Esdras 8 - Bible in Tzotzil de Chamula

Sbiic ti buch'utic cha'sutic talele

¹ Ti li'e, xi s'elan xcholet sbiic ma' ti banquilaletic yu'un jujuchop ti och ta vun ta jujun ti loq'uic talel ta Babilonia xchi'uc ti Esdras c'alal yorail tiq'uil ta ajvalilal ti Artajerjese:

^2-3 Ti Gerson c'otem ta banquilal yu'un ti jchop sts'unubal ti Fineese. Ti Daniel c'otem ta banquilal yu'un ti jchop sts'unubal ti Itamare. Ti Hatus xnich'on ti Secaníase c'otem ta banquilal yu'un ti jchop sts'unubal ti Davide. Ti Zacarías ti c'otem ta banquilal yu'un ti jchop sts'unubal ti Parose, ti chi'inbil loq'uel talel yu'un ti lajuneb xvaxacvinic (150) ta vo' viniquetic ti tsacal sbiic ta vune.

⁴ Ti Elioenai xnich'on ti Zeraíase c'otem ta banquilal yu'un ti jchop sts'unubal ti Pahat-moabe, ti chi'inbil loc' talel yu'un ti lajunvinic (200) ta vo' viniquetique.

⁵ Ti Secanias xnich'on ti Jahaziele c'otem ta banquilal yu'un ti jchop sts'unubal ti Zatue, ti chi'inbil loc' talel yu'un ti vo'lajunvinic (300) ta vo' viniquetique.

⁶ Ti Ebed xnich'on ti Jonatane c'otem ta banquilal yu'un ti jchop sts'unubal ti Adine, ti chi'inbil loc' talel yu'un ti lajuneb yoxvinic (50) ta vo' viniquetique.

⁷ Ti Jesaias xnich'on ti Atalíase c'otem ta banquilal yu'un ti jchop sts'unubal ti Elame, ti chi'inbil loc' talel yu'un ti lajuneb xchanvinic (70) ta vo' viniquetique.

⁸ Ti Zebadías xnich'on ti Micaele c'otem ta banquilal yu'un ti jchop sts'unubal ti Sefatíase, ti chi'inbil loc' talel yu'un ti chanvinic (80) ta vo' viniquetique.

⁹ Ti Obadías xnich'on ti Jehiele c'otem ta banquilal yu'un ti jchop sts'unubal ti Joabe, ti chi'inbil loc' talel yu'un ti vaxaclajuneb sbuluchvinic (218) ta vo' viniquetique.

¹⁰ Ti Selomit xnich'on ti Josifíase c'otem ta banquilal yu'un ti jchop sts'unubal ti Banie, ti chi'inbil loc' talel yu'un ti vaxacvinic (160) ta vo' viniquetique.

¹¹ Ti Zacarías xnich'on ti Bebaie c'otem ta banquilal yu'un ti jchop sts'unubal ti Bebaie, ti chi'inbil loc' talel yu'un ti vaxaquib xcha'vinic (28) ta vo' viniquetique.

¹² Ti Johanán xnich'on ti Hacatane c'otem ta banquilal yu'un ti jchop sts'unubal ti Azgade, ti chi'inbil loc' talel yu'un ti lajuneb svacvinic (110) ta vo' viniquetique.

¹³ Ti Elifelete, ti Jehiele, xchi'uc ti Semaíase, slajeb snitilultac ti Adonicame, ti chi'inbil loc' talel yu'un ti oxvinic (60) ta vo' viniquetic ti ta ts'acal xa sutic talele.

¹⁴ Ti Utaie, xchi'uc ti Zabude c'otem ta banquilal yu'un ti jchop sts'unubalic ti Bigvaie, ti chi'inbil loc' talel yu'un ti lajuneb xchanvinic (70) ta vo' viniquetique.

Ti jtuneletic ta ch'ulnae

¹⁵ Ti vu'un Esdrase laj jtsob jmoj ta scotolic ta sts'el bu macbil batel yoc vo' ti ta xc'ot ta uc'um Ahavae. Oxib c'ac'al jmoj oyuncutic ti bu taje. C'alal laj cavtabe sbiic ti jteclume, xchi'uc ti paleetique, mu'yuc xvinaj mi junuc levitaetic un.

