic ti c'u s'elan xu' sta ta xquich'cutic ta scoj ti jmulcutique, yu'un laj quilcutic ti laj jta ti jcolelcutic avu'une.

¹⁴ ¿Mi yu'un xu' to ta jbajcutic ti c'usi ta xal ti amantaltaque, ti ta jco'oltas co'ntoncutic xchi'uc ti jnaclejetic ti mu'yuc stuq'uil smelol ti c'u s'elan liquem yu'unique? ¿Mi mu tauc xa'ilin ta jtojolcutic xana'? Mi mu jechuque, ¿mi mu j'ech'eluc ta xach'ay jts'unubalcutic ti mu junuc cuxul ta xicomcutique?

¹⁵ “Cajval, Dios yu'un Israel, laj avac' ta q'uelel yutsil avo'nton ta jtojolcutic. Yu'un laj avac' ave ati' ti oy to jvoc' cuxul licomcutic jech c'u cha'al ta xvinaj li'e. Ti vu'uncutique, bats'i ech'em jsa'muliluncutic ta aba ta sat. Jech o xal mu xu' ta jva'an jbacutic ta atojol.”