¹⁶ Ta lec no'ox un, laj jtac batel ti Eliezere, ti Ariele, ti Semaíase, ti Elnatane, ti Jaribe, ti Elnatane, ti Natane, ti Zacaríase, xchi'uc ti Mesulame, viniquetic ti ich'bil ye sti'ique. Jech xtoc laj jtac batel ti jchanubtasvanej Joiaribe, xchi'uc ti Elnatane.

¹⁷ Laj calbeic ya'iic mantal ti baticuc ta svu'lanel yo' ta xchi'inic ta lo'il ti Idoe, ti c'otem ta banquilal jtsobvanej ti bu sbiinoj Casifiae. Laj calbeic scotol ti c'u s'elan ta xalbeic ya'i ti Idoe, xchi'uc ti xchi'iltac ta abtele, ti jtuneletic yu'un ch'ulna ti oy ta Casifiae, ti ac'o yic'buncutic talel j'abteletic ta scoltaeluncutic ti c'usi sc'an pasel ta xch'ulna ti Dios cu'uncutique.

¹⁸ Coliyal ti Diose, laj yic'buncutic talel ti Serebíase, jun vinic ti xtojob leque, snitilul levita ti sbiinoj Mahlie, ti c'ot xa ta vaxaclajunvo' (18) ta scotol xchi'uc ti xnich'nabe, xchi'uc ti xchi'iltac ta voq'uele.

¹⁹ Ma'uc no'ox taje, laj yic'buncutic talel ti Hasabíase, xchi'uc ti Jesaíase, snitilultac ti Merarie, ti oy jtob (20) ta vo' ta scotol xchi'uc ti xnich'nabe, xchi'uc ti xchi'iltac ta voq'uele.

²⁰ Ti jtuneletic yu'un ch'ulna ti va'anbilic comel yu'un ti Davide, xchi'uc ti jpas-mantaletic ta sventa stunelic ti levitaetique, oyic buluchvinic (220) ta vo'. Scotolic taje, vinaj ti oy stunelic va'anbilique.

²¹ Ts'acal to un, laj cal mantal ta sts'el uc'um Ahavae, ti oy sc'oplal ictaej vaj yo' jech ta jna'cutic bu mu lecuc libatcutic ta stojol ti Dios cu'uncutique. Laj jc'anbecutic ti ac'o xischabiuncutic yo' jech mu'yuc c'usi jnuptancutic ti c'u quepalcutic ta jujuchope, xchi'uc ti c'usitic x'ayan cu'uncutique.

²² Q'uexlal sba ta a'yiel laj ca'i ta sc'anbel ajvalil ti ta xiyac'bun jvoc'uc yajsoldado jcajlejetic ta ca' ta spojeluncutic mi oy bu ta xquich'cutic maquel ta be yu'un ti cajcontracutique. Yu'un calojbecutic ya'i ti ajvalil ti ta xchabiatic yu'un Dios ti buch'utic ta xac' sbaic ta ventainel yu'une. Ti buch'utic ta svalopatinic comel une, ta scajanbe ta sba scotol ti smuc'ul stsatsale, ti sc'ac'al yo'ntone.

²³ Laj quicta cotcutic un. Laj jc'anbecutic vocol scotol yu'un ti va'i s'elan taje. Ya'i jc'opcutic ma' ti Dios une.

²⁴ Laj taj une, xi s'elan lic jt'uj loq'uel lajcha'vo' (12) jtojobtasvanej yu'un ti paleetique: ti Serebíase, ti Hasabíase, xchi'uc ti lajunvo' (10) xchi'ilic ta abtele.

²⁵ Lic jbis c'u yalal yo' jech ta xcac'be jelavel ta yoc ta sc'obic ti platae, ti oroe, xchi'uc ti c'usitic jtunel ti meltsanbil ti laj yac' ta c'abal ti ajvalile, xchi'uc ti jbijubtasvanejetic yu'une, ti j'opisialetique, xchi'uc ti yilojic scotol ti israeletic ti laj yaq'uic sna'obilic ta sventa ta xtun ta xch'ulna ti Dios cu'uncutique.

²⁶ C'alal laj jbise, laj cac'be jelavel ta yoc ta sc'obic jun xcha'vinic ta mil xchi'uc lajuneb yoxvinic ta yo'obal ciento (21,450) ta kilo ti platae, vo'vinic (100) ta tos ti c'usitic lec meltsanbil ta platae, oxmil xchi'uc vo'lajunvinic (3,300) ta kilo ti oroe.

²⁷ Ma'uc no'ox taje, laj cac'be jelavel jtob (20) ta set muc'tic lech-lech taq'uin ti meltsanbil ta oro ti yich'oj vaxaquib (8) kilo ti yalal jujune, xchi'uc chib c'usi jtunel ti meltsanbil ta c'anal taq'uine, ti sts'ayayet yutsil ta j'ech'el ti toyol stojol jech c'u cha'al ti oroe.

²⁸ Ts'acal to un, xi laj calbe ya'iique: “Ti vo'oxuque, jtuneloxuc yu'un Dios jech c'u cha'al ti c'usitic jtunel meltsanbile. Ti platae, ti oroe, ja' yu'un ti Ajvalil Dios yu'un ti jtot jme'tic ta vo'nee.

²⁹ Bijbijanic un, chabiic lec, ta xavil ta aba ta asatic ti ta xich' bisel ta stojol ti banquilaletic yu'un ti paleetique, ti levitaetique, xchi'uc ti banquilaletic yu'un ti jujuchop yu'un Israel ti ta yut naetic yu'un xch'ulna ti Dios ti oy ta Jerusalene.”

³⁰ Va'i un ti paleetique, xchi'uc ti levitaetique, och ta yoc ta sc'obic ti platae, ti oroe, xchi'uc ti c'usitic jtunel ti laj yich' bisel ti c'u yalale. Laj yich'ic batel c'alal Jerusalén ta xch'ulna ti Dios cu'uncutic une.

³¹ Ta xlajchebal (12) c'ac'al yu'un ti sliqueb ue, liloc'cutic ech'el ta sts'el ti uc'um Ahavae yo' jech ta jtam batel jbecutic ta Jerusalén. Ti Dios cu'uncutic une laj scoltauncutic. Mu'yuc c'usi laj jpascutic yu'un ti cajcontracutique, xchi'uc ti j'eleq'uetic ta bee.

³² C'alal lic'otcutic ta Jerusalene, laj jcuxcutic oxib c'ac'al.

³³ Ta xchanibal c'ac'al un, lic yich' bisel c'u yepal ti platae, ti oroe, xchi'uc ti c'usitic jtunel ti meltsanbil ta xtun ta xch'ulna ti Dios cu'uncutique. Scotol laj yich' ac'bel ta yoc ta sc'ob ti pale Meremot xnich'on ti Uríase. Taje, chi'inbil batel yu'un ti Eleazar xnich'on ti Fineese, ti levitaetic Jozabad xnich'on ti Josuee, xchi'uc ti Noadías xnich'on ti Binuye.

³⁴ Ta yorail no'ox ti jech c'ac'al taje, lic yich' bisel, lic yich' chapel scotol. Laj yich' bejanel ta vun c'u yepal ti icatsile.

³⁵ Laj taj une, ti c'u yepal sutic talel ti bec'bil to ox loc' ta slumalique, lic yaq'uic ti c'usi ta xtun ta sventa chic'bil matanal ta stojol Dios yu'un ti Israele. Ta sventa scotolic ti israeletique, laj yaq'uic lajcha'cot (12) ch'iom tot vacax, vaclajuneb yo'vinic (96) ta cot chijetic, vuclajuneb xchanvinic (77) ta cot ch'iom tot chijetic, xchi'uc lajcha'cot (12) tentsunetic ta matanal sventa stojol smulic. Scotol laj yich' chiq'uel ta sventa stoyel xi'el ti Diose.

³⁶ Ts'acal to un, ti c'u s'elan ts'ibabil talel smantal ti ajvalile, laj yac'beic yich' ti j'abteletic ti bu c'alal smacoje, xchi'uc ta stojol ti its'inal ajvaliletic ti oyic ta yosilal uc'um Eufrates ti oy ta yeloval smaleb c'ac'ale. Laj stic' sbaic ta scoltael ti jteclum ta sva'anel xch'ulna ti Diose